16. April 2014 Journal (Day 456-485)

April 01, 2014
Tuesday
Year II-091

^3w-w. Abril na, at dalawang buwan pa bago ang pasukan kaya naman hangga't di pa pasuka'y mag-e-Enroll na sa eskwelahang gustong pasukan at kailangang buo na ang desisyon sa kursong iyong kukunin. Ako, siguradong BS Psychology na ang aking kukunin at wala ng bawian iyon. Sarap pa sana ako sa pagtulog ng biglang gisingin ni Mama, ngayong araw pala ako mag-e-enroll sa Our Lady of Fatima University kaya matapos kumain ng agaha'y kaagad na akong naligo't nagbihis. Litrato na lamang ang kulang sa hinihinging requirements kaya bago magtungo, nagpa-picture pa ako. Kahit kailan, ang pangit ng hitsura ng aking Photo, po-posting pero ang sagwa naman. Matapos magpakuha't ipa-develop ang litrato, nagtungo na kami ni Mama sa school. Kung tutuusi'y mas malayo pa ang Our Lady of Fatima University kaysa sa Collegio de San Lorenzo pero dalawang sakay lamang at malapit din ito sa SM Fairview, kaya anytime that I want, makakapag-mall ako. Dami palang ipapagawa bago ka officially enrolled, bukod sa pupunan mo ang application form, itatanung rin sayo ang Health appraisal mo at sasailalim ka pa sa examination.

^3w-x. Ganun pala kapag magkokolehiyo ka na, daming papeles na kailangang asikasuhin. Dahil Freshmen ako't di pa alam ang gagawin, lahat ng kailangang asikasuhin at kompirmahi'y si Mama ang umaaksyon. Matapos punan ang form at ipasa ang lahat ng requirements, tinanong ako ng Councilor kung magte-take ba ako ng exam para sa Scholarship, di ako siguradong papasa pero di naman masama kung magbakasakali. Maya-maya’y nagtungo na kami ni Mama sa clinic at nagpa-blood pressure, matapos ako ipa-blood pressure, sumailalim naman ako sa stethoscope examination at sinabi ng Doctora na mahina raw ang baga ko. Kahit may kalayuan, kuntento na ako na sa Our Lady of Fatima University idaos ang pagiging college level.

^3w-y. Bukod sa malawak ito at nagtatayugan ang gusali ay de aircon pa ang bawatclassroom at maayos ang kanilang facilities. Matinding init ang sumunggab sa katawan pagkalabas at sa gutom ay ninais kong kumain kami ni Mama sa Chowking ngunit di ito pumayag. Saka na lang ako kumain pagdating sa bahay, natapos rin ang dapat gawin upang makapagkolehiyo. Mga ikatlo ng magtutungo ako sa WAKI Therapy subalit pinagbawalan na ako ni Mama pagkat bukod sa malayong lakara'y mainit pa ang panahon at sakit lang ang aabutin. Kaya nga ako nagti-therapy upang guminhawa ang pakiramdam. Anumang paliwanag ko kay Mama, bigo akong makumbinsi siya. Kinagabihan, nanood ako ng telebisyon at matapos ay natulog na.

April 02, 2014
Wednesday
Year II-092

^3w-z. Sa pagdilat ng dalawa kong mata'y may kagaanan sa loob akong naramdaman, hinuhudyat na marahil ay tapos na ang suliranin o nakapagpahinga lang ng maigi ang katawan kaya maginhawa ako. Minsan, kapag may sulirani'y huwag kaayawan at takasan, bagkus ay kaharapin ito't hanapan ng solusyon, hindi solusyon sa problema ang talikdan ito pagkat nandiyan pa rin pero pwede mong tumawanan ang problema. Kung mayroong hindi magandang nangyayari sa buhay, hindi naman sa lahat ng oras ay ganun pagkat balanse tayong binuhay ng panginoon. Kung sino pa nga mahirap iyon ang masaya’t malaya samantalang ang taong ipinanganak sa limpak limpak na salapi, lukot naman ang mukha at minsa'y kontrolado pa ng kanyang magulang, maging perpect na anak lang sila. Nobody’s perpect. 

^3x-a. Hitsura mo'y pinagpala, kasing-ugali mo naman si Satanas at kung sino pa iyong pangit at kakaiba, sila pa yung bukal ang kalooban. Matalino ka nga't malakas, sa kasamaan naman ginagamit at mahilig pang manlamang, nadudulas naman sa huli. Binuhay tayo ng panginoon na balanse't pantay pantay. Kahit anung problemang dumaan, isiping parang bagyo na agad umaalis. Kahit ano ka pa sa Mundo, huwag mahiyang magpakitang gilas, sila lang ba magaling at may karapatan? Pagkabango’y kaagad akong humigop ng mainit na kape. Matapos mainitan ang sikmurang nangangasim, tambak muli ang hugasin sa lababo't iyon ang inatupag ko. Maya-maya'y nagwalis at nagpunas naman ako, dami kong nawalisang alikabok at luminis ng husto ang sahig, bukas ay dudumi uli iyan na katulad ng isang problema na kahit nasolusyonan na'y darating pa rin, iba nga lang.

^3x-b. Pagsapit ng tanghaling tapat, anung init sa labas at halos ikatusta na namin ang matinding init. Upang di maubusan, kahit di nauuhaw ay inum ako ng inum at nakailang lagok na ng baso. Bahagyang kumulimlim naman pagsapit ng hapon at nagbabadya pa ngang umulan. Sana’y umulan na't sa ganun ay maibsan ang init. Sa kadahilanang may iki-claim akong mapa na naipa-reserve ng huling linggo sa Northridge plaza, nagtungo ako dun kahit anung pigil ni Mama. Siguro nga, tama sila na itigil ko na ang therapy kung malayo naman. Labag man sa kalooban na huwag ng mag-therapy, kailangan ko ng magpaalam kina Sir Nick, sobra ko silang mami-miss pagkat kahit paano'y naging malapit sila sa akin.

^3x-c. Tutungo sana ako sa WAKI Therapy pagkakuha ng mapa upang makapagpaalam sa kanila subalit pinangunahan ako ng hiya. Di pa ko kaagad umalis at nagtingin-tingin pa ng mga libro't mapa. Hindi ko maabot ang mga libro para sa Psychology pagkat napakatayog. Naisipan kong tumungtong subalit sa di inaasaha'y nagiba ang lagayan ng mga libro't nagsilaglagan. Sa sobrang taranta ko, may pagmamadali kong inilagay ang mga libro subalit bumibigay pa rin ang lalagyanan nito, tinawag ko na ang mga Assistant at sila na mismo ang nag-ayos at nagbalik ng mga libro. Matinding hiya ang naramdaman ko pagkauwi sa bahay dahil sa nangyari kanina subalit masaya pa rin pagkat nabili ko na ang ibig bilhin, ang mapa at binasa ko ang mga labels and details, iyon ang inatupag ko hanggang sa antukin.

April 03, 2014
Thursday
Year II-093

^3x-d. Maganda muli ang umaga sa aking paggising, parang ang gaan ng aking kalooban at walang pag-aalinlangang gawin ang gustong gawin. Hindi lamang minsan maiwasang kabahan pagkat malapit na ang test para sa scholarship, paano ako makakapasa kung wala naman akong mga reference na aking rerepasuhin, ni di ko nga batid kung ano ang lalabas sa Exam at paano makakapagsimula. Si Lord na ang bahala sa akin. Pagkabangon na may sigla, humigop kaagad ako ng mainit na kape't lalo pang sumigla ang pakiramdam pagkahigop nito hanggang sa huling pagsalok ng kutsarita sa tasa. Maya-maya’y naisipan kong magpatugtog para magbigay aliw sa sarili. Parang lumulutang ako sa sobrang saya kapag nakakarinig ng magagandang awitin, minsa'y naapektuhan ang damdamin ko lalo na kapag sentiments subalit kadalasa'y nagiging iba ang pakiramdam ko sa tuwing nakikinig ng musika at naalala ko rin ang naging nakaraan ko.

^3x-e. Iyon nga lang, gustusin ko man magpatugtog ng matagal kailangan ko ng patayin sapagkat kagaling lang ng ate mula trabaho na buong magdamag na dilat ang mata, marunong naman ako makiramdam, hindi lang niya nakikita pagkat sarado ang kanyang puso. Kasabay ng pagkawala ng awitin ang paghahari ng kalungkuta, upang hindi mabato't tuluyang lamunin ng lungkot ay naisipan kong maglaro sa computer. Hangga’t bakasyon at maraming pagkakataong gawin kung anung gusto, ituloy lang basta't wala kang damdaming nasasaktan. Sa sobrang pagkaadik ko sa paglalaro, tanghaling tapat na't muntikan ng makaligtaang kumain. Muli nanaman naranasan ang nakakapasong init ng araw kaya todo paypay kami kahit bukas na ang bentilador. Iba talaga ang init ngayong araw at nakakabigay pa ng sakit.

^3x-f. Matapos kong kumain, natulog muna ako. Mga ikatlo na ng hapon ako nagising at inilaan ang oras sa pagbabasa ng Mapa't dictionary. Kahit sumapit na ang gabi, mainit pa rin kaya nagpahangin sa labas kasama si Mama, nag-usap kami hanggang sa maikwento ko na sa kanya ang tungkol sa nangyari kahapon. Sa halip na magningas ang kanyang reaksyon at pagalitan, parang wala lang sa kanya't pinagsabihan lamang ako. Hindi naman talaga ako uulit pagkat mali iyon, baka problema pa ang sapitin kapag nahuling ako ang dahilan kung bakit gumuho ang lagayan ng libro sa bookstore. Buti na lamang at hindi. Maya-maya’y pumasok na ako't nanood ng telebisyon. Naging mainit ang gabi't marami ring lamok na umaatake, dahilan kung bakit di makatulog.

April 04, 2014
Friday
Year II-094

^3x-g. Dalawang araw ko ng nararanasan ang maginhawa't magaan na pakiramdam sa tuwing nagigising, ngayong araw lamang ang hindi pagkat inuubo ako't nagbabadya pang sipunin. Upang hindi tumuloy ang aking pinangangambahang mauwi muli sa gastos, hangga't di pa malala'y idinaan ko sa pag-inum ng maraming tubig. Bukas na rin ang aking examination for scholarship kaya di dapat ako magkasakit. Balak sanang ilaan ang napakaraming oras sa paglalaba't gawaing bahay, hindi ko itinuloy at baka lumala pa ang aking kalagayan. Bagkus ay ginampanan ko na lang ang gawaing bahay na di nakakapagod at matapos ay nagpahinga. Sa takot na mabungangaan, inilihim ko kila Mama ang nararamdaman ko't ayaw ko silang mag-alala. Kung sumasailalim lang araw-araw sa therapy, di sana'y hindi ako dumaranas ng ganitong uri ng sakit. Maaring dahil sa init ng panahon pero di tamang isisi pagkat may pagkukulang rin ako.

^3x-h. Halos buong araw akong di lumalabas ng bahay sa takot na lumala, nabagot muli ako kaya maghapong babad ang mata sa paglalaro ng Tablet na animoy walang pagsusulit bukas. Ganun ako sa tuwing tinatamad mag-aral, naglalaro na lang subalit may hangganan rin ang paglilibang. Nang masiguradong malilim na, nagtungo ako sa bahay nila Cathy upang bawiin ang perang inihulog ko para sa darating na youth concert subalit wala sila ng datnan ko, umuwi na lang ako. Wala nanaman akong magawa at na-lowbatt pa ang Tablet sa kakalaro kaya naupo ako't nanood ng telebisyon. Sa kadaldalan, naikwento ko rin kila Ate ang nangyari kahapon. Hindi ko inaasahan na magiging ganun ang reaksyon ng ate't daig pa ang mabangis na tigre kung magalit.

^3x-i. Sa bawat salitang binibitawa'y may katumbas na pagmumura't pang-iinsulto kaya nayamot ako't di ko napigilan ang sariling sagutin siya. Okey na sanang pagsabihan ako, di ako aalma pero di magaganda ang lumalabas sa bibig na nakakasakit ng damdamin, nagpuyos tuloy ako sa galit. Akala kung sinong matalim ang dila, may narating lang ay siya na ang may ganang magmataas. Pilit ko siyang inunawa, pero nasasaktan na ang damdamin ko. Mainit pa ang sitwasyon sa bahay kaya naisipan kong magtungo sa bahay ng kaibigan. Ibabahagi ko sana kay Regine (Miano) ang saloobin ko, kaso ay busy siya kay Baby Gian, nanahimik na lamang ako't hinayaan ito. Si Shiela naman, tulog at kailangan ko ng adviced. Minsan madaling humanap ng kaibigan subalit mahirap ang tunay. Saka lang ako umuwi ng lumamig na ang loob.

^3x-j. Nanonood ng video si Papa kaya sa cellphone na lang ako nanood ng paboritong programa. Hindi pa ako dinadalaw ng antok kaya nagtingin pa ko ng Photo album. Hindi ko akalain na mapapaisip ako ng malalim sa Photo album, napunta na dun ang libangan ko. Inalala ko ang masasaya kong nakaraan kasama ang mga pinsan habang nagbabakasyon sa probinsya. Tila nawaglit ko ang sama ng loob na dulot ng ate't maging ang alalahanin. Doon ko nadiskubre na kapag ikaw ay malungkot o may hindi magandang pinagdaraanan, gunitain mo lang ang masasayang pangyayari sa buhay pagkat iyon ang magpapasigla't magpapatatag sayo. Bukas na ang exam kaya goodluck to me tommorow and hope I can pass my exam to gain a scholarship. Deduction for tuition fee is not enough for me because it’s very little but I’ll make sure I will pass the test to proof that I am smart not Globe or TM. English Carabao pa ba? 

April 05, 2014
Saturday
Year II-095

^3x-k. Ikasiyam pa ng umaga ang schedule ng aming Exam subalit ikaanim pa lamang ay ginising na ako ni Mama't nag-almusal. Mukhang mahihirapan akong makuha ang tamang konsentrasyon mamayang exam pagkat panay ang aking pag-ubo't dama ko rin ang pananakit ng lalamunan. Di pala ako nakapaghanda ng lapis at pambura na gagamitin sa exam, walang humpay na sermon ang inabot ko kay Ina ng paalis na kami. Masyadong apurado't Alas-siete pa lamang kaya bumili muna ng lapis. Kaso’y naging mahaba ang pila sa tindahan, napatagal tuloy ako't malaki ang posibilidad na mahuli. Sa takot na mahuli, may pagmamadali akong naligo't nagbihis, si Mama nama'y hala ang kanyang pagbubunganga kahit di ko na pinapansin. Hindi naman naging traffic sa biyahe kaya tama lang ang pagdating namin.

^3x-l. Nakapila na pala ang kasabayan kong kukuha ng exam at napakadisente’t supistikada ng kanilang kasuotan. Marahil ay ako lang ang pinakapangit na suot at kinukutubang pinagtitinginan na. Nakakapanibago sa pakiramdam, bagong eskwela, bagongclassroom at bagong kaklase. Bago magsimula ang exam ay pinapila kami upang mag-register. Nanlaki ang mga mata ko pagkat ang tatayug ng kanilang grado. Nang makapag-register na ang lahat, isinagawa muna ang sitting arrangement at habang di pa nagsisimula ang exam ay tumitindi na ang kaba sa dibdib. Ilang saglit pa'y nagsimula na ang test. May ibang aytem na madadali, yung ilan ay di pa nagpaaralan sa tana ng buhay estudyante kaya halos mangamote ako. Dalawang oras ang palugid subalit sa dami ng kailangang basahin at i-shade ay tila kakapusi't naghula-hula na lamang ako ng sabihing limang minuto na lamang ang natitira. Over-pressure ako at Hayahay ang peg pagkatapos.

^3x-m. Bago kami magsialisa'y inanunsyo ng Propesora na sa susunod na linggo pa malalaman ang resulta. Di pa rin maalis ang aking kaba't mukhang magkakasakit ako sa lamig ng silid-aralan. Paglabas namin ni Mama, nabigla ang katawan ko sa init ng panaho't pagkahaplos sa mukha'y kumapit ang init. Nagtungo muna kami ni Mama sa Chowking. Habang naghihintay ay may isang babaeng lumapit sa akin at nagtanung, kahit di pa magkakilala'y nagkwentuhan na kami't nagpakilalang Nica. Sa hitsura palang at pananalita ay mukhang di ko kayang makipagsabayan sa isang matalino't masinop. Ilang saglit pa'y kumain na kami ni Mama. Nang kami'y papauwi na, hindi na sumabay sa akin si Mama pagkat may bibilhin pa ito.

^3x-n. Sa wakas at natapos rin, natulog akong may kapanatagan. Nagising ako dahil sa ingay ng mga bata, mga pinsan ko pala iyon at bumisita ang mga kamag-anak ko. Pagkabango’y nagtungo ako sa bahay ni Cathy upang bawiin ang pera. Di ako kaagad nakapunta pagkat may tinanong pa sa akin si Aling Catherine. Napahaba ang aming usapan kaya napatagal pa ko. Matapos ang pag-uusap, nagtungo na ako sa bahay ni Cathy subalit wala pa rin ang mga ito. Dumeretso kaagad ako sa computer shop. Ang bagal mag-access ng Internet pati magbasa, tapos saksakan pa ng ingay. Nagpasya akong lumipat na lamang. kabaligtaran ng nilipatan ko sa kanina. Bukod sa tahimik, mabilis rin ang Internet connection. Balak ko pa sanang magtungo sa bahay nila Tita Jean, subalit sa takot na abutin ng dis-oras ng gabi't mabungangaan ng walang puknat, umuwi na ko. Saka pa lamang naghapunan at nanood ng telebisyon. Medyo sumasama muli ang pakiramdam kaya humilata na agad sa kama.

April 06, 2014
Sunday
Year II-096

^3x-o. Ang kagabing napakasama ng timpla'y kabaligtaran ng paggising ko sa umaga, hindi na barado ang ilong at tila lumuluwag na ang paghinga. Bumangon ako na may sigla ang kalooban at naging maaliwalas rin ang panahon kahit may bagyong nagbabanta. Walang nakahain na pang-agahan, humigop na lang ng mainit na kape at pagkatapos ay naglipit ng higaan at naghugas ng plato. Matapos ang gawaing bahay, kahit saksakan sa sungit ang pakiramdam kagabi’y nagtungo pa rin ako sa Taas upang bumili ng Plastic Cover. Pagkauwi’y nilagyan ko ng Cover ang Mapang Binili ko pa sa Northridge Plaza at iyon ang pinagkaabalahan. Matapos lagyan ng Cover, tinamaan muli ako ng pagkabato kaya naisipan kong libangin ang sarili sa paglalaro ng Tablet. Sa kaadikan ko sa paglalaro't humaling na di maawat ang sarili, hindi namalayang oras na ng tanghalian.

^3x-p. Ang kaninang umagang maaliwalas at maganda pa sa balat ang sinag ng araw, nakakapaso na ngayong tanghali sa sobrang alinsangan nito at halos di ako makatulog. Nagbasa na lang ng World atlas. Simula pagkabata'y hilig ko talagang magbasa ng Geography kaya kabisado ko na kung saang lokasyon ang bansang tinutukoy at kabisado rin ng utak ang hugis at lawak ng bansa. Maski nga kabisera ng bawat bansa'y kabisado na rin. Kapag walang magawa, pagbabasa minsan ng Geography ang pinagkakalibangan ko. Sana sa aking pagtanda'y maranasan kong mangibang bansa. Sa kakabasa ng World atlas maging ang mapang binili ko pa sa Northridge plaza, hindi namalayang gabi na't dinig ko muli ang ligalig ng mga bata.

^3x-q. Isa pa sa libangan ko ang manood ng telebisyon tuwing gabi. Tuwing Linggo'y nanood ako ng Rated K at Kapuso mo Jessica Soho at marami akong exploration sa dalawang programa, dalawang programang masasabing matalinong documentary at interesting pang panoorin dahil sa kakaiba nilang ipinapalabas at nakakapagbigay alam sa manonood. Curfew time na kaya ang mga batang siksik, liglig at umaapaw sa kaligaliga'y nagsiuwian na, maging marahas at malakas na tugtog ng kapitbahay ay tumigil na rin. Ganito kami sa Sitio Taniman tuwing gabi, maingay at kung minsa'y may nangyayaring rambulan.

April 07, 2014
Monday
Year II-097

^3x-r. Lunes nanaman at balik muli sa opisina ang mga empleyado, swerte pa rin kapag estudyante ka pagkat sa haba ng iyong bakasyon ay tiyak na sulit na sulit ito, samantalang kapag may trabaho ka na'y sa holiday ka lang walang pasok subalit huwag magsaya't magpakasarap bilang buhay estudyante pagkat kumikita naman ang trabahador at magagawa at mabibili nila ang gusto. Samantalang kapag estudyante ka lang, masyadong limitado ang gawai't marami pang bawal. Sa aking paggising, mukhang bumubuti na nga ang pakiramdam ko't di na tumuloy ang pinangangambahan ko. Balak sanang maglaba, subalit inunahan na ko ni Mama't naglalaba na siya. May mga nakatambak pang ibang labahin at nagpresintang ako ang maglalaba subalit sinabihan ako ni Mama na huwag mangialam. Nakaramdam ako ng kaunting tampo't ibinuhos ang sama ng loob sa paghuhugas ng plato, buti na lang at di nabasag.

^3x-s. Yaman at inalisan ako ni Mama ng mapaglilibangan, lumayas ako't nagtungo sa bahay nina Cathy. Sina Jaka at Janna (Portugal) lamang ang nadatnan ko't nagkwentuhan kami. Maya-maya’y dumating na si Cathy at silang tatlong magkakapatid lang ang nandun sa bahay. May pagkakataon na akong bawiin ang pera subalit wala pa raw pampalit si Cathy at bumalik na lang mamayang gabi. Matindi na ang init sa labas kaya umuwi na ko. Wala pa ring pinagkaiba sa tuwing lalayas ako't uuwi pagkat nasermunan muli ako ng mahaba't madami. Bakit sa tuwing bumibisita ako sa bahay ng kaibigan ko't kamag-anak ay nagagalit si Mama, minsan ko na nga lang gawin iyon at madalas ay nasa bahay ako, kasawa rin kasing laging manatili sa bahay kaya nagagawa kong maglakwatsa at kasalanan niya kung bakit naglakwatsa ako dahil inalisan niya ko ng libangan.

^3x-t. Pinabayaan ko na lang siya sa pagbubunganga. Kapag siya naman naglayas at kasama ang Kuya Al, wala naman siyang naririnig sa akin at lalayas na nga lang, wala pang lutong ulam at sinaing. Matapos lumamon, nanood ako ng telebisyon at dami kong tawa kay Ryzza mae. Buti pa si Ryzza Mae, napapasaya pa ang araw ko't tanggal stress pa. Matapos manood ng telebisyon, nag-siyesta muli ako. balak ko sanang gumala't magtungo muli sa bahay ni Cathy upang bawiin ang pera subalit malalaki't masasakit na tinig ni Ina muli ang mauulinig ko sa tuwing uuwi kaya hindi ko na itinuloy pa. Iginugol ko na lang ang maraming oras sa panonood ng telebisyon at paglalaro ng Tablet. Masama man ang loob, napapawi naman kapag may nagpapasaya sayo.

April 08, 2014
Tuesday
Year II-098

^3x-u. Sarap pang humiga ng lagay sa kama ngayong bakasyong grande subalit kailangan ko ng bumangon pagkat marami pa akong dapat atupagin. Ang kahapong saksakan sa init ay kasalungat ng ngayong makulimlim ang panahon at nagbabadya pang umulan, sana nga'y umulan na. Matapos kumain ng agahan, naghugas ako ng plato't nagwalis-walis sa sahig. Nang masiguradong malinis at makintab na ang sahig, saka pa lamang ako naupo at nanood ng telebisyon. Nakaka-overwhelm naman ang show ni Ryzza pagkat ang kanyang mumunting pangarap, natupad na't sana maging kagaya ko si Ryzza na may pangarap sa buhay at di mo namamalayang natupad na. Maya-maya’y natulog muna ako. Pagkagising, laking tuwa't gulat ko ng biglang bumisita sa aming bahay ang Tita Susan na kagagaling lamang mula Batangas at napakarami niyang pasalubong.

^3x-v. Bukod sa pasalubong nakakain ay baon rin ni Tita Susan ang maraming kwento tungkol sa mga pinsan ko. Nakakatuwa’t dapat pala'y sumama ako kay Tita Susan sa Batangas. Maya-maya’y nagtungo ako sa computer shop. May hiyawan at tilian na kala'y hinahabol ng multo, iyon ang nauulinig ko habang nagkukumpyuter at di ko batid kong anung pinapanood nila. Dumungaw ako sa likuran at nakakatakot na may halong pandidiri ang pinapanood nila't pamilyar sa akin ang Horror moviena iyon. Imprint pala at nung elementary pa ako ng mapanood ang nakakatakot na movie na 'yun. Halos isang buwan akong nakaramdam ng panghihilakbot at di rin makatulog sa gabi matapos iyon panoorin. Ng mapanood muli, bumalik ang dati kong takot at masyadong brutal ang pag-torture nila sa babaeng napagbintangan daw na nagnakaw ng necklace.

^3x-w. Matapos magkumpyuter, nagtungo pa sa bahay nila Tita Jean. Nandun na si Tito Elbong maging ang kanyang mga magulang at kapatid. Nakipag-usap ako sa Lola Tinang na lola ni Amihan at napakarami niyang naikwento sa akin. Nandun rin si Tita Juliet at halatang pinariringgan ako. Si Tita Jean nama'y hindi maawat ang sarili sa paglalaro ng Zuma blitz sa laptop. Inabot na ko ng gabi sa kanila at kahit nahihiya'y kinapalan na ang mukhang maghapunan sa kanila. Malalim na ang gabi kaya kinailangan ko ng umuwi. Dyesebel na pala pagkauwi't nakita kong nakahiga ang Tita Susan. Hindi ko kaagad natapos manood ang programa pagkat nagkwentuhan pa kami ni Tita Susan. Pakiramdam ko, lahat ng gusto kong sabihin at ikwento, naikwekwento ko sa kanya. Malapit ng maghating-gabi ng kami'y makatulog. Hindi nanaman ako makatulog pagkat umatake muli ang lamok. Pesteng lamok na iyan talaga.

 April 09, 2014
Wednesday 
(Araw ng Kagitingin) 
Year II-099

^3x-x. Pag-alala sa katapangan at katatagan ng mga mahal nating bayani laban sa Hapon na mananakop at gunugunita rin ang pagbagsak ng Bataan sa kamay ng Hapon. Matinding pagdurusa't pagod marahil ang dadanasin kung nabubuhay ka lang sa panahong iyon, biruin at ilang milya ang nilakad ng mga bihag ng Hapon na walang kain at pahinga nung makasaysayang death march, pasalamat na lang at di ako nabuhay sa panahong iyon. Bukod sa pinapaglakad ng malayo ang hukbong Amerikano at Pilipino, walang awa rin nilang hinahalay ang mga kababaihan. Naging napakarahas at malupit ng Hapon sa atin nung World War 2. Pagkagising ng diwa, narinig kong nag-uusap si Mama at Tita, umaga na pala subalit di pa ko bumangon at umidlip pa. Habang nag-uusap ang dalawa, bigla ipinakita ni Mama kay Tita Susan ang report card ko. Nakakahiya at sa sobrang hiya'y nagtaklob ako ng unan at di pinakinggan ang naging reaksyon ng tita. Ipinagmamalaki pa naman ako ng tita sa mga taong kausap niya at matalinong bata ang tingin sa akin, tapos ay makikita niyang ganun ang grado ko, nakakahiya.

^3x-y. Kahit hiyang-hiyang iharap ang mukha, bumangon pa rin at nagpakita sa kanya. Hindi naman niya ako kinuwestson kung bakit ganun ang marka ko, napanatag ang kalooban ko. Humigop ng mainit na kape at matapos ay naghugas ako ng plato. Nagbibihis na ang Tita pagkat ngayon na ang alis nito, dami niyang dalang mabibigat na bagahe. Naawa naman ako kay Tita at bilang pagtanaw ng utang na loob nung siya ang sumagot ng pamasahe namin patungong Quezon, tinulungan ko siyang magbuhat patungong terminal ng tricycle. Sa bigat ng bagahe na aking binuhat, labis akong napagod pagdating ng bahay. Tinamaan nanaman ako ng pagkabato kaya naisipang manood ng telebisyon habang kumukutkut ng manamis-namis na Panucha.

^3x-z. Ilang sandali pa'y oras na ng tanghalian. Naging napakaalinsangan ng tanghali kaya labis ang aming pag-alma't kahit anung paypay, magpahangin sa bentilador ay dama pa rin ang init. Summer is in the air and gives our life more suffer. Just be patient and someday, we would feel the coldness by rain. Matapos kumain ng tanghalian, naligo na ako. Kahit paano'y napreskuhan ako subalit panandalian lamang iyon pagkat napakainit sa labas. Hindi ako makatulog kaya naglaro muna ng Tablet. Kinahapunan, sa wakas at bumuhos na rin ang ulan subalit daglian lamang iyon. Kahit daglian lamang, nakatulong pa ito upang matanggal ang alikabok at mabawasan ang init.

^3y-a.  Pagsapit ng gabi, balak ko sanang bumisita sa bahay nila Auntie Caling ngunit hiya ang umiral sa dibdib kaya di ako tumuloy. Sa bahay nila Jaypee ko naisipang magtungo. Buti na lamang at gising pa sila. Labis ang takot ko sa alaga nilang aso na si Jambo, makatahol ay parang lalapain ka pero sabi ng Tita Arlene na ganun raw siya kapag nakikipagkaibigan at lalandiin ka lang. Kahit mabangis, cute siyang tingnan pagkat di na raw lalaki. Sa una'y labis ang pagkasindak ko pero nawala ang takot kinalaunan at nahahawakan ko pa nga, grabe ang kakulitan ni Jambo. Sa kanila na rin ako nanood ng telebisyon at pagsapit ng Alas-nuebe, nagpaalam na ko pagkat baka mabagansya kapag naabutan ng curfew. Kay tahimik ng kapaligiran at wala ng mga kabataang tambay. Di pa ko dinadalaw ng antok kaya naglaro pa ng Tablet. Maya-maya’y natulog na ako.

April 10, 2014
Thursday
Year II-100

^3y-b.  Maliwa-liwanag muli ng magising ako, pagkabango'y sumapit na pala ang ikawalo at nasa bahay na ang Papa galing trabaho. Wala nanamang nakahaing agahan kaya humigop na lang ng mainit na kape. Maya-maya’y paghuhugas ng plato ang sunod kong inatupag at nagwalis-walis kahit paano upang tanggal alikabok. Pagkatapos ng gawaing bahay, nag-internet ako gamit ang Tablet. Sa kaadikan ko sa paggamit ng Tablet, hindi ko nanaman namalayang tanghaling tapat na at oras na upang kumain. Matapos kumain, may balak sanang maligo subalit sa pandidiri ko sa napakalaking dumi ng kuya na di mailubog sa inidoro, hindi ko muna itinuloy at nag-ipon ng tubig. Grabe makadumi ang Kuya Al, parang akala'y dumi na ng halimaw sa laki at nakailang timbang puno na ko subalit di pa rin lumubog. Paano’y dalawang beses lang sa isang buwan kung dumumi ang kuya.

^3y-c.  Ginawa ko na ang naisip na paraan, mapalubog lang ang napakalaki't napakabahong dumi subalit wa effect. Upang di mabahuan ay tinakpan ko na lang ng palanggana habang naliligo. Kahit nakatakip na kung sa tindi naman ng baho'y naamoy ko pa rin. Nakaraos rin ng lagay matapos maligo at presko sa pakiramdam. Maya-maya'y naisipan kong magkumpyuter. Halos ikayamot ko ang napakabagal na pagresponde ng computer, marahil ay marami ng Malicious software na inaatake ang mga programs at di na kayang puksain ng Anti-virus. Sa bagal, pinatay ko na't nanood ng telebisyon. Matapos manood, magtutungo sana ako sa bahay nila Auntie Caling, subalit pagkadungo muli ang nangibabaw sa dibdib kaya di ako tumuloy at kila Amihan ako nagtungo.

^3y-d.  Kahit mabait ang pakikitungo sa akin ni Tita Juliet, parang may ibig ipahiwatig ang mga sinasabi niya, parang nagpaparinig at ipinapamukha sa akin na tinatapakan ko raw sila dahil sa mas angat ang buhay namin kaysa sa buhay nila. Hindi ko intensyon na matahin sila pagkat wala sa akin kung sino ang nakakaangat at pantay-pantay ang pagtingin ko. Hindi ko alam kung anong nasabi ko't ganito lamang ako paringgan ng Tita Juliet. Pinakibagayan ko na lamang siya at sinakyan ang mga patago subalit patamang salita habang nag-uusap kami. Dahil sa kanya kaya saglit lang ako kina Tita Jean.

^3y-e.  Nararamdaman ko, mukhang di kami magkakasundo ni Tita Juliet. Nahihiya man, kinapalan ko na ang mukha sa pagtungo kina Auntie Caling. Wala sila Auntie Caling at Uncle William at sina Tita Haydie lang ang nandoon. Bukod sa malawak ang bahay, komportableng tirhan sa ganda ng kanilang backgrounds at impressive sa paningin. May ikalawa't ikatlong palapag pa sila subalit di ko inakyat pagkat di ko maiwasang mahiya. Bukod sa malamansyong bahay, maayos at may pagkamatikoloso silang tingnan. Sa tindi ng hiya, hindi ko na nagawa pang magtagal sa kanila. Hindi pa ako makatulog gawa na napakaalinsangan ng panahon kaya nagduyan muna ako. Mga Alas-onse na ako natulog.

April 11, 2014
Friday
Year II-101

^3y-f.  Kahit hindi makatulog gawa na malamok ang kwarto at mainit ay naging kaaya-aya pa rin ang napaginipan ko. Sa ganda ng panaginip, naikwento ko kay Mama at langit ang nasa loob sa tuwing maalala ko. Sana’y mapaginipan ko ulit iyon sa muli kong pagtulog. Nakakabato ang naging umaga ko kaya naisipang magpatugtog. Yamot lang ako kay ina pagkat pinapapatay niya. Hindi sukat akalaing maririndi pa siya sa kabila na di naman kalakasan ang tugtog ko. Habang nagpapatugtog, naglinis ako sa loob ng bahay, madalas kong gawin tuwing umaga. Malapit ng sumapit ang Alas-nuebe subalit di pa dumarating ang ate kaya ipinagpatuloy ko ang patugtog. Ilang sandali pa'y umalis na si Mama pagkat kukunin niya ang aking Form 137 para sa confirmation na ako'ytransfer na sa Our Lady of Fatima University. Kaming dalawa na lang ng Kuya Al naiwan at ako'y naligo.

^3y-g.  Matapos maligo, nagkumpyuter muna ako't ilang saglit pa'y dumating na si Mama. Hindi man kataasan ang natamo kung marka sa pangkalahatan, masaya pa rin ako pagkat makakapagkolehiyo pa rin. Sana sa pagtungtong ko sa kolehiyo'y mapagtagumpayan ko na ang pangako, ang maging maayos sa pag-aaral. Summer season na subalit anung lungkot ng kalangitan at nagbabadyang ibagsak ang milagrong tubig. Sa kakakumpyuter, Alas-dose na pala't kailangan ng kumain kahit di pa ko gutom. Hindi sana ako tutulog subalit nakatulog pa rin. Pagkagising, panonood ng telebisyon ang inatupag ko't maghapon akong nanood ng Meteor Garden. Nung Pres school pa ko ng huling ipalabas ang nakakakilig na Taiwanese Novela na iyon subalit hanggang ngayo'y tinatangkilik pa rin at kinababaliwan ng mga manonood. Maski ako'y labis ang pagkakilig at sarap ulit-ulitin. Kinagabihan, hindi muli ako makatulog kaya nag-soundtrip muna ako. Parang kailan lang ng bata pa ko't gusgusin, ngayo'y malapit na akong tumungtong sa hustong edad.

April 12, 2014
Saturday
Year II-102

^3y-h.  Naging maganda muli ang napaginipan ko't sana'y palaging ganun upang maging masigla't masaya ang aking paggising. Kung maari lang, mapaginipan na rin ang aking special someone. Balak ko sanang maglaba ngayong araw para iwas pagkabagot subalit naunahan na ni Ina, gawaing bahay na lang ang ginampanan ko. Bahagyang kumulimlim ang panahon kaya magandang pagkakataon upang makapagpahinga sa init. Matapos ang gawaing bahay, pagbabasa ang sunod kong inatupag at kahit hirap pa rin akong umintindi ng teksto sa wikang English, atlis may natututuhan akong bagong bokabularyo. Maya-maya’y oras na upang mananghalian, tamang lamon lang ng pagkaing karami-rami't sa katakawa'y nakatatlong buong plato ako. Halos ikabundat ko na ang kabusugan. Sa takot na pangit ang mapaginipan at mauwi sa pagkamatay kapag natulog na puno ang Tiyan, hinayaan ko munang matunawan.

^3y-i.  Maya-maya’y nag-siyesta muna ako. Kahit di maalinsangan ang panaho'y di naman ako makatulog. Bumangon ako kaagad at nagtungo sa computer shop. Panonood ng mga sikat na kantang ginagaya ang pinapanood ko. Sa kakatawa nilang parody at saksakan ng kakulitan, labis ang aking paghalakhak na walang pakialam sa sasabihin ng iba. Ang galing ng kanilang production at gayang-gaya ang orihinal na music video. Hindi masamang tumawa't basta walang damdamin kang sinasaktan. Habang wiling-wili sa panonood ng Youtube ang pagdating naman ni Amihan. Sayang at di kami sabay sa pag-alis pagkat patapos na ko kung kailan pa ito dumating. Matapos magkumpyuter ay nagtungo pa ako sa bahay nina Cathy subalit di natuloy pagkat nalibang ako ng husto kay Baby Kalbo sa aking pagdaan at nakipagkwentuhan pa kay Ate Lenlen. 

^3y-j.  Pagdating sa bahay ng Cathy, kita kong nagbibihis sila't mukhang may pupuntahan subalit di kasama si Jaka kaya labis ang kanyang pagmamaktol. Di makuha si Jaka sa pakiusap ng ate kaya napilitan si Cathy na pagbuhatan ng kamay si Jaka. Naawa ako kayJaka habang ginagawa iyon ni Cathy at pinigilan ko siya. Pinagsabihan ko si Jaka at kinumbinsing magpaiwan na kasama ako subalit ito'y nagmatigas. Hirap talagang pagsabihan ang batang iyon at kahit anong pakiusap ay ayaw kang pakinggan, maski ako'y malapit ng di makapagtimpi. Sa pagpupumilit ni Jaka, naisama rin nila ito. Kainis lang at napakaistupido ko pagkat nakaligtaan kong bawiin ang pera. Sunod ay kina Regine ako nagtungo. Saktong nandoon si Annie maging ang kanilang kaanak subalit wala si Gelyn.

^3y-k.  Sa sarap nilang kausap ay nanatili pa ako sa kanila hanggang sa magdilim. Habang kami'y nag-uusap ni Annie at Aling Gina at mabanggit ko ang pangalan ni Berna'y hindi ko maintindihan kung bakit ganun na lamang ang reaksyon nila. Tinanong ko sila at naikwento sa akin ang tungkol kay Berna. Di ko sukat akalain na magagawa iyon ni Berna, ang suutin ang kasuotang di naman niya pagmamay-ari at grabe siya pagkat wala siyang delikadesa. Bukod pa dun ay marami pang naikwento sa akin si Annie at masasabing pinakitaan mo lang siya ng konting ginhawa, umaabuso na. Kaya pala ganun na lang kalakas ang loob ng babaeng iyon na mangutang sa akin, di naman ako makatanggi pagkat naawa ako sa kanya't batid ko ang kanyang kalagayan. Sa pag-uusap namin ni Annie ang pagdating naman ni Gelyn. 

^3y-l.  Saglit lamang kami nagkita at di ko na siya nakamusta pa pagkat kaagad silang umalis. Lumalalim na ang gabi't sa takot na abutin ng panibagong araw sa kulunga'y umuwi na ko. Saka pa lamang ako naghapunan pagkauwi't himala pagkat di ako nasermunan ni ina, iyon pala'y himbing na sa pagtulog. Matapos kumai'y nanood ako ng telebisyon. Maya-maya’y bigla akong nakaramdam na parang pigil ang aking paghinga, inatake nanaman pala ako ng hika't kaagad lumanghap ng Inhaler. Bumalik naman sa normal ang aking paghinga subalit di naman makatulog dahil sa sipon. Sa panahon na tag-init, kailangan ng konting ingat upang di sakit sa bulsa. Muntikan ko ng ikalagot iyon.

April 13, 2014
Sunday 
(Palm Sunday)
Year II-103

^3y-m.  Linggo ng palaspas, hudyat ng pagsisimula upang magnilay-nilay at pagsisihan ang lahat ng pagkakasalang nagawa. Kahit nabuhay akong di banal at makasalanang nilalang, malaki ang pasasalamat ko sa panginoon pagkat hindi niya ako pinabayaan at pinatunayan iyon kagabi lang. Natakot ako sa hika ko, napakalala. Akala ko'y katapusan ko na ng sumikip ang paghinga pero binigyan pa ko ni God ng pagkakataong mabuhay. Sinipon man kagabi, kasalungat naman ng paggising ko sa umaga pagkat naging maginhawa ang paghinga ko at tila walang nangyari. Bukod sa maganda ang pakiramda'y naging maaliwalas rin ang panahon kaya perpect timing upang makapagtuyo ng sinampay. Pagkabango’y kaagad kong tinanggal ang punda ng unan at nilabhan maging tubal ko't kumot na kay kapal. Sa dami ng nilabhan at gawa na di pa nakakapag-almusal, halos ikahimatay ko na ang matinding gutom.

^3y-n.  May agahang nakahain subalit naunahan akong lantakan iyon. Gumawa ako ng paraan para malamnan ang sikmurang piping pipi na sa pagkalam. Matapos kumai'y dumeretso kaagad ako kila Regine (Miano). Di tulad ng kahapong umaapaw sa saya ang kanilang tahanan kahapon dahil sa kanilang kaanak pagkat tahimik at sila-sila na lang ang nandoon. Buti na lama't nandun si Annie at Regine kaya may nakausap ako. Maya-maya’y nagtungo kami ni Annie sa Sapa. Tagal ko na rin hindi nailulublob ang paa sa Sapa't walang pandidiri kaming nagtampisaw kahit sabihing galing sa inidoro ng mayayaman. Biglang nawala si Annie kasama ang nakakabatang kapatid sa di malamang dahilan kaya umapak na ko sa lupa. Ayaw ko pang umuwi't nakipagkwentuhan pa kay Aling Kris.

^3y-o.  Daldal ni Aling Kris at dinaig pa si Kris Aquino, puro kwentong barbero lang naman ang sinasabi niya't paniwala naman ako. Maya-maya’y lumabas ang asawa niya't magaling rin makipagbiruan kaya napatagal pa ko sa kanila. Pakiramdam ko'y masaya nanaman ang araw ko, bukod sa napaligaya nila ako, hindi nila maiwasang mailabas ang ngipin sa tuwing humihirit ako ng jokes. Kahit nakakainsulto't masasakit na salita ang bitawan ng kapwa mo, idaan lang sa biro't tiyak na palagi kang smile di stressful. Ngayong araw rin ang laban ni Manny Pacquao kaya nanahimik nanaman ang sambayanang Pilipino. Kahit di ko napanood ang laban ni Manny Pacquao kay Bradley pagkat ako'y nakatulog, hanga pa rin ako sa naipakita niyang natatanging lakas na nagpanalo sa kanya.

^3y-p.  Kung tutuusi'y bato-bato kalaban si Bradley pero di panaig ang liksi't lakas ng ating pambansang kamao. Gawa na ako'y tinamaan ng pagkabato't naiinitan sa loob ng bahay, naisipan ko muling maglakwatsa't magtungo sa bahay ng kaanak. Kina Tita Arlene sana ako tutuloy subalit wala sila kaya sa bahay nina Tita Jean ako nagtungo. Kahit kailan, iba talaga ang kutob ko kay Tita Juliet, parang may pagkamuhi sa akin na di ko lubos malaman ang dahilan. Nagkatotoo nga ang kutob ko ng yayain niya ko't biglang sinabing huwag na lang at baka raw ako mapagod, di raw ako sanay, may ganong pagsasalita't hindi ko alam kung matutuwa ba o maiinsulto. Pagkaalis ni Tita Juliet at Itang, kami lamang ni Lola Tinang ang naiwan at nag-usap.

^3y-q.  Maya-maya’y biglang dumating si Uncle William. Sila-silang matatanda na lang ang nandoon kaya umalis na ko't hinayaan ko silang mag-usap. Dumeretso ako kaagad kila Cathy upang bawiin ang pera. Si Ate Ging at Cathy lang ang nandoon subalit tulog si Cathy. Pagkabigay ay umuwi na ko. Walang magawa sa bahay kaya nakinig ako ng mga awitin. Kinagabihan, kahit papasok ang Mahal na araw ay di ko pa rin maiwasang mapahalakhak ng maging guest ni Vice Ganda si Aling Dionesia. Lalo pang sumidhi ang tuwa sa dibdib ng kantahin ni Aling Dionesia ang “Wrecking Ball”, may pabirit pa sa huli. Mukhang mabenta sa aking paningin ang pamilya Pacquao at malamang ay trending topics Worldwide ang pagpunta ni Aling Dionesia sa show ni Vice Ganda. Gawa na di pa dinadalaw ng antok, nakipag-textmate pa ko kay Leonardo. Kahit anung panggap ko'y di talaga paloko ang lalaking iyon. Kainis lang pagkat kung kailan di na kami magkaklase, saka pa muling umiigting ang nararamdaman ko sa kanya, mukhang tinamaan muli ako.

April 14, 2014
Monday
Year II-104

^3y-r.  Lunes santo o kahit di pa sumasapit ang Biyernes santo ay alisin muna ang saya't bawasan muna ang kinakain sa araw-araw bilang pag-aayuno. Maaga pa lamang ng ako'y magising at kahit di pa gutom ay nag-almusal na ko para di tamaan ng pagkagutom sa pagpunta muli namin ni Mama sa OLFU upang magpatahi ng uniform. Ngayong araw rin malalaman ang exam kung sino ang nakapasa para sa scholarship kaya di ko maiwasang kabahan. Sana’y maipasa ko iyon para menos gastos sa matrikula't ikatuwa ako Ina. Mga bandang Alas-nuebe ng tumulak kami ni Mama sa Our Lady of Fatima University, pasalamat kami pagkat di naging mabigat ang daloy ng trapiko kaya kaagad kaming nakarating. Pagkapasok ay nagpakonsulta na kami sa mananahi para sa susuoting uniform. Matapos makipag-usap sa mananahi'y tumungo kami sa admission office upang alamin ang test result.

^3y-s.  Habang lumalapit ang hakbang ko sa admission office ang pagtindi ng kaba subalit sinabi ng babae na sa Guidance malalaman. Nagtungo kami sa Guidance at naalis ang kaba sa dibdib ng sabihing, sa Next week pa malalaman ang results. Sunod ay sa Registrar Office kami nagtungo upang hingiin ko ang Curiculum. Freshmen student ako kaya may hiya sa dibdib ng hindi ako sinamahan ni Mama sa pagpasok sa Registrar. Pagkakuha, uuwi na sana kami ni Mama subalit sa kagustuhan kong magtungo sa Bayan upang mag-therapy, kinulit ko siya't walang sabi-sabi na itong pumayag. Bago kami dumako sa bayan ay nagtungo muna kami sa SM Fairview at kumain pagkat kanina pa kalam ang sikmura.

^3y-t.  Matapos kumain, sa National bookstore naman kami nagtungo't nagtingin tingin ng mga libro. Dahil nawili na may kasamang pagkahumaling sa pagbubuklat ng libro't mapa, mga bandang Ala-una na kami nagtungo sa Novaliches bayan. Pagdating sa WAKI Therapy doon sa Susano mall, di hamak na mas malaki ito kaysa sa Northridge plaza subalit di ko naman dama ang lamig at puro may edad na ang kasama ko. Lalo ko pang na-miss sila Ma'am Mary Jane ng makita ko ang mga presintor ng therapy. Kahit may kalakihan subalit mas maganda pa rin ang WAKI therapy sa Northridge Plaza kaso di na ko makakapunta doon pagkat tatlong sakay pa tapos gagamitin pa ang paa. Ako lamang ang sumalang sa WAKI therapy at nagpamasahe naman si mama sa bulag na katabi lamang ng Metrowealth center. 

^3y-u.  Halos ikawasak na ng eardrum ko sa laki't lakas ng boses ng aming presintor, kala mo'y nagagalit. Dahil first timer kami, sa unahan kami pinaupo. Sa totoo lamang ay mas gusto ko pa sila Sir Nick ang nagtuturo, sakit sa teynga ang inabot ko maging ang ulo matapos ang therapy. Sana sa susunod na pagtungo ko roon at siya muli ang aming presintor, konting diin lang ng boses. May hitsura pa naman siya't kaputian. Sa pagod ay diretso tulog ako pagdating ng bahay at mga ikaapat na nagising. Kinagabihan at dahil di pa-expired ang load ay nakipag-text ako kay Leonardo't pilit kong binibilog ang ulo niya pero sa talino ba naman niya, hindi magawang maniwala. Tumawag ako't nagboses babae upang di mahalatang kaklase niya ito subalit patay pagkat nahalata niya, Gameover na ang pakikipaglaro sa kanya. Ng ma-expired, pagbabasa ng bibliya ang sunod kong inatupag. Sa ganda ng istorya sa bibliya, hating-gabi na ko nakatulog. Di naman makatulog pagkat naiisip ko siya’t sana’y magkita kaming muli.

April 15, 2014
Tuesday
Year II-105

^3y-v.  Martes santo, Mga ikaanim nq ako nagising subalit dahil nagugustuhan pang humilata sa kama ng kay tagal, malapit ng mag-ikawalo ng ako'y bumangon. Matapos humigop ng mainit na kape at gawa na tinamaan muli ako ng pagkabato'y naghugas ng plato. Pakiramdam ko'y ang sigla-sigla ko't animoy magagawa ang ibig gawin. Nang mahugasan at mailagay ang lahat ng plato, pagwawalis naman ang sunod kong inatupag. Maging sa kasulok-suluka'y hindi pinalagpas ang mga alikabok na nanonoot sa powers ng aking Walis tambo. Maski nga ilalim ng katre'y nagawa kong walisan at nagbuhat pa ng bagaheng inaagiw na sa tagal ng panahong nakaimbak. Halos bahingin ako ng sunod sunod ng malanghap ang mga alikabok. Di man lang ako nahapo matapos ang gawaing bahay at nagkumpyuter.

^3y-w.  Matapos magkumpyuter at dala na rin na kanina pa kumakalam ang sikmura'y nag-atubili ng magtungo sa mesa't lakas loob na nilantakan ang pagkain ng pagkarami-rami. Sa dami ng aking nakain, nakalimutan kong panahon pala ng pagtitika. Maya-maya’t dahil sarap buhay ngayong bakasyon grande, panonood ng telebisyon ang sunod kong inatupag. Magtutungo sana ako sa WAKI Therapy doon sa Novaliches bayan subalit katamaran ang pumigil sa akin at mas piniling magsiyesta na lang. Hindi naman makatulog ng lalim pagkat maalinsangan ang panahon kahit tago ang araw kaya agad na kong bumangon at nagtungo sa computer shop.

^3y-x.  Halos tumindig ang balahibo ko sa tindi ng hilakbo ng mapanood ang horror movie na Art of Devil, mas masahol pa sa Imprint ang pag-torture sa taong pinapahirapan at karimarimarim din ang aborsyon sa kanilang bansa. Isang buwan nanaman akong hindi makakatulog at makakain ng maayos dahil sa nakakadiri't katakot katakot na eksena, maging mga nagkukumpyuter ay napatigil ang mundo ng makinuod sa video ko. Maingay nga lang kapag naghihiyawan at kwentuhan sila. Grabe ang paggawa nila ng production at masasabing parang totoo. Kung sa Pinas lang iyan ginawa, sa halip na parangal ang hakutin ay katakot takot na kontrebersyal, palibhasa'y hanggang katatakutan lang tayo.

 ^3y-y.  Naikwento ko kina Jaypee ang tungkol sa napanood ko subalit di ko natapos o nasimulan man lang pagkat may batang nakahubad at agaw eksena sa mga nagdaraan. Pinagsabihan kong magsuot ng salawal at kita na ang ari niya pero binastos niya ko kaya ako'y na-badtrip. Habang naglalakad pauwi'y saktong nakasalubong ko sila Regine atAnnie. Todo udyok sa akin si Annie na samahan ko sila at sinamahan ko nga sila hanggang sa pag-uwi namin. Kahit wala pa sa bente'y matanda ng mag-isip si Regine pagkat marunong na siyang mamalengke. Laking pasalamat ko nga sa kanila pagkat inilibre nila ako ng Fishball at Kikyam. Sa kabusugan, kakarampot na lamang ang kinain ko sa hapunan sabay tutok ng mata sa telebisyon. Kahit kakapanood lang ng horror movie kanina, naging mahimbing pa rin ang pagtulog ko.

April 16, 2014
Wednesday
Year II-106

^3y-z.  Miyerkules santo na't biglang tumunog ang alarma ng aking telepono mga bandang Alas-sais y medya kaya nagising na ako. Masarap pang matulog na walang inaalala o pinoproblema kaya natulog pa ko't mga ikawalo na bumangon. Pagkabangon, kaagad akong naghugas ng plato't nagwalis-walis. Balak ko sanang lagyan ng pampakintab ang sahig subalit wala akong kwarta't isa pa'y pinagbawalan ako ni ina. Si Mama nama'y kanina pa nagdudumi kaya labis ang pag-aalala ko sa kung anong kanyang kahihinatnan. Matapos malinis ang sahig, pagbabasa ng bibliya ang sunod kong inatupag. Napaluha ako ng bahagya habang binabasa ang bibliya pagkat nakaka-touch ang mga nilalaman at kapukaw-pukaw sa damdamin. Pagbabasa ng bibliya ang ginawa ko bilang penitensya na rin ngayong Semana Santa hanggang sa magtanghali.

^3z-a.  Walang maulam kaya naisipan kong magluto kaso ng tikman ko ang Sardinas, di kasarapan at marahil ay di pa ko bihasa sa pagluluto. Habang ako'y naliligo ang biglang pagkatok ni ina sa pintuan. Duming dumi na siya't di na kayang pigilan pa kaya walang anu-anung binuksan ko ang pintuan at pinapasok siya. Pansamantalang naantala ang aking paliligo't nakita ni ina ang maselan kong katawan. Bigla akong inantok matapos maligo at kahit di pa natutuyo ang buhok ay nakatulog na ko. Sayang lang at ilalaan ko sana sa pagbabasa ng bibliya ang oras sa pagsisiyesta. Mga ikaapat na ko nagising at bago magtungo sa bahay ng kaibigan ay naghugas muna ako ng plato. Maya-maya’y umalis na ko't sa bahay nila Cathy ko naisipang magtungo. Si Cathy at Janna lamang ang nadatnan kong nakatira't labis ang paghalakhak sa panonood ng Meteor Garden.

^3z-b.  Tama si Cathy pagkat iba na talaga ang mundo ngayon, yung tipong mas masahol pa kaysa dati kaya masahol na rin ang pagdating ng mga kalamidad upang ipamulat sa atin na kailangan ng magbago, marahil ay mangilan ngilan na lamang ang may mabubuting loob at karamihan sa atin ay natuto ng suwayin ang utos ng Diyos katulad ng huwag kang papatay at magnanakaw subalit sa panahon ngayo'y talamak na. Marami pang bagay na kadalasan tungkol sa nasusulat sa bibliya ang napag-usapan namin kaya inabot na ko ng gabi. Di pa naman malalim ang gabi kaya naisipan ko pang magtungo sa bahay nila Tita Arlene subalit habang nasa daan ay biglang nagbago ang isip ko't mas maiging umuwi na lang. Matapos manood ng telebisyon, pinagpuyatan ko ang pagbabasa ng bibliya. Hindi naman ako makapag-concentrate sa pagbabasa pagkat samu't saring bibig ang mauulinig kahit sumapit na ang Alas-dyis. Sa kusina ko ipinagpatuloy ang pagbabasa at dinig ko ang himig ng nagpapasyon.

April 17, 2014
Thursday 
(Maundy Thursday)
Year II-107

^3z-c.  Huwebes santo, sa hinaba-haba ng kwentong nabasa ko sa bibliya simula ng ipanganak si Jesus hanggang sa panahon na ipako siya sa krus, mga ikalawa na ng madaling araw ko iyon natapos. Magaan at para kang nasa langit kapag nagbabasa ka ng bibliya at naramdaman ko iyon sa aking pagtulog, isa pa'y napakaraming aral akong natutuhan. Ang mataimtim na himig ng pasyon ang gumising sa akin, Alas-siete pa lamang at kaagad na akong nagwalis at naghugas ng plato. Sa kagustuhang maging makintab ang sahig ay lumabas pa ko upang mamili ng floorwax. Ilang tindahan na ang napuntahan ko subalit walang ni isang floorwax akong nabili. Matapos ang gawaing bahay at dahil malungkot ang araw ko kapag walang pinagkakaabalahan, naisipan kong magkumpyuter.

^3z-d.  Sa pagsapit ng tanghali ang kakaibang init na aming naramdaman at tila dumaranas na kami ng katakot takot na pinetensya, sa init na hatid ng araw ay walang mangahas na manatili sa labas. Bukod sa mainit, naging maingay rin ang kapaligiran dahil sa Karaoke ng kapitbahay at ligalig ng mga bata, tuloy ay di naging masarap ang pagtulog ko. Tinamaan muli ako ng pagkabato ngayong Semana Santa kaya naisipan kong magpa-load at tumawag kay Tita Susan. Hindi naging kagandahan ang takbo ng signal kaya madalas ay naaantala ang masarap naming pag-uusap. Bukod sa pagtawag, naging libangan ko rin ang pakikipag-textmate at maigi na ring minsang may kausap ka through cellphone ng sa ganun ay mapaunlad mo pa ang iyong sosyal na aspeto.

^3z-e.  Nainis lang ako ng kaunti kay Jessa pagkat laging dinadahilang busy siya, marahil ay ayaw makipag-textmate sa akin. Ganoon naman siya na kala'y wala kaming pinagsamahan at ang bilis naman niya makalimot. Si Leonardo naman, kahit pinaglaruan ko'y pinatawad pa rin niya ko ng humingi ako ng tawad at bukas ang puso niya sa kahit anong sabihin ko. Kaso ay saglit lamang kami nagkausap pagkat kaagad na-expired ang load niya. Maya-maya’y nanood ako ng telebisyon. Tama siya, kahit ano pa man ang katangian at panlabas mong kaanyuan na di katanggap tanggap sa paningin ng iba, maging bukal ka lang at patunayang ikaw ay karapatdapat, tiyak na matatanggap ka nila kahit ano ka pa. Ituloy mo lang kung anong mithiin mo, basta't siguraduhing wala kang pusong nasasaktan at di mo nalalabag ang utos ng Diyos.

April 18, 2014
Friday 
(Good Friday)
Year II-108

^3z-f.  Biyernes santo at araw ng paggunita sa pagpapasakit ni Jesus. Sadyang napakadakila ng ating Panginoon sapagkat naging napakalupit man sa kanya ng sanlibutan, nagawa pa rin niyang tubusin ang ating mga pagkakasala at tunay siyang tagapagligtas. Malapit ng mag-ikapito ng umaga ng ako'y magising. Habang naghuhugas ng plato'y pansamantala akong tumigil ng makita ang prusisyon. Sa kada istasyon sila nanahan upang magdasal at lahat sa mga kasama'y nakayapak ang paa na di alintana kung anung matapakan at mahaba ang lakaran kahit tirik ng husto ang araw bilang pakikiisa sa paghihirap ng Panginoon. Mukhang napakatahimik ng kapaligiran ngayong Biyernes santo't bawal muna ang malalakas na tugtog, ang kailangan lang ay magnilaynilay at pagsisihan ang lahat ng kasalanan.

^3z-g.  Maya-maya, habang nakaupo't may ka-textmate ay bigla akong inutusan ng ate na bumili ng kape. Kahit may sama pa ng loob dahil sa sinabi niyang di mawala sa isipan, sino ba naman ako upang tumanggi kaya pumayag pa rin ako subalit di pa nga lubusang nagkakaayos ay may panibagong hidwaan ang namuo sa pagitan namin. Pinagtaluhan namin ang sukli at akala'y niloloko siya pero ang hirap sa kanya, hindi siya marunong makinig sa paliwanag ko't agad tumatalak kaya pagkabwisit muli ang naramdaman ko sa kanya. Ang dapat sanang araw ng katahimikan at maging mataimtim ang buhay dahil Biyernes santo, naging maingay dahil sa aming pagtatalo. Kaagad naman naayos ng mabayaran ko ang utang kay Ate Melon, sobra pala ang sukli. Wala muling maisipang pagkaabalahan at ako'y batong bato na kaya kahit di oras ng pagpapakasasa'y nilibang ko ang sarili sa paglalaro ng Tablet.

^3z-h.  Abot langit ang ngiti sa dibdib sa pagkahumaling sa paglalaro ng Tablet subalit pansamantalang naantala ng utusan ako ni Papa na bumili ng Longanisa. Bawal ang karne tuwing Semana Santa at yari pa naman sa karne ang Longganisa kaya walang nagtitinda, wala tuloy akong mabili kaya kahit sakit na sa ulo ang sinag ng araw ay napalayo pa ko, maibili ko lang ang pinapabili ni ama subalit umuwi akong walang dala. Iginiit ng papa na may mabibiling Longanisa kaya't sige sugod siya sa ilalim ng arawan pero Imbutido naman ang naiuwi niya. Habang papalapit ang tanghaling tapat ang umiigting na init na aming nadarama. Kinahapunan, nagtungo ako sa bahay ni Auntie Caling. Nandoon na si Uncle William subalit tulog raw ang Auntie Caling kung kaya't si Tita Haydie ang nakakwentuhan ko.

^3z-i.  Maya-maya’y umakyat na kami ni Tita Haydie at komportableng higaan ang kanilang kama sa ayos at lambot. Bukod pa dun ay akmang akma ang kulay ng pintura sa background ng kwarto. Gising na si Auntie Caling kaya nakipagtsikahan kami kasama pa ang asawa ni Tita Haydie. Subalit di ko man lang nasilayan sina Mervin at Nathan, marahil ay mahiyain at nadudungong magpakita sa bisita. Nanitili pa ko sa kanila hanggang sa mag-ikalima, di ko pa ibig manatili muli sa sariling tahanan at gusto pa ng kakwentuhan kaya sa bahay nina Tita Arlene ko sunod na dinalaw. Magbahay-bahay din kapag may time. Si Tita Arlene lang ang nadatnan ko't wala si Jaypee at Gio, nag-usap kami.

^3z-j.  Maya-maya pa'y biglang dumating sina Tita Gladys at siya naman ang nakakwentuhan ko, naaantala lang dahil sa kakulitan ni Jambo. Madilim-dilim na ng makauwi sa bahay at saka pa lamang naghapunan. Naibigan ko ang istorya sa Maala-ala mo kaya pagkat hinggil iyon sa dalawang matanda na matindi kung magmahalan. Kahit na may sakit na sa pag-iisip ang asawa niya at mawala, di pa rin niya ito nagawang talikuran at di sumuko sa paghahanap. Napatunayan nila na kahit magka-edad man sila't magkaroon ng sakit o problema, di iyon sapat upang matibag ang kanilang pagmamahalan, sobrang na-touch ako ng sa aking napanood. Bago tuluyang mahimlay sa kamang kay lambot, nagbasa muna ako ng bibliya. Natapos ko na ang isangbook ng bibliya at gawa na di pa dinadalaw ng antok, nakinig muna ako ng awiting pangkristiyano. Lagpas hating-gabi na ako nakatulog ng lubusan.

April 19, 2014
Saturday 
(Black Saturday)
Year II-109

^3z-k.  Sabado de Gloria at malapit ng mag-ikawalo ng ako'y magising at diretso ligpit ng pinaghigaan. Matapos mag-almusal, pagbabasa ng dictionary ang inatupag ko hanggang sa mag-ikasampo. Maya-maya’y nagkumpyuter na ako, habang abala sa pagkukumpyuter ay muli akong dinakdakan ni ina at di ko sukat malaman kung bakit pati pagkukumpyuter ko'y kailangan pa niyang pag-initan, marahil ay may dalaw muli kaya badvibes ang araw niya. Inintindi ko na lang siya't di nagawang sagutin. Paano hindi iinit ang ulo, kung ang panahon ay saksakan ng init na di na makaya ng balat at kulang na lang ay matusta na. Kahit nasa labas ka na't nagpapahangi'y di pa rin mawala ang init sa katawan.

^3z-l.  Maliligo sana ako subalit nagsisimento ang Papa sa palikuran kaya sa labas ako naligo. Hindi na bale kung makita ng mga nagdaraan ang katawan ko at pagtsismisan, ang mahalaga'y makaligo ako't maging presko ang katawan. Matapos maligo'y nagtungo ako sa computer shop. Tahimik sa mga unang minuto na ako'y umuupa subalit habang lumilipas ang sandali'y ang unti-unting pag-ingay na halos ikabingi ko na kahit naka-headset na. Kumpol-kumpol pa man din at karamihan ay nakikiusyoso lang kaya naging pahirapan sa akin ang lumabas. Dumeretso kaagad ako kila Amihan. Si Itang at Lola Tinang lang ang nadatnan ko na abala sa pagtatahi.

^3z-m.  Naparaming naikukwento sa akin ng lola kaya siya lang ang kausap ko ng panahong iyon. Ilang sandali pa'y dumating na sila Amihan. Sa sarap manatili sa bahay nila't manood ng telebisyon pagkat di gasinong mainit, madilimdilim na sa labas ng makapagpaalam ako sa kanila. Habang naglalakad pauwi'y saktong nakita kong may nagtitinda ng pocket book sa murang halaga't nagtingin-tingin muna ako. Wala akong pambayad kaya ipinareserba ko muna ang napiling libro. Matapos ay sa bahay nila Cathy ako nagtungo subalit tulog na ang mga ito. Nagpasyang umuwi na lamang. Di pa ko inaantok nun kaya naisipan munang mag-soundtrip. Mga Alas-onse at dahil may Easter vigil, binuksan ko na ang telebisyon. Hindi pa ko nakatulog nun at sinalubong ang Pasko ng pagkabuhay ni Jesus.

April 20, 2014
Sunday
(Easter Sunday)
Year II-110

^3z-n.  Muling pagkabuhay ng ating panginoon at hudyat ng pagwawakas ng pamamanata. Kita ko na ang liwanag sa labas kung kaya'y karakaraka na akong bumangon at humigop ng mainit na kape. May balak akong maglaba ngayong araw kaya matapos hugasan ang mga platong nakatambak ay agad akong naglaba. Wala pang tanghaling-tapat subalit sakit na sa balat ang init ng araw subalit pinagtiyagaan ko iyon matapos lang ang paglalaba't kahit paano'y ikatuwa ako ni Ina. Sa dami ng aking nilabhan at sa ilang ulit na banlaw, naubos ang buo kong lakas at matinding pagod ang inabot ko kaya saglit na nagpahinga. Maya-maya’y nanood ako ng telebisyon. nakakapamangha ang mga eksperimentong ipinapakita nila sa Believe it or not at mukhang di kapanipaniwala ang naging outcome. Labis akong na-elib sa palabas na iyon.

^3z-o.  Ilang sandali pa'y oras na upang mananghalian. Kainis lamang sa lagay ng panahon pagkat ang kaninang maaliwalas ang panahon bahagyang kumulimlim at nagbabadya pang umulan, di ko batid kong matutuyo ba agad ang aking sinampay. Habang ako'y nagsisipilyo, laking gulat ko ng sabihin ni Ate na kanya raw ang pinangsipilyo ko. Kung siya nagmamay-ari dapat noon pa lang ay ipinabatid niyang siya ang nagmamay-ari, hindi yung kung kailan gamit na gamit ko na't halos mapudpod na. Dahil lang sa sipilyo kaya nagtalo muli kami't katatalim ng kanyang sinasambit kaya hirap ko siyang irespeto, malabo na nga kami ay magkaayos. Tumigil lang ang aming hidwaan ng umalis siya. Basta’t sa aking pagkakaalam ay akin ang sipilyong iyon at paano magiging sa kanya. Dala ng antok kaya nag-siyesta muna ako subalit anung init ng panahon kahit kumulimlim kaya hirap ako sa pagtulog.

^3z-p.  Ang oras ng kagipitan, isiping panapanahon lang iyan at balang araw, may ginhawa kang malalasap kaya kailangan ng tiyaga. Pagkagising ay nagtungo ako sa bahay nila Regine (Miano). Nadatnan kong may nagkakaraoke't sige sa tagay ang mga lasenggero, ipinagdiriwang pala ni Baby Gian ang kanyang kaarawan at nakalibre ako sa meryenda. Naging marami ang kanilang bisita't nandoon rin si Annie at Gelyn. May kaunting hiya akong nadarama kaya karampot lamang ang aking nilantakan sa kanilang handaan. Matapos kumain ay naupo ako kasama ng mga nagkakaraoke. Habang nakaupo'y may isang binatilyong bago lang sa aking paningin at panay pangti-trip ang ginawa sa akin. Bagwis pala ang pangalan niya't nabwisit ako sa halip na matuwa sa kanya pagkat nanghihipo ito, maski nga pang-ibaba ko'y di nakaligtas sa kamay niyang napakalibog at dinakma ng husto.

^3z-q.  Naumbagan ko siya upang layuan ako pero hirap niyang paalisin kaya ako na mismo ang umalis. Si Annie at Gelyn nama'y panay ang pangbubulyaw sa akin at sinabing may pagtatangi ako sa kanya, kadiring pag-ibig at kailanman kahit maging babae ako'y di ko siya type, di naman siya kakisigan at hugis butiki pa ang mukha niya! Sa oras na magtatabi kami ni Bagwis, paulit-ulit niya kong nababastos. Tumigil naman siya kinalaunan ng makitang sisirit na ang mukha ko sa galit. Kahit di pinagpala ang boses, nagawa ko pa rin kumanta't hiyawan sila. Habang lumilipas ang oras ang unti-unting pagdami ng bisita kaya wala na akong maupuan.

^3z-r.  Pagkatayo ni Bagwis ay palihim kong kinuha ang silya subalit paghakdaw niya'y saktong nabagok ang ulo niya sa pader, kahit naimbyerna ako dahil sa kanyang kamanyakan, nag-alala ako't di ko ginusto ang nangyari sa kanya. Buti na lamang at di gasinong kalakas ang pagtama ng ulo niya sa pader kaya di naman nabarag. Baliw lang si Bagwis pagkat siya na nga muntikang madisgrasya, siya pa humingi ng tawad. Kung nagkataong matuluyan siya, matinding problema ang kakaharapin ko't di ko mapapatawad ang sarili. Bumirit pa ko ng dalawang kanta bago umuwi. Habang naglalakad pauwi'y saktong kinausap ako ng Lola ni Kaka at sinabing magpapa-tutor raw ang apo niya bukas. Pagkakataon na itong muli upang magkapera kaya agad akong pumayag. Dahil sa kabusugan, hindi na ako nakapaghapunan pa pagkauwi.

April 21, 2014
Monday
Year II-111

^3z-s.  Ngayong araw ipinagdiriwang ng ang aking butihin at mapagmahal na ama ang kanyang ika-60 kaarawan at masaya ako pagkat nakaabot pa siya sa ganong edad. Hindi ko lamang mabatid kung may handaan ba mamaya pagkat sa aking paggising ay mukhang nagkakairingan si Mama at Papa na di ko lubos maisip kung anong bagay ang naging mitsa, tumahimik lang ako habang umiinom ng mainip kape. Panay ang pagtalak ni Ina na kahit sino'y walang makakarinig at dinig ko iyon kahit nasa sala't nasa kusina sila. Matapos humigop at mapaso ang lalamunan sa mainit na kape, naghugas ako ng plato at nagwalis-walis na rin. May pinag-usapan kami ng lola ni kaka tungkol sa tutor kung kaya nagtungo kaagad ako sa kanila subalit ipinabatid sa akin ng kanyang lolo na wala sila, ayaw ko pang umuwi't nagtungo pa ko sa bahay nina Regine at nakipagtsikahan.

^3z-t.  Mga ikasampo na ako nakauwi't sinabihan ako ni Mama na samahan ko raw ang ate sa pagbili ng panghanda. Tekang hindi kami magkaayos ng Ate at batid kong matitikman ko ang kanyang pagmamataray kapag kami ang nagsama kaya sa loob ko'y di ako makakapayag at bahala siya. Kung di lang siya masungit sa akin, mabilis pa sa guhit ng kidlat ang pagpayag ko subalit sadyang napakagaspang ng ugali niya't kung pagsalitaan ako'y parang di niya ko kapatid. Inaamin kong may pagka-swapang rin ang ugali ko subalit marunong akong makiramdam di tulad niya na walang pasintabi sa kung anong mararamdaman ko kapag nakakapagsalita siya ng masasakit. Nang ako'y tinawag ng ate't sinabihang samahan ko siya, kaagad kong pinatay ang telebisyon at nagkunwaring natutulog. Walang sapilitan kung ayaw ko siyang samahan pero pinilit ako ni Mama't ginigising. Di ako nagpadala sa pagpupumilit ni Mama at ako'y nagtulog-tulugan.

^3z-u.  Mas gugustuhin ko pang hindi kumain ng pizza kaysa makasama siya, may sinabi pa si ina at binalaan huwag raw akong kakain pero di ko na iyon inintindi. Kahit di pa antok ay nakatulog ako hanggang sa kanilang pagdating. Kahit sarap sila sa paglantak ay di ko man lang ninais na hawakan at isubo sa bibig subalit laking tuwa't gulat ko ng alukin ni ina na kumain na ako. Napakabait nga ni Ina kahit tagus sa dibdib kung magsalita at pinayagan pa rin akong kumain kahit di ko sinamahan ang ate. Sa dami ba naman ng Pizza na dalawang kahon tapos may fried chicken at palabok pa, di kayang ubusin iyan ng apat na katao lamang. Matapos kumain, tamang Selfie lang. Maya-maya'y kinumbida ni Mama si Ate Let at nakikain sa handaan. Labis akong nabusog sa dami ng kinain. Bukod sa ipinagdirawang ni Papa ang birthday, may isa ring kapitbahay ang nagdiriwang kaya naging maingay ang mundo namin sa kanilang videooke.

^3z-v.  Dahil may bata pa akong tuturuan, kahit kainitan ang sinag ng araw sa kagustuhang kumita'y nagtungo ulit ako sa bahay ni Kaka. Sinabi ng lola na bukas na raw at pagod daw sila. Matapos naming mag-usap ay nagtungo ulit ako kila Regine. Sina Regine at Shiela lamang ang nakatira kasama ang anak at asawa pagkat lumipat na sina Aling Gina. Hindi na ko nagtagal at saglit lamang ako. Pagdating sa bahay ay nanood ako ng Meteor Garden subalit di ko marinig ang aking pinapanood pagkat ang ingay ng kanilang karaoke, bukod sa ingay ng karaoke ay maingay rin ang mga bata. Sayang at nakakakilig na may halong katatawanan ang bawat eksena.

^3z-w.  Sumapit na ang gabi subalit saksakan pa rin ang ingay sa kapaligiran at halos ikarindi ko na, gusto ko na ng katahimikan kaya umalis ako't kina Jaypee ko naman naisipang magtungo. Kasama ang kanyang kabarkada’y nagkakatuwaan sila't sadyang napakaloko subalit sa halip na mapikon ay natuwa pa nga ako, ang ingay tuloy namin. Bahagyang tumahimik ng umalis sila't nakanood ako ng paboritong programa ng matiwasay, kung sa bahay lang ay malamang di ko madinig ang pinapanood sa ingay. Nandoon rin si Jambo na sadyang napakaharot at panay dila sa aking hita. Maya-maya’y dumating na si Tita Arlene galing trabaho't kami'y muling nagkwentuhan. Sa sarap ng aming kwentuhan, di ko namalayang ilang minuto na lang bago mag-ikasampo kaya kinailangan ko ng umuwi't baka mabagansiya. Di pa rin nagbabago ang ingay ng kapaligiran dahil sa kapitbahay na nagkakaraoke, pilit na lang iniintindi pagkat may nagbebertdey. Bahagyang tumahimik makalipas ang ilang sandali kaya natulog kaming payapa't walang bumabagabag.

April 22, 2014
Tuesday
Year II-112

^3z-x.  Ilang araw na lamang bago sumapit ang napakahalaga't di malilimutang araw at iyon ay Reunion ng aming buong angkan na gaganapin sa Sabado doon sa Batangas kaya labis na ang aking pagkasabik. Dati’y wala lang sa akin kung may Reunion ang kaibigan o kaklase ko pero di ko inasahan at hiniling na sa isang iglap ay mangyayari. Kaso’y kami lang ni Papa at Kuya Al ang makakadalo at di makakasama si Mama at Ate, pamatay saya talaga ang Mama kahit kailan. Kahit gustuhin kong magising ng umaga na tipong di pa nasilip ang haring araw pero tirik na ang haring araw pagkadilat ko. May pagmamadali akong nag-almusal at ginampanan ang gawaing bahay sapagkat may tutorial pa ko. Hindi ko ipinabatid kay Mama na may bata akong tuturuan pagkaalis at lihim akong umalis. May konting pagkamuhi akong nadama ng sabihin ni Kaka na bukas na raw pagkat may pupuntahan daw ito.

^3z-y.  Sa aking pakiwari'y inuulol na nila ako't marahil ay nagdadahilan lamang, pwede namang sabihin na huwag ng magpaturo kung ayaw, hindi yun laging pinapaasa ako't pinapapunta sa wala. Kapag bukas at nag-alibi muli ang Kaka, kahit dumanak pa ang dugo sa pagmamakaawa'y magmamatigas ako. Mabait ako subalit masama ang ugali ko sa taong mapang-abuso. Buti na lamang at inirekomenda sa akin ni Ate Nene na magpaturo ang anak niya, masaya ako pagkat may kwenta ang pagpunta ko sa Recrap at kaagad na kaming nagsimula.

^3z-z.  Si Regine nama'y ginigiit niyang bente na lamang ang singil ko sa isang oras at kinatwirang kaibigan ko naman sila at pumayag naman ako, alang-alang sa ikakatuto ng batang si Juniel, subalit matapos kong turuan si Juniel sa pagsusulat ay trenta pa rin ang naibigay sa akin. Kahit matindi na ang sikat ng araw ay dumeretso pa rin ako sa nagbebenta ng pocket book at ipinangbili ko ang aking kinita. Sa kapal ng librong aking binili'y mukhang aabutin ako ng isang linggo sa pagbabasa't ilalaan ko ang natitirang araw ng bakasyon sa pagbabasa hindi sa paglalakwatsa. Kaagad na akong naligo pagdating sa bahay at di pangkaraniwan ang init sa labas. I think the centegrade of temperature is increasing again and it feels like the human body who suffer from convulsion, thus I cannot handle that record-breaking temperature anymore.

^4a-a.  Kahit matindi ang init sa labas na tipong malaimpyerno at nagreresulta ng matinding dehydration, nakatulog pa rin ako't mga ikaapat na nagising. Katamad gumala kaya panonood na lamang ng telebisyon ang aking inatupag hanggang sa kumagat ang dilim. Upang matuto pang magsalita ng ingles, nagbasa muna ako ng dictionary bago matulog. As my younger age than right age, I have a determination and to become proficient in English speaking. Also to get away from embarrassing by someone if I have a statement infront of them. No matter if my grammar is wrong, the important is I tried and they understand what I’ve said. Napa-ingles ako dun.

April 23, 2014
Wednesday
Year II-113

^4a-b.  Sa kadahilanang inabot na ko ng hating gabi sa kakabasa ng English dictionary, tirik na ang haring araw ng ako'y dumilat at kaagad nag-almusal. Matapos mag-agahan, sinimulan ko ng basahin ang pagkakapalkapal na pocket book alang-alang sa aking ikakatuto. English ang nakasulat kaya malamang ay halos lumuwa ang utak sa kakaintindi subalit binasa ko pa rin. Kahit di gasinong naunawaan ay nagandahan ako sa kwento't parang binuhay niya ang natutulog kong damdamin. Sa sobrang abala sa kakabasa, hindi ko namalayang tanghaling tapat na at dahil dun kaya ako ginutom. Ipinagpatuloy ko ang pagbabasa matapos mananghalian at habang tumatagal ay nagiging intense ang takbo ng kwento.

^4a-c.  Maya-maya’y tinamaan na ko ng antok subalit di ako panaig at ipinagpatuloy ko pa rin ang pagbabasa. Sa kapal at dami ng nakasulat, wala pa sa kalahati ang nababasa ko kahit halos anim na oras ng nagbabasa. Mahaba na rin ang buhok ko at bukas na rin ako magpapakuha ng litrato para sa ID picture kaya nagpagupit ako, ang sagwa sa paningin at mukhang Ex Convict kapag makapal ang buhok. Sa barbershop na di hamak na mas malapit sana ako magpapagupit ngunit wala doon ang barbero kaya napalayo pa ko at kay Mang Usman nagpagupit. Napapansin kong mukhang tahimik si Mang Usman at di palakwento na dati'y ginagawa niya kapag nagpapagupit ako sa kanya, marahil ay may pinagdaraanang pagsubok subalit nagkamali ako't naging makwento siya kinalaunan. Kaya ako humaling at naeenganyong magpagupit sa kanya pagkat makwento siya't marami akong bagay na nalalaman sa kanya.

^4a-d.  Matapos magpagupit, dumeretso na ako sa nagbebenta ng pocket book at namili. Hindi ko alam kung anong pumapasok sa kukote ko at bakit bumibili ako ng napakakapal na pocket book ngayon na di naman ako palabasa. Sa kapal ay di ko batid kung babasahin ko ba iyon lahat at kung sinisipag lang, malamang ay matatapos ko nga. Dahil sa may kapitbahay na nagdiriwang ng kanyang kaarawan, maingay muli ang paligid dahil sa karaoke. Kahit saksakan sa ingay ang karaoke'y ipinagpatuloy ko pa rin ang pagbabasa. Sa haba ng istorya'y mukhang malabo kong matapos ngayong araw at tinamaan na ako ng antok. Umidlip ako pansamantala at pagkagising ay nanood ako ng telebisyon. Labis kong ikinagigil ang palabas sa Mirabella pagkat porket naibaba lang ang kutis ng balat niya'y may lakas loob na silang apihin ito at pagkatuwaan.

^4a-e.  Naiinis ako sa taong mahilig manghamak sa kapwa niyang kakaiba at di dapat sila pinagpapala bagkus ay turuan ng leksyon! Sabi nga sa kanta, kung sino ang mapagmataas ay siyang nadudulas at ang mabababa ang siyang itinataas. Kung anong ginawa nila sa kapwa ang siyang dadanasin nila sa huli. Bilog ang mundo at babalik sayo yan kaya maigi ang mga inaapi pagkat umaasenso sa huli. Patunay nga na di basehan ang kagandahan sa panlabas na anyo kundi ang nasa loob nito. Maganda nga ang hubog ng Mangga kung pangit ang lasa, magugustuhan mo pa rin ba? Di tulad ng Durian na mabaho nga ang amoy, masarap naman pagdating sa lasa kaya isa ang prutas na iyon na patok sa panlasa ng masang Pilipino. Dahil sa antok, matapos manood ng telebisyon ay natulog na ko. Buti naman at tumahimik na ang kapaligiran.

April 24, 2014
Thursday
Year II-114

^4a-f.  Masarap pa sanang humilata ng lagay sa kamang kay lambot subalit ginising na ako ni Mama, may lakad pala kami kaya dali-dali na akong bumangon kahit inaantok pa at nag-almusal. Hinintay pa namin dumating sila Papa at Ate bago umalis. Pagdating ng Ate, saka pa lamang kami naligo at nagbihis, medyo namumuo muli ang kaba sa dibdib sapagkat baka ngayong araw ko na malalaman ang magiging kapalaran sa scholarship. Habang nabiyahe'y laking gulat namin ng biglang inilihis ni Manong driver ang daan at laking pangamba namin na baka mali ang nasakyan subalit sinabi ng manong na dadaan pa rin sa OLFU sa pamamagitan ng Lagro loob. Nawala ang aming pangamba ng may isang istranghera na aming kaharap ang nakausap.

^4a-g.  Maya-maya’y nakarating na kami sa Our Lady of Fatima University at kaagad kaming dumeretso sa admission office upang magpaturo ng discriptive subject. Sumunod ay sa Guidance na kami nagtungo. Habang papalapit ang yapak ko sa Guidance ay lalo pang sumidhi ang kaba sa dibdib at may pagkadungong nagtanong subalit sa susunod na linggo pa raw ang announcement para sa mga nag-take ng scholarship test, sana'y makapasa ako. Bago umalis ay nagpasukat pa ko ng unipormeng nayari na't mukhang sakto naman sa size ng aking katawan subalit mukhang kakailanganin ng sinturon sa pang-ibaba sa luwang nito. All white pa naman ang aking uniporme maging ang pang-ibaba kaya kailangan ng puspusang pag-iingat upang di madumihan.

^4a-h.  Sa halip na umuwi, nagtungo pa kami sa SM Fairview upang magpalamig. Naupo saglit sa foodcourt habang sige sa pagkuha ng litrato at maya-maya'y nagtungo kami sa National bookstore at naghalungkat at buklat ng mga aklat. May isang aklat akong naibigang bilhin subalit sa malaginto nitong presyo, hanggang tingin na lamang ako. Inabot kami ng isang oras sa National bookstore, gawa na kumakalam na ang sikmura, kinailangan ng lumantak. Sa sarap ng Lasagna Supreme, naparami ng husto ang aking nakain kaya naman hindi ako makakilos sa kabusugan. Namasyal-masyal pa kami ni Mama at maya't maya ang kain, masaya sa pakiramdam kapag nililibre ka ng mahal mo sa buhay, siyempre dapat lang pagkat obligasyon subalit di ko maiwasang maramdaman iyon. Sa kakapamasyal, bigla akong tinamaan ng antok. Antukin talaga ako kahit kailan. Ibig ko na sanang umuwi na subalit mukhang gusto pang manatili ng Mama sa mall at di nakakabigay ng lamig ang aircon.

^4a-i.  Napakainit na hangin ang sumalubong sa amin pagkalabas at habang naandar ang dyip pauwi'y halos ikaluto na ng balat ang init. Dala na kanina pa hinihikab sa kapaguran ay diretso tulog ako pagdating sa balay at malapit ng mag-ikalima ng magising. Pasalamat kami sa maylalang pagkat nagbagsak siya ng milagrong tubig.  Kahit panandalian lamang ay bahagyang naibsan ang init. Dalawang araw na lamang at malapit na ang reunion ng aming angkan kaya pinag-usapan kung sino ang maaring makadalo sa aking pamilya subalit di maintindihan ang desisyon sapagkat pabago-bago. Isasama sana ang Kuya Al sa reunion sapagkat sampung taon ng di nakakapunta sa Batangas subalit awa ang nagpabago sa aming isip pagkat namamanglaw ang Mama kapag mag-isa sa bahay.

^4a-j.  Sa huli'y kaming dalawa lang ni Papa ang tutungo. Gusto ko sana sumabay na kina Tito Lito upang malibre ang pamasahe subalit sinabi ni Ama na mag-commute na lamang. Nakakagimbal na may kasamang pagkapoot ang palabas sa Legal Wife ng makita ni Monica na nangangaliwa si Adrian at katakot takot na sakit ang kanyang naramdaman. Kahit wala pang kabiyak ay dama ko ang hapdi at kirot kapag may taong pinagkatiwalaan ka at akalang ipagtatangol ka pero lolokohin ka pala sa huli. Kaya minsan, mahirap ibigay ang tiwala kahit kaano-ano mo pa, mabuti na rin magpaiwan ang Mama sa bahay kaysa ipagkatiwala sa kaanak ang kagamitan sapagkat di natin alam kung anong takbo ng kanilang isipan at mabuti na ring mag-ingat kaysa magsisi sa huli. Maaga pang magigising bukas kaya matapos ang Legal Wife ay kaagad akong natulog.

April 25, 2014
Friday
Year II-115

^4a-k.  Sa sobrang pagkasabik ko para sa aming reunion magkakamag-anak ay di pa nagpapakita ang haring araw ay gumising na ako. Sa kabila ng saya't sabik na nadarama sa dibdib ay may lungkot rin sapagkat di makakasama sila Mama at Kuya Al at kaming dalawa lamang ng Papa ang tutulak sa Batangas. Malapit ng mag-ikawalo ng makaalis kami ng bahay. Pagdating sa terminal ng bus ng ALPS, libre ang Wi-fi kaya pag-i-internet ang inatupag ko para iwas inip habang di pa nabiyahe ang bus. Inabot ng mahigit isang oras bago bumiyahe ang bus at mga ikalabing-isa na ng umaga ng makarating kami sa San Juan. Bago magtungo sa bukid ay bumili muna kami ni Papa ng pasalubong o di kaya'y pang-ilang araw naming pananatili sa Batangas.

^4a-l.  Pagkasakay ng dyip ay may kamag-anak akong nakasabay at nakipagkwentuhan, mukhang kakikitaan sa mukha nila ang pagkasabik sa muli kong pagbabalik. Pagdating sa bukid, si Tita Susan lamang ang nadatnan kong sayang-saya sa panonood ng telebisyon at wala doon ang mga pinsan ko. Maya-maya’y nagsidatingan na sila Harvey galing sa bahay ni Butchok at ang kaninang kalmadong nanalaytay sa buong bahay ay napalitan ng ingay dahil sa aming kwentuhang magpipinsan. Sa haba ng biyahe, tinamaan ako ng antok subalit di makatulog sapagkat maalinsangan, gayunpaman ay binuksan ko ang bentilador. Halos ikalaki ng dalawa kong mata ang malaking pagbabago sa bahay ni Lola pagkat ang dating yari sa patpat ang sahig ay de tiles na ang maapakan at maging ang inidoro'y na-upgrade rin, mula sa pabuhos buhos ata pagbubuhat ng timba buhat sa tungaan ay de-flash na ngayon at dinaig pa ang aming palikuran sa ganda at laki.

^4a-m.  Parang sarap tuloy manatili ng matagal sa bahay nila Lola Trining at Lolo Hilarion at sayang ang kanilang pagpanaw pagkat di na nila iyon masisilayan pa ang malaking pagbabago sa kanilang bahay. Nakaramdam nga ng konting lamig dahil sa ihip ng bentilador subalit di pa rin makatulog gawa ng kaligaligan nila Harvey kaya bumangon na ako. Naupo sa isang sulok saglit at ilang sandali'y mag-isa akong lumabas upang gumala. Habang papaalis ay may nakita akong isang binatilyo na tila pamilyar sa aking paningin na nakaupo't nginisian ako, tiningnan ko ng maigi at si Lowell pala iyon. Bukod kay Lowell ay may kasama pa siyang bata na akala kong kapatid niya subalit pinsan pala at ipinakilalang Ampoy. Nagkamustahan kami at matapos ang pangangamusta'y itinuloy ko na ang paggala. Kahit daming nakahambalang na mga ligaw na patpat ay walang pag-iinaso ko iyon sinuong at naghanap na rin ng Saga subalit wala ni isang nakuha, bumalik na lamang ako.

^4a-n.  Maya-maya’y nagtungo ako kasama sina Angel, Lyka at Lowell sa tindahan ni Ate Nene at iyon ang nagsilbing meryenda namin. Sumapit na ang dapit hapon subalit ang init na nadarama'y walang pagbabago maging gabi. Matapos kaming maghapuna'y panonood ng telebisyon ang sunod namin pinagkaabalahan. Kaabang-abang ang palabas sa Ikaw Lamang at halos lahat sa aming nakatira'y talagang tutok ang mata sapagkat umaatikabo't kasukdulan na ang palabas. May balak sanang manood ng Legal Wife subalit kailangan ng patayin pagkat kanina pa raw. Sa telepono ni Lyka ko na lamang inantabayanan ang isang palabas na trending sa masang Pilipino. Ng antuki'y natulog na ako. Naging napakakomportable ng tulog ko kahit nasa sahig lamang kami.

April 26, 2014
Saturday
Year II-116

^4a-o.  Ang kagabing halos ikatigang na ng balat sa labis na alinsangan ng panahon ay kabaligtaran naman ngayong madaling araw na napakalamig, wala naman akong maipangkumot sa katawan kaya tiniis ko na lang ang lamig at namaluktot. Ganito pala kalamig sa Batangas tuwing madaling-araw. Dala ng antok, pansamantala akong naidlip at nagising dahil sa mga nag-uusap na mga matatanda. Dumating na pala sila Tita Cleo kasama ang Kuya Darrel kani-kanina lamang at halos ikaliyo ko ang masangsang na amoy, may dala palang Durian si Tita Cleo galing Davao. Maliwa-liwanag na sa labas kaya bumangon na ako at humigop ng mainit na kape. Matapos magkape ay naupo ako saglit sa napakakomportableng katre at nakinuod sa mga pinsan kong humaling sa panonood ngvideo na di naman maunawaan ang wika. Gawa na ako'y nababato, naisipan kong gumala.

^4a-p.  Sarap gumala kung mag-isa ka lang at dahil pook rural ay naging magandang pagkakataon upang gawin ang gusto pagkat walang makakakita. Kahit nakakapaso ang sinag ng araw at di na halos madaanan ang daan dahil sa mga nakahambalang na ligaw na patpat, nagpatuloy pa rin ako sa paglalakad. Ng makaramdam ng pagod, naupo ako pansamantala at pinagmasdan ang mamang abala sa pagkokopra, marahil ay pangunahing hanapbuhay ng Batangueño ang pagkokopra. Habang naglalakad pauwi ay saktong nakasalubong ko sila Angelle at mukhang may bibilhin, sumama ako sa kanila hanggang sa pagbalik.

^4a-q.  Mamaya na ang reunion naming mag-aanak kaya naman puspusan na ang aming paghahanda, maging Tito't Tita ko'y di na magkandaugaga sa pagluluto ng dadalhing panghanda. Maya-maya’y nagbihis na kaming lahat, kahit simple lamang ang gawang T-shirt para sa reunion ay doon ko naisip na espesyal ang araw na ito para sa amin at maging masaya at matagumpay sana ang pagdaraos nito. Isa pa'y pagkakataon din upang makilala pa ang ibang kaanak. Matapos magbihis ay siyempre nagtungo na kaming lahat sa Laiya at walang ni isa ang naiwan sa bahay. Pagdating sa mismong pinagdarausan ng reunion ay di ko akalain na ganun karami ang magsisipagdalo at di ko akalain na silang lahat ay kadugo ko. Sa dami namin, nagsiksikan na kami sa iisang cottage. Dahil katabi ang mala-asul na dagat sa paningin, sa halip na makipagkilala sa ibang kaanak ay tila inaakit akong maligo. Ilang saglit pa'y isa-isa kaming ipinakilala ng kanya-kanyang magulang at naging masigabo ang kanilang pagbati, pakiramdam ko'y isa ang araw na ito sa di ko malilimutan at very special ito. Karamihan sa mga pinsan kong ngayon lang nakilala’y may hitsura at likas marahil sa angkan namin ang magagandang katangiang maaring maipagmalaki.

^4a-r.  Matapos makipagkilala, nagsalo-salo na kami sa malaking kainan. Sa sarap ng mga putaheng nakahain, halos pumutok na ang sikmura sa kabusugan sa dami ng naiimbak sa tiyan. Matapos kumain, tumambay kaming magpipinsan sa beach sabay nag-Selfie. Habang nakaupo sa ilalim ng matinding sikat ng araw, bahagyang sumakit ang ulo ko. Upang mawala'y umidlip muna ako. Hinintay muna namin lumilim bago maligo sa dagat at ng lumilim, buong pagkatao akong nasabik sa pagtatampisaw sa dagat subalit di lahat ay nagsiluguan katulad nila Harvey, di ko alam kung bakit ayaw nilang maligo't masyadong KJ. Wala kaming ginawa kundi magsabuyan ng tubig alat sa isa't isa, kakatawa lang sa sarili pagkat di ako marunong lumangoy at dinaig pa ko ni Maymay.

^4a-s.  Matapos ang tatlong oras na pagbababad sa dagat, umahon na kami't nagbanlaw. Sa kadahilanang walang magawa, kanya-kanya kaming gawa ng kastilyong buhangin at di pa nakuntento pagkat gumawa pa kami ng mga patibong, mga loko kaming magpipinsan at baka may mapahamak subalit katuwaan lang naman. Ilang saglit pa'y tumulak na kami pabalik at habang nabiyahe'y di mawaglit sa utak ang masasayang pangyayari ng aming reunionat sana'y maulit pa. Sa dami ng nakain nitong reunion, mukhang isang buwan akong hindi kakain sa labis na kabusugan. Sa halip na maghapunan, nanood na lamang ako ng telebisyon. Maya-maya’y natulog na ako at katabi sa muling pagkakataon ang mga pinsan ko sa pagtulog.

April 27, 2014
Sunday
Year II-117

^4a-t.  Ang takbo ng panahon ay sadyang napakatulin, sintulin ng guhit ng kidlat kung kaya sa bawat minuto o kahit segundo lamang ay kailangang pahalagahan upang di ka mapag-iwanan at di magsisi sa huli. Daig ng maaga ang masipag at kung ito'y babalewalain ay baka mauwi sa salawikaing "Aanhin pa ang damo kung wala naman kabayo". Masarap pa sanang humilata katabi ng mga pinsan ko subalit kailangan ng bumangon upang sa ganun ay magkaroon ng maraming oras upang gawin ang gusto, huwag patamad tamad at palaging ilaan ang nalalabing oras para sa makabuluhang gawain. Matapos magkape, kasama ang Tita Sabel at Papa ay nagtungo kaming magpipinsan sa Ilaya upang manguha ng Mangga.

^4a-u.  Sa labo ng paningin kahit nakasalamin, muntikan ko ng masungkit ang bahay ng hantik, buti na lamang at hindi. Tulong-tulong kami sa pangunguha ng Mangga at ng makarami, buong lakas namin itong binuhat. Halos naubos ang lakas ko pagbalik ng bahay. Ang mga pinsan ko naman na hapong-hapo rin, walang ibang pinagkaabalahan kundi ang magkulwit ng kanya-kanyang Android Phone kaya nganga ako habang pinagmamasdan sila at walang sinabi ang cellphone ko sa kanila. Hindi bale, magkakaroon rin ako niyan at mas higit pa sa kanila, hindi naman masama ang mangarap at sana dumating ang araw na lahat ng aking pinapangarap ay matupad, hindi lang magkaroon ng sariling touchscreen nacellphone kundi ang umasenso ang buhay. Hanggang tingin at hiram muna ako. Sa bait ng mga pinsan ko, nakakahawak naman ako ng Android phone at nakakapaglaro pa nga.

^4a-v.  Iyon ang inatupag namin hanggang sa magtanghali. Sasama sana ako kila Papa pabalik ng Maynila subalit mas pinili ko pang magpaiwan at mamalagi pa sa probinsya ng ilang linggo. Sasama naman talaga ako kung uuwi na rin si Tita Susan. Hindi ko maiwasang malungkot sapagkat nababawasan na kami, itinulog ko na lamang ang kalungkutan subalit di ako makatulog ng ayos dahil sa kakulitan ng mga pinsan ko. Bumangon na ako, oras na pala upang busugin ang sarili sa tanghalian kaya kumain na ako. Dami ko na ring mga damit na tubal at sa takot na hubo't hubad na sa susunod na araw, wala akong ginawa sa maghapon kundi ang maglaba. Maganda naman ang sikat ng araw kaya malaki ang posibilidad na matutuyo kaagad ang sinampay. Papaalis na rin sila Harvey pabalik ng Maynila at dahil dadaan pa sila sa bahay ng Lola Natty, kaming mga magpipinsang maiiwan ay sumama sa gayak.

^4a-w.  Habang sila-silang matatanda'y masayang nakikipagdaldalan, kami naman ay nakatambay sa daanan at lahat ng bagay na makapa, bato man o bunot ay winawasiwas at binabato kung saan-saan at talagang wala kaming magawa ng mga oras na iyon, kanya kanya rin trip sa isa't isa at bawal ang mapikon, saya ang mamumutawi kapag andiyan sila Harvey at Kuya Darrel pagkat lakas nilang magpatawa subalit hindi iyon nanatili ng matagal pagkat umalis na sila. Ako ang pumalit sa kanila bilang tagapagbigay aliw at halos ikasakit ng tiyan sa hagalpakan, kahit abala sila Tito Lito sa di matapos na kwentuhan, di man lang kami naiinip sa paghihintay.

^4a-x.  Ilang sandali pa'y lumabas na si Tito Lito kasama ang Tita Connie, ang inakalang uuwi na subalit dumaan pa sila sa bahay ng Lola Pasing, muli nanaman kami naghintay ng matagal. Sila Lowell at Ampoy, naging libangan ang paglalaro ng basketball at kami naman ang nanonood. Maya-maya’y nagtungo kami sa tindahan ni Aling Nene upang maghalo-halo. Ang bait talaga ng pinsan ko dahil nilibre nila ako ng Halo-halo, sa yaman ni Lyka ay siya ang sumagot sa lahat ng bayarin. Sumapit na ang dilim subalit di pa lumalabas sila Tito Lito, upang di mainip ay wala kaming kapaguran sa hagalpakan at lampungan at marahil ay kami na ang bukod tanging masayang nilalang ng Batangas.

^4a-y.  Ang tagal nilang lumabas kaya nagpasya na kaming pumasok sa bahay ng Lola Pasing. Nagmano kami sa kanya bago dumeretso at ipinakilala. Maya-maya pa’y nagpaalam na kami sa kanila at umuwi na. Gawa na di pa ko dinadalaw ng antok ay inantabayanan ko pa ang pagbubukas ng Pinoy Big Brother all in. Ilang sandali pa'y dinalaw na ako ng antok subalit di naman makatulog pagkat panay ang hagalpakan ng mga pinsan ko, sa halip na sawayin ay nakisali na rin ako sa kanilang ingay at dami namin tawa kay Lowell. Sa ingay naming magpipinsan, parang di alintana kung may natutulog na. Maaga pa kami magigising bukas sapagkat tutulak pa sa Quezon upang makiisa sa pagdaraos ng Ika-40 araw na pagpanaw ng Tito Marino kaya kaagad na akong natulog.

April 28, 2014
Monday
Year II-118

^4a-z.  Sa sobrang sabik ko sa pagtungo namin sa Quezon, madilim-dilim pa lang at di pa man sumisikat ang haring araw ng ako'y magising. Di ko lang batid kong papayagan ako ni Tita Susan at kailangan ko siyang kumbinsihin. Lumipas ang ilang saglit ay maging mga pinsan ko'y gumising at bumangon na. Kaagad akong nagsipilyo at nagbihis matapos mag-almusal. Ang Tita Susanat Tita Mildred naman ay panay pagpipigil ang ginawa sa aming maggagayak at pinaalalahanang magiging mahirap lamang ang aming kalagayan kapag sumama. Sa ginagawa ng Tita Susan, di ko ibig na suwayin siya pero mukhang mapipilitan ako. Gayunpaman ang sabihin nila'y di pa rin nagbabago ang isip ko na sumama sa kanila. Wala naman sa akin ang dumanas ng hirap basta di nakakabato at masaya. Sa una'y mahirap pakiusapan si Tita Susan at kinumbinsi ko siya ng husto na payagan subalit ng papaalis na ang sasakyan ay di na nito nagawa pang magmatigas at isa pa'y nakabihis na ako't bitbit na ang bag kaya pumayag naman ito.

^4b-a.   Malapit ng sumikat ang haring araw ng umalis kami. Pansamantalang natigil ang biyahe pagdating sa pamilihang bayan doon sa Sariaya. Sa takot na walang makape pagdating sa bahay ng namayapangTito Marino'y nag-atubili na akong bumili. Kasama ko ang Tita Olivia sa pagbili ng kape at nagpalagay na rin ako ng karga sa aking telepono. Ng makapamili ng kakailanganing pagkain ay nagpatuloy kami sa pagbiyahe. Habang nasa biyahe, si Tita Olivia ang kakwentuhan ko ng mga oras na iyon at ang dami kong nalaman sa kanya tungkol sa aking mga kaanak. Dumagdag pa sila Meryll kasama ang kanyang kapamilya pagdaan namin sa Grand terminal doon sa Lucena at maingay nanaman si Lowell, parang pinagbiyak na bunga kung sila’y magsama ni Meryll.

^4b-b.   Halos ikabulahaw ng aking pandinig ang ingay nila Tita Olivia at Tita Lenny at parang di maubusan ng sasabihin, sila lang ang maingay sa kasagsagan ng biyahe. Sa hinaba-haba ng biyahe, malapit ng magtanghali ng makarating kami sa General Luna. Sa bahay ng Lola Sabe kami tumuloy pansamantala at nananghalian. Tama nga sila Tita Susan, talagang kapos sila sa tubig at kailangan pang mag-igib. Sa init ng panahon ay gusto ko ng maligo at isa pa'y ang lagkit ko na subalit wala akong magagawa kundi ang mag-antay ng madidilehensyang tubig. Ganito sila sa Quezon at waring mas mahirap pa sa Daga. Bukod sa walang tubig, wala ring bentilador kaya sumakit ang ulo ko sa init. Pasalamat na lamang kami at umulan pagsapit ng dapit hapon kaya nakalibre kami sa pampaligo ng di na kailangan pang mag-igib.

^4b-c.   Muli kong nadamhin ang pagiging malinis sa katawan matapos maligo at dahil wala ring mapag-abalahang panoorin, sa telepono ko sinubaybayan ang paboritong programa gabi-gabi. Kahit may kalabuan ang reception gawa na di kagandahan ang pasok ng signal, tutok pa rin ng husto ang mata ko. Di ko marinig ang aking pinapanood gawa na napakaingay ng mga mang-iinom lalo na si Lolo Kabakab at kung ano-ano ang kanyang nasasambit. Sa bawat salita niya'y palaging may katagang "Hoy" at rinding rindi na kami maging ang Lola Sabe. Sa lahat ng kanyang kainuman ay siya lamang ang bukod tanging malakas ang epekto ng alak. Matapos manood ng programa'y natulog na ako. Di naman ako makatulog dahil sa kaharutan nila Meryll at Lowell. Di ko malaman kung ano ang pinagkakaguluhan nila. Si Ampoy naman, nakapatong na ang kanyang paa sa aking tiyan kaya ako'y nasasaktan at anumang pilit alisin ay pinapatong pa rin, pano'y maliit at masikip ang kwarto kaya siksikan kami. Ang hirap ng karanasan kapag naririto ka sa Quezon pero ayos lamang pagkat ginusto ko ito.

April 29, 2014
Tuesday
Year II-119

^4b-d.   Madaling araw ng magising ako dahil sa lamig ng panahon. Buti na lamang at may nagbigay ng kumot sa amin kung kaya hindi ako namaluktot subalit pilit iyon inaagaw ni Ampoy kapag di ko nahihigpitang ibalot sa katawan. Nawala na ang antok ko at humiga akong dilat ang mata, hinihintay ang liwanag. Maya-maya’y nagising na ang kasamahan naming matatanda at nag-usap-usap. May iba lang sa intonasyon ng kanilang pananalita pagkat malalalim silang managalog at may punto. Saka lamang ako bumangon ng sabihin ni Tita Connie na bangon na. Hindi naging kagandahan ang ang umaga na dapat sana pagkat naubos lahat ng binili kong kape, wala tuloy akong makape at inisip ko na ang tao rito sa Quezon na kapag may pagkakataon, susunggaban kaagad at walang ititira, laking pagsisisi ko na nailapag ko pa ang kape sa lamesa, akala naman may ititira sila.

^4b-e.   Matapos kumain ng agahan ay pinapapunta na kami ni Tita Connie sa kapitbahay upang maligo subalit di kami naligong tatlo ni Lowell at mga babae lamang ang naligo. Pagdating nila Meryll galing sa liguan ay naupo kaming magpipinsan sa harap ng mumunting bahay na gawa sa pinagtagpi-tagping yero at patpat at nagkwentuhan. Si Lolo Isko naman ay kanina pang nakaupo at walang kaimik-imik, ulyanin na pala siya at lahat kami'y di niya makilalang lubos maski sila Meryll at Lowell. Nakaramdam ako ng habag sa tuwing makikita ang Lolo Isko pagkat madalas siyang nag-iisa na palakad lakad at walang kamuwang muwang. Maya-maya’y biglang naupo sa aking tabi si Tita Olivia at sa kanyang kadaldalan, lahat marahil ng kanyang naikkwento'y naipapasok ko sa aking isipan.

^4b-f.   Bukod sa madaldal, nakakatawa ang kanyang hagikhik pagkat malakas at paimpit pa. Si Meryll naman, walang ginawa kundi ang bumirit subalit sa oras na kapusin sa boses at pumiyok, asahan ang malakas na tawanan. Ganyan kami na walang maisip gawin at batong-bato. Habang ako'y sarap na sarap sa pag-upo at pakuyakoy ang paa, di ko inasahan na biglang bibigay ang silya't napadausdos ako sa sahig ng wala sa oras, buti na lamang at di gasinong matindi ang tinamo ko at nakakalakad pa rin. Dahil sa nangyari sa akin, parang wala ng bukas kung humalakhak ang mga pinsan ko. Tanghaling tapat na kaya't wala nanaman kapaguran sa pagpaypay, malamigan lang ang buong katawan. Malakas na rin ang putok ko sa kilikili kaya nagpasya na akong makiligo sa kapitbahay. Pagbalik ay nakita ko sina Meryll na nakaupo sa sasakyan ng Tito Lito, ngayong oras na pala kami tutulak sa bahay ni Tito Marino at sa dami ng mga kagamitang naisilid, naging pahirapan sa amin ang gumalaw.

^4b-g.   Kaagad kaming sinalubong ni Henson na sabik sa sariling mahagkan kami at naglaro kami ng batohang bola. Sa kakatakbo'y halos ikalupaypay ko na ang pagkahapo pero ayos lang basta't masaya. Nadaragdagan pa ang aming aliw dahil kay Red at sa bawat iutos sa kanya'y ginagawa niya ito, gayang gaya nga niya kung paano magsabi ng “Hoy” si Lolo Kabakab. Pagsapit ng dilim at habang nakaupo kaming magpipinsan sa balkonahe'y biglang sumugod sa amin ang sangkatutak na gamu-gamu't sadyang napakarami nila. Upang mapuksa lahat ng gamu-gamu'y pinatay lahat ng ilaw at nagsiga ang Tita Letty. Bahagyang nabawasan ang mga gamu-gamu kinalaunan. Maya-maya’y oras na ng hapunan at sa kabilang kubo ako kumain kasama sila Ate Ivy. Kahit ganito ang kanilang kalagayan ay may nasabi naman sila pagdating sa pagkain, ang sarap-sarap. Yaman at kasama ko na sila sa iisang kubo, sila ang kakwentuhan ko.

^4b-h.   Pakiramdam ko tuloy, di lang basta bisita ang turing sa akin pagkat marunong silang makisama at marunong makinig sa iyong sasabihin. Sa sarap ng aming pag-uusap, di ko namalayang ikawalo na ng gabi at oras na upang manood ng telebisyon sa telepono. Nakanuod naman ako ng paboritong programa sa pamamagitan ng kanilang telebisyon kaso may kalabuan. Nang dalawin ng antok ay nahiga na ako sa kanilang kamang limitado lamang sa lawak at malasardinas ang sitwasyon pagkat kami'y nagsusumiksik pero ayos na iyon na di tulad ng dati na sa kadahilanang walang mahigaan, kinailangan ko pang ihilera ang silya. Komportable na sana sa pagtulog ng makaramdam na tila ginuguyam ako, ginuguyam na nga ako't panay ang aking pagpapagpag.

April 30, 2014
Wednesday
Year II-120

^4b-i.   Madaling araw muli ng ako'y magising, sa aking paggising ay halos ikalagot na ng hininga pagkat nakapatong ang hita ni Meryll sa aking leeg at sadyang napakabigat nito, inalis ko nga ito't dama ko rin ang napakalamig na panahon kaya dahan dahan kong tinangkang kuhain ang kumot mula sa katawan ni Meryll kaso sa higpit ng pagkakayupos niya'y bigo ko itong maumit, namaluktot na lamang ako't taus pusong pinagtiyagaan ang ginaw. Naidlip ako saglit at sa muling pagdilat ay ako na lang pala ang bukod tanging nakahiga samantalang kumakain na ng almusal ang mga pinsan ko. Bumangon na ako't kaagad nagsandok ng pagkain. Ngayon araw rin idaraos ang ika-40 araw ng pagkamatay ng Tito Marino kaya naging abala sila Lola Anda sa pagluluto. Gusto ko sanang tumulong kay Lola Anda sa paghuhugas subalit sinabi sa akin na siya na ang bahala. Wala tuloy akong magawa't batong bato na ako, lilibangin ko nga ang sarili sa paglalaro ng cellphone subalit ito'y nagloloko naman.

^4b-j.   Buti pa ang mga pinsan ko, walang ibang inatupag kundi maglaro ng de-kulwit na cellphone ng walang pakialaman at kanya-kanya samantala ako itong nakatunganga at pinagmamasdan sila. Sa aming magpipinsan, ako marahil ang naiiba. Nahiga na lamang ako sa duyan at habang relax ako sa pagduduyan ang siya namang inaagaw ni Ampoy at guguluhin ka niya kapag di mo pinagbigyan. Dahil bata, ipinaubaya ko na ang duyan at nagmukmok sa iisang tabi. Nakapaglaro naman ako ng pahiramin ni Ate Mae ng kanyang dekulwit na cellphone kaso panandalian lamang pagkat na-deadbatt. Maya-maya’y umalis na sila Tita Letty kasama si Henson patungong bayan at kami-kaming mga Menor de edad na lamang ang naiwan.

^4b-k.   Kaagad naman bumalik sina Tita Letty at sa kanilang pagbalik ay dala nila ang maraming kaanak na magsisipagdalo mamaya sa dasalan. Maraming bisita ang nasa labas na nag-aabang samantalang abalang-abala na sila Ate Ivy at Ate Mae sa paghahain ng pagkain. Ilang sandali pa'y nagsimula na ang dasalan bilang pagdaraos sa ika-40 ng Tita Marino at pansamatalang tumaimtim ang kapaligiran. Matapos ang dasalan ay salo-salo na kaming lahat sa kainan at talagang nabusog ng husto. kahit na inakala kong di magiging madali ang kalagayan ko ay sulit naman ang pagparito ko pagkat parang tulad pa rin ng pamumuhay ko nung nasa Maynila pa ako't walang nag-iba. Maya-maya’y inaya ako ni Henson na maglaro ng agawan at batuhang bola, kahit bundat ay pumayag pa rin ako't nakipaglaro sa kanila upang sa ganun ay di amagin ang katawan sa kakaupo. Tila wala kaming kapaguran sa paglalaro at nadagdagan pa ang aming kasiyahan dahil kay Red na pakwela sa madla. Gustuhin ko pa man sanang manatili kila Tita Letty subalit kailangan na namin magpaalam pagkat babalik na kami sa bahay ng Lola Sabe.

^4b-l.   Habang nabiyahe'y inaalala ko ang masayang sandali habang nakatira kila Tita Letty at doon nahanap ang kakaibang saya. Pagdating sa bahay ng Lola Sabe ay kaagad kaming naglakwatsa magpipinsan at bumili ng pagkain. Sa kadahilanang hindi ko magamit ang cellphone sa pagsubaybay sa paboritong programa pagkat ito'y nagloloko. Naisipan kong makinuod sa kapitbahay at kinapalan ko talaga ang mukha sa pagpasok, makanuod lang. Kaagad naman pumayag ang may-ari ng bahay at hinayaan akong makinuod sa kanila. Sa katunaya'y matagal ng kilala ng matandang babae na nagpakilalang Lola Felina ang mga kamag-anak ko't dati pala siyang residente ng Batasan hills. Sa bait ni Lola Felina'y nakanuod pa ko hanggang Legal Wife subalit di ko natapos panoorin ang palabas sapagkat sinusundo na ako nila Tita Lenny. Bago umalis ay nagpasalamat ako kay Lola Felina sa kanyang kagandahang loob.