14. February 2014 Journal (Day 397-424)

February 01, 2014
Saturday
Year II-032

^3n-j. Kasing bilis ng guhit ng kidlat ang takbo ng panahon at di akalaing nalagas nanaman ang pahina ng kalendaryo, hudyat na nasa panibagong buwan na tayo ng taon. Nagising nanaman ako dahil sa malakas na tugtog ni Papa na dumadagundong pa. Sa halip na mabwisit ay nag-enjoy pa nga ako at sinabayan na rin ng pag-eehersiso. Sa susunod na buwan, March na at masayang isipin pagkat sa wakas, malapit na akong magtapos sa High schoolsubalit kakapangambang isipin na baka hindi ko na maipagpatuloy ang pag-aaral sa kolehiyo, ni isang eskwelahan o unibersidad ay di pa napupusuang pasukan at sana bago magtapos ang buwang ito'y may eskwelahan pa ring tatanggap sa akin.

^3n-k. Maya-maya pa'y ipinagpatuloy ko ang paglikha ng kanta. Kinatangahalian ay nagtungo ako sa Computer shop at nag-download ng mga kantang bentang-benta sa pandinig ng madlang people, syempre kailangang sumabay sa uso upang di magpag-iwanan. Ni hindi man lang nakalasap ng pagkain ang sikmura ko pagkauwi at kaagad pinakinggan ang dinawn-load na mga kanta. Nang makaramdam ng gutom, saka pa lamang ako kumain. Sa wakas at nagkatubig na rin kaya bye-bye body odor at pakiramdam ko'y napreskuhan ako. Maya-maya'y nag-siyesta muli ako at sa tuwing sasapit ang ganoong oras ay dinadalaw talaga ako ng antok at di mapigilang matulog. Gusto ko sanang lumabas at makagala-gala pero mas inuuna ko ang kahihitnatnan ng kalusugan at magiging magastos kapag may sakit kaya nanitili ako sa bahay at nag-compose na lamang ng kanta.

^3n-l. Nang mabuo ang nilikhang kanta'y siyempre, nilapatan ko ng tonong magbibigay kulay sa kanta kaso di naman bumabagay at na-realize ko na minsan ay mahirap maging songwriter kung may time limit ang pagco-compose ng kanta atover pressure ka pa. Inisip kong hayaan munang bigyang ng sapat na oras upang makapag-isip at naglaro muna ako ng Tablet. Maya-maya'y hapunan na kaya itinigil ko muna ang paglalaro. Matapos kumain, panonood ng telebisyon ang inutupag na siyang madalas kong gawin tuwing gabi. Hindi pa ako dinadalaw ng antok kaya nilapatan ko ng tono ang lahat ng kantang nilikha, mukhang tumitinis na ang tinig ko at sana'y magpatuloy pa pero rinding-rindi naman ang Ate kaya hininaan ko na ang pagkanta.

February 02, 2014
Sunday
Year II-033

^3n-m. Dahil nasarapan sa pagkanta'y di ko napansing Hating-gabi na at kailangan ng matulog. Sumapit muli ang araw ng Linggo, araw muli upang magsimba at makinig sa magandang balita ng ating panginoon, kung may kakayahang magawa ang lahat, ang una kong gagawin ay ang magsimba upang bawas kasalanan pero sa dami talaga ng iniisip at dala na rin siguro ng katamaran, hindi na ako nakakapagsimba kaya heto ang buhay ko ngayon, puro di magaganda at lapitin ng gulo at kapighatian. Iba talaga kapag relihiyoso ka sapagkat kaya mong harapin kung anumang problemang mayroon ka pagkat iniisip mong nariyan parati ang ating Diyos at walang problemang ibinibigay sa atin na di kakayanin. Tinanghali muli ako ng gising at nag-almusal upang iwas kalam ng sikmura.

^3n-n. Pagkatapos ay ipinagpatuloy ko ang paglikha ng awitin, sa dalas na ginagawa ko ito'y malamang mahigit sa sampung kanta na ang nagawa ko at pwede na ako maging Batikang songwriter kung papalarin, di ko pinapangarap na maging ganon sa tana ng buhay ko pero mukhang iyon yata ang magiging kapalaran ko, nararamdaman ko na. Sa kakalikha muli ng kanta ng walang humpay at puknat ay di ko namalayang tanghaling tapat na. Nasisiyahan naman ako sapagkat mabilis ang oras, kaagad rin akong makakatapos sa High school at Kolehiyo. Parang kailan lang nungfirst time kong mag-aral sa Batasan, nakakapanibago sapagkat bagong tao ang makakasalamuha ko at nahihiya pang makipag-usap sa mga kaklase, pero ngayon ay halos matapos na ang pag-aaral ko sa Batasan at lahat ng naging karanasan ko doon, maganda man o masama'y nalagpasan ko.

^3n-o. Kakalungkot at kaka-miss isipin na ilang Linggo na lamang pala ang itatagal ko na kasama ang mga kamag-aral kahit hindi naging maganda ang pakikitungo nila sa akin. I miss them so much ngayon pa lang. Kinahapunan naman, naisipan kong magtungo sa bahay nina Cathy. Pagdating ko sa kanila'y abalang-abala si Jaka sa pamamahala sa bunutan samantalang himbing sa pagtulog ang kapatid niyang si Cathy at ang mga magulang niya, hinintay ko munang magising sila. Maya-maya'y nagising na nga si Ate Ging at ginising niya si Cathy sapagkat dadalo ito sa Bible study. Pusong Katoliko ako pero di naman sigurong masamang dumalo ka sa Bible study ng ibang relihiyon sapagkat ang mahalaga'y matutuhan mo ang tungkol sa salita ng Diyos at mai-apply sa pang-araw-araw na buhay kaya nagawa kong samahan si Cathy.

^3n-p. Pagdating sa JOLIA church, nakita ko muli sina Thalia at sobra ko silang na-miss at naging mainit muli ang pagtanggap nila sa akin. Ilang saglit pa'y nagsimula na ang Bible study na pinangunahan nina Kuya Harold at Kuya Ian, tumagal lang ng halos isang oras ang bible study. Di pa kami kaagad umuwi ni Cathy sapagkat nag-ayos pa kami ng upuan at nag-usap pa ni Ate Gemma. Maya-maya'y umalis na kami ni Cathy at habang papauwi'y saktong naulinig namin na may nagkakagulo, iyon pala'y may isang Manong ang nakabulagta at sugatan ang paa, marahil ay nabundol siya ng Tricycle pero hinampas pala ng kaaway, si Cathy naman ay halos matulala na sa nakita at todo react siya, talagang dumanak ang dugo na halos ikamatay na niya. Sa halip na sa Hospitaldalhin ay sa outpost pa ng Barangay pa at nakiusyoso pa kami.

^3n-q. Maya-maya'y umalis na kami. Papauwi na sana ako ng biglang makasalubong ang Ate at nagpapasama siya sa akin, pumayag naman ako at nag-shopping kami. As usual kaya naman niya ako sinama sapagkat ako tagabitbit, kaunti lang naman ang nabili at nabibilang pa kaya kaya naman. Bago umuwi'y laking tuwa't pasalamat ko kay Ate sapagkat nilibre niya ako ng Starbucks Coffee, pangsusyal ang tema at ang sarap ng coffee choco nila with sprinkles kaya halos di maawat sa pagsipsip. Ginabi na kami ng uwi ng ate at hindi na ako naghapunan pa sapagkat ako'y labis nabusog. May pasok nanaman kinabukasan kaya maaga akong natulog.

February 03, 2014
Monday
Year II-034

^3n-r. Ikatlo pa lamang ng umaga ng magising at dahil maaga pa naman ay natulog muna ako subalit pagkagising ay Alas-singko na pala at kinailangan ko ng magmadali, mga Alas-sais mahigit na ako nakaalis at pagdating ay nagtuturo na sa may pisara si Ma'am Fabiana, bumati muna ako sa kanya bago pumasok. Sa oras naman ng TLE, group report muli at pagkatapos ay Quiz, si Ma'am Sandra naman ay uminit na ang dugo sa amin dahil parang wala raw kaming respeto sa pagre-report at ang iingay pa. Sa oras naman ng MAPEH, nagtungo kami sa Rooftop ng eskwela at nanood ng Theater play ng SPA, iba't ibang play production ang nasubaybayan namin at pinakamaganda sa lahat ay yung huli na, tilliin kaming mga manonood ng magpakita ng Abs ang lalaking Character, si Nathaniel naman ay halos maglaway na sa tindi ng humaling.

^3n-s.  Para sa akin ay ang huhusay nilang umakting kahit mga Grade 7 pa lamang at pwede ng sumabak sa Showbiz. Bumalik lamang kami ng Filipino time na at nagsagot lamang ng Pre-test. Sa oras naman ng English ay nagkaroon kami ng Activity, wala akong dalang papel kaya nanghingi ako kay Nathaniel subalit daming pakulo ng bakla at sinabing kumanta muna raw ako bago hingi, hindi ko sinunod ang gusto niya at kinulit ko lang ng kinulit at ng makita kami ni Ma'am Templanza'y sinumbong ko sa kanya at sinabing She is Selfish, nagtawanan ang lahat maging si Ma'am Templanza at sinabing she naman siya kaya pinagsabihang bigyan ako. Tawa ako ng tawa sa pangyayari kapag inaalala iyon. Sa oras naman ng Math, pumasok na si Sir Harren at nagturo ng Trigonometric Function, pagkatapos ay nagkaroon kami ng recitation and seatwork. Sa oras naman ng Physics, nagkaroon muli kami ng Pre-test at pagkatapos ay nagturo si Sir Martin regarding sa Speed of sound.

^3n-t. Ilang saglit pa'y uwian na. Hindi na malamig ang panahon at mainit na nga kaya labis ang pagtagaktak ng pawis. Diretso kain at tulog pagdating sa bahay. Pagkagising ay nagtungo ako sa Computer shop at nag-download muli ng mga RNB songs, tuwa naman ako dahil mabilis ang internet kaya nakarami ako. Madilim-dilim na ng mag-log-out ako at sa halip na diretso uwi ay nagtungo pa ako sa bahay nila Tita Jean at nakipagkwentuhan. Daming kwento sa akin ni Itang kaya napatagal pa ako sa kanila. Mga ikawalo na ng Gabi ako umuwi at nanood ng telebisyon. Ang ganda ng naging istorya sa Got to Believe sapagkat nakita na si Chichay nila Tarantina at yari siya kay Juliana, nagpapanggap pa siyang Foreigner na artist ni Ryan/Joaquin. Matapos manood ng paboritong programa'y natulog na ako.

February 04, 2014
Tuesday
Year II-035

^3n-u. Alas-singko nanaman ako nagising kaya nagmamadali muli sa pagkilos upang di mahuli, pagdating sa labas ng eskwelahan ay ang daming estudyante. Maya-maya'y pinapasok na kami subalit hindi kami pinatuloy sa kanya-kanyang silid kundi sa School Ground at pinapila. Habang nakapila'y saktong nagkita kami nila Jobil at pumuslit kami sa pila kaya nakapasok pa rin kaming tatlo sa silid. Kaya pala pinapila ang mga estudyante upang sermunan sa pagiging late at buti na lamang at pumuslit kami, kung hindi'y katakot takot na sermon ang ibabato sa amin. May punto rin si Ma'am Lintag na 2014 na at February na, kailangang iwasan ng mahuli sa pagpasok. Wala pa ring pagbabagong magaganap kung ang estudyante ay hindi nagkukusa. Ilang sandali pa sa di inasahan ay dumating na si Sir Arnulfo at nagturo siya hinggil sa patakarang Fiscal, kalagitnaan ng pagtuturo ni Sir ay saka pa lamang nagsidatingan ang mga late.

^3n-v. Bago umalis ay ibinahagi muna ni Sir ang naging karanasan niya sa pagkamatay ng kanyang ina at sinabing kahit malungkot ay may aral kang mapupulot. Sa oras ng TLE ay nagalit sa amin si Sir Balbin dahil parang niloloko raw namin siya at talagang ibinuhos niya ang lahat ng saloobin na labis namin ikina-guilty. Lahat ng mga bagsak ay ayaw talagang magkusa kahit binibigyan na sila ng Chance pumasa at iyon pa ang kinasasama ng loob ni Sir Balbin. Matapos ang mahabang sermon ay saka pa lamang nakapag-ulat ang mga nakatalaga. Sa oras naman ng MAPEH, matinding kaba sa dibdib ang nadarama ko sapagkat iaanunsyo na ni Ma'am Mina ang mga may Conditional grade. Nakahinga ako ng maluwag ng hindi mabanggit ang pangalan, thank you God. Matapos mag-anunsyo'y saka pa lamang siya nagturo.

^3n-w. Ang magandang pagtuturo ni Ma'am Mina'y nauwi sa pagkukwento tungkol sa naging karanasan niya. Sa haba ng kwento ni Ma'am, di namalayang Filipino time na at nasacorridor na si Sir Velarde, nagsagot muli kami ng Pre-test. Medyo nadalian ako sa mga aytem sapagkat Puro Tayutay at talasalitaan kaya nakakuha ako ng mataas na marka. Sa oras naman ng English, si Sir Buenventura ang humawak sa klase namin, habang nagtuturo'y palihim akong gumawa ng assignment sa Physics. Maya-maya'y Math time na at isa-isa kaming nagsagot sa pisara ng Trigonometric Function, ng maubos ang sasagutan ay saka pa lamang nagturo si Sir Harrenat nagkaroon kami ng seatwork.

^3n-x. Ilang saglit pa'y Physics na at nagturo lamang si Sir Martin, pagkatapos ang natitirang oras ay inilaan upang komopya ng lecture sa may pisara, si John James naman sarap kurutin at batukan pagkat ang lakas mang-trip, buti na lamang at mapagtimpi ako. Pagkauwi at dahil di pa kumakain ay lumantak ako ng todo-todo kaya ang resulta, parang buntis sa laki ng tiyan. Nang makaramdam ng antok ay saka pa lamang nag-siyesta. Kasarapan ng aking tulog ng gisingin ni Mama, ngayong oras pa lang umuwi ang papa sapagkat anibersaryo nila at may dala-dala pang KFC kaya pinagpiyestahan naming kainin, ako na kahit busog ay sige din ako sa pagbanat ng malutong at masarap na Fried Chicken at sinamahan pa ng malamig na Coke. Sa tindi ng kabusugang nadarama sa tiyan ay mukhang hindi na kakain ng hapunan mamaya at puputok na nga. Kinagabihan naman, malapit ng sumapit ang Alas-onse ng ako'y makatulog sapagkat hindi ko namalayan ang oras sa kaka-compose ng kanta.

February 05, 2014
Wednesday
Year II-036

^3n-y. Hirap talaga makayang idilat ang mata kapag ika'y inaantok kaya sa halip na Alas-kwatro bumangon ay Alas-singko na at labis na akong nagmamadali. Kaya ang resulta'y late nanaman ako at nagbago na talaga ang patakaran sa eskwelahan sapagkat pinapaglakad pa ng malayo ang mga late bago pumasok sa kanya-kanyang eskwelahan na dati naman ay hindi ginagawa, buti na lang at wala pa si Sir Arnulfo pagdating ko sa silid, hayahay ang Moda. Minuto lang ang lumipas ng dumating si Sir Arnulfo at itinuro niya sa amin ang Konsepto ng Pagbubuwis. Sa oras naman ng MAPEH, bago magturo si Ma'am Mina ay inasikaso muna niya ang Class record at binigyan niya kami ng tiyansang magpasa pa ng kulang na activity sapagkat ayaw niyang mambagsak, dami ko pa naman hindi naipasa sa kanya at sa takot na bumagsak ay gagawa ako ng paraan para makapagpasa.

^3n-z. Hindi na nakapagturo si Ma'am Mina kung anuman ang lesson namin at inanunsyo niya na wala raw Toga Picture sa Graduation pero tuloy raw angJunior Senior prom, iyon nga lang ay hanggang Alas-nuebe lang at di pwedeng paabutin ng madaling araw. How sad talaga sa aming batch, puro kamalasan ang nagaganap. Ayos lang na walang JS prom para sa akin pero yung walang isusuot na Toga kapag Graduation at wala pang Toga Picture ay hindi ko iyon matatanggap, wala akong magagawa sapagkat estudyante lamang ako. Kaapelyido ko nga si Armin Luistro pero di kadugo kaya wala akong lakas loob na kumbinsihin ang Dep-Ed, buti pa sa Private school at may Toga Picture.

^3o-a. Sa oras naman ng Filipino wala kaming ibang inatupag kundi ang magsagot sa Pre-test. Pagkatapos ay nagtsek kami subalit hindi nanaman katayugan ang nakuha ko. Maya-maya'y recess time na at sila Jessa ang nakasama ko patungongCanteen, ngayong lang ako ginaganahang kumain tuwing recess. Pagkabalik sa silid ay nasa pisara na si Ma'am Templanza at Sir Buenaventura at nagkaroon muli kami ng activity, hindi ko natapos ang activity sapagkat ang daming satsat ni Jessa at Jobil. Maya-maya'y Math time na at recitation muli. Habang hindi pa Physics time ay nagrepaso muna ako ng lecture na kinopya sapagkat may Quiz kami pero ng Quiz na at tseking, sobrang nalanta’t nanamlay ang kalooban ko sapagkat out of 10 items ay dalawa lang ang nakuha ko, ano ba ito’t puro di na magaganda ang pangyayari sa buhay, wala na ngang magaganap na Toga picture tapos nakadagdag pa sa pagkalumbay ko ang naging resulta sa Quiz, kainaman naman!  

^3o-b. Hindi mapagsidlan ng saya ang mukhang nilalamon ng kalungkutan at pagkadismaya pagkauwi at itinulog ko na lamang iyon. Kahit naman nakatulog na ay waring di pa rin maayos at ganon pa rin, parang downna down talaga ako sa sarili na hindi alam kung magpapatuloy pa ba sa nasimulan, paano ako makakabawi kung puro kahinaan na lang ang pairalin at walang tiwala sa sarili. Na-realize ko kinalaunan na ilang beses mang madapa o magkamali, huwag matakot tumindig at ipakitang makakatayo kang muli. Tibay at lakas ng loob ang kailangan.

February 06, 2014
Thursday
Year II-037

^3o-c. Patak-patak ikalima na ng umaga ako nagising at sa takot na baka mapagalitan kapag pumasok ng late ay nagpasyang huwag na lang pumasok, umiiral muli ang pananakit sa ngipin at pinili ko na lang matulog muli. Mga ikawalo na ng umaga nagising at manamis-namis na Tikoy ang naging agahan ko. Kahit kasakin ang ngiping kinakain na ng pagkabulok ay kumain pa rin ako ng Tikoy. Pagkatapos ay bumili na ako ng materials na gagamitin sa paggawa ng project sa MAPEH. Pagkabili'y sinimulan ko ng gawin ang mga activity sa MAPEH sa pamamagitan ng pag-retype. Gusto ko ng pumasa at mahirap na baka bumagsak kaya desididong matapos at makapagpasa. Nang matapos gawin ang activity sa MAPEH ay nagtungo ako sa Computer shop kaso nakalimutan kong gawin ang Brochure kaya napatagal pa ako sa kanila.

^3o-d. Sa totoo lang ay nahirapan ako sa paggawa ng Brochure kaya napatagal pa ako at isa sa nakadagdag ng paghihirap ko ang mga paslit na nagkukumpulan na kahit hindi gumagamit ng Computer ay nandodoon at tumatambay, ang iingay pa man din. Nahirapan na akong mag-concentrate dahil sa ingay at gulo ng mga bata kaya kahit hindi tapos ay umalis na ako. Ipapagpatuloy ko na lang mamaya. Pagdating sa bahay ay eksaktong alas-dose na pala at saka pa lamang ako nananghalian. Hindi sana ako matutulog subalit sa tindi ng antok na nararamdaman ay di ko na napigilan ang sarili na matulog.

^3o-e. Hindi na tuloy natupad ang balak ko na ipagpatuloy ang paggawa ng Brochure sapagkat ikalima na ng hapon ako nagising at hindi na sapat ang oras sa paggawa. Nanatili na lang ako sa bahay t nilibang ang sarili sa pamamagitan ng paglalaro ng Flappy bird, kaso ang problema'y palaging Game over sa simula ng laro na labis kong ikinayamot, uso itong laro subalit nakakagigil at hanggang lima lang ang kinaya ko. Maya-maya'y nanood na ako ng Telebisyon. Mga ikasampo na ako natulog sapagkat inendyoy ko pa ang paglalaro ng Flappy bird, medyo naadik na rin.

February 07, 2014
Friday
Year II-038

^3o-f. Ikaapat na ng umaga ako magising sa lakas ng alarma ng aking telepono subalit malapit ng mag-ikalima ako bumangon at sa kadahilanag ngayong araw magsisimula ang Review namin para sa darating na NAT test ay kunti lamang ang dinala ko. Inagahan ko talaga sa pagpasok at baka ma-late muli pero pagdating sa eskwela'y kakaunti pa lamang mga kamag-aral ko. Habang tumatagal ay unti-unti kaming dumarami at kasabay nito ang pagkawala ng katahimikan. Ipinabatid sa akin ni Mothy na mag-uulat lahat ng lalaki sa Math kaya pinag-aralan ko na kung ano ang iuulat ko. Maya-maya'y bigla na lamang pumasok sa aming silid si Sir Harren at biglang bumulaga sa amin ang malakas niyang pagsigaw. Sa naging reaksyon ni Sir ay mistulang halimaw na ito kaya di maiwasang masindak ng higit pa sa labis. Akalang siya ang guro namin ngayong NAT review day subalit nagkakamali.

^3o-g. Pagkaalis ni Sir Harren ang pagpasok naman ng isang guro at nagpakilalang Ma'am Shiela. Habang di pa ako nakasalang ay todo repaso ako at ng ako na, hinusayan ko sa pagpapaliwanag. Ang seryosong Discussion, nauwi sa malakas na tawanan ng biglang dumating ang mga Late at pinagsalita ni Ma'am ng Knock knock. Talagang isinara ang pintuan sabay katok. Ng wala silang maisip na sasabihin ay pinapasok na sila. Sumunod na asignatura'y Physics at si Sir Martin pa rin ang naging guro namin. Nakaroon kami ng Groupings at nirepaso namin kung anong aytem ang nasa NAT reviewer booklet sa pamamagitan ng pagtataas ng letter sa Flash Card at kami'y paunahan sa pagtaas.

^3o-h. Medyo pagkabilib sa sarili ang naramdaman ko pagkat palaging tumatama kung anumang letra ang idikta ko, sayang at walang iskuran. Sumunod naman na asignatura'y AP at si Ma'am Myles ang naging guro namin. Bago magrepaso'y pinasagot muna kami sa NAT reviewer booklet. Maya-maya'y nagturo na si Ma'am Myles at bukod sa magaling magturo'y magaling rin siya magpatawa, bumanat pa siya ng salita ng ako ang tawagin. Nasiyahan naman ako sapagkat kasing tayog ng Mount Apo ang nakuha ko saQuiz. Matapos ang AP ay recess time, sinamantala ko ang oras na ito sa pagpa-print ng mga ginawang activity sa MAPEH kahapon. Pagkabalik sa silid ay nandoon na si Sir Velarde at siya pa rin ang guro namin sa Filipno. Pinagsagot niya lamang kami sa NAT reviewer booklet at pagkatapos ay tseking. Hindi kataasan ang nakuha ko. Wala kaming ibang ginawa kundi ang mag-concentrate sa pag-intindi ng mga matatalinghagang talata at halos lumuwa ang utak sa kakaanalisa.

^3o-i. Nagturo rin naman si Sir kahit saglitan lamang. Ilang sandali pa'y English na at si Ma'am Guevarra naman ang guro namin. Habang tsinitsekan ang long test ay nirerepaso namin kung saan aytem kami nagkamali. Sa oras na may makitang nakikipagdaldalan ay sinisermunan niya kaya kain sa oras ang dapat sana'y ilaan sa pagrerepaso subalit natuloy pa rin ang kanyang pagtuturo. Hindi pa oras ng uwian nun ng umalis si Ma'am Guevarra kaya naghintay pa kami at nanatili. Mainit sa loob ng silid kaya minabuting sa labas manatili at magpahangin. Maya-maya'y nagsilabasan ang ilan kong kamag-aral at kwentuhan kami. Ito namang si Jobil ay napakaharot kaya napalakas ang hampas niya ng kamay sa dibdib na halos ikamatay ko na. Humingi naman siya ng tawad kaya di ako nagalit at nanumbalik muli sa dati ang paghinga ko pagkaraan ng ilang saglit.

^3o-j. Maya-maya pa'y tumunog na ang Bell at uwian na. Sa aking pakiwari'y summer season na sapagkat iba ang init ngayon. Diretso lamon ng ulam pagkauwi. Hindi pa nakuntento ang sikmura ko at Bet yata ang panghimagas kaya naisipan kong magluto ng Tikoy. Upang maiba naman ang toppings ay matiyaga akong nagpirat ng Mani sabay budbud sa Tikoy. Kaso napasobra yata ang lagay ko ng mantika at napag-isip-isip kong di pa ko marunong magluto masyado. Matapos kumain ng Tikoy ay natulog ako. Mga ikaapat na ng hapon ng muling dumilat ang mata at nanood ng telebisyon. Sabado muli kinabukasan kaya nagpuyat ako sa paglikha ng kanta. Mga hating-gabi na rin ako natulog.

February 08, 2014
Saturday
Year II-039

^3o-k. Masaya nanaman ang damdamin sapagkat sumapit muli ang Weekend kaya pwedeng matulog anumang oras gustuhin kaso napaaga ang gising ko sapagkat nagpatugtog muli ang Papa ko. Pagkatingin sa malaking orasan, ikapito na ng umaga at ako'y nag-almusal. Habang napapakinggan ang tugtog na pangsayaw ay naaliw kami ni Mama sa pagsayaw at iyon na ang nagsilbing ehersiso namin sa umaga. Maganda pala sa takbo ng katawan kapag ginagalaw ng todo paminsan-minsan at parang ginaganahan kang gawin kung anong gustong gawin. Maya-maya'y RNB songs naman ang pinatugtog kaya lalo akong nag-enjoy sa pakikinig ng musika, malamang ay sariling tugtog ko. Ang kaligayahang namamayani sa dibdib ay nagwakas ng dumating ang ate. Nagpatuloy pa rin naman ako sa pagpapatugtog pero di na sinlakas ng kanina at naiingayan pa rin ang ate.

^3o-l. Bakit pa kasi bumili ng Sound system kung hindi naman kakayanin ng teynga ang malakas na tugtugan at isa pa'y hininaan ko na nga, nabibingi pa siya hanggang sa muli kaming magbangayan. Ako pa iyong walang konsiderasyon, kapag ako ngang himbing sa pagtulog samantalang nagbibidyooke siya kahit malakas ay hinahayaan ko lang siya tapos siya pa ang may ganang magalit, kamusta naman. No choice ako kundi hinaan talaga ng hinaan at ang Enjoy ko sa sarili, nawala na. Palibhasa'y mga KJ! Lumipas ang ilang saglit ng pinatay ko ang tugtog at ipinagpatuloy ang paglikha ng kanta. Naging maaliwalas muli ang lagay ng panahon kaya pagdating ng dakong tanghali'y halos ma-heat stroke na sa tindi ng init at hindi rin ako makatulog ng ayos. Nagtungo ako sa Computer shop. Matapos magkumpyuter ay naisipan kong bumisita kila Tita Cleng at nagtungo nga ako sa kanila.

^3o-m. Nandoon pala ang Lola nila at abalang-abala ang tita sa pag-aalaga sa Sanggol niyang anak. Hanga ako kay Auntie sapagkat kahit babagsak na ang mata niya sa tindi ng antok, nagagampanan pa rin ng maayos ang lahat ng reponsibilidad niya, may balak pa nga siyang maglaba kahit lumagom na ang gabi at di papigil kahit sabihin kong ipagpabukas na lang. Inabot na ako ng gabi sa kanila sapagkat sinagutan ko pa ang Slum book ni Samantha at nanood ng Video. Saya ang nadarama ko ng bigyan ako ng pabango ni Auntie kaya nangangamoy pabango pagkauwi. Alas-otso na pala at saka pa lamang naisipang kumain kung kailan kalam na ang sikmura at malamig na ang ulam. Bago matulog ay nagpuyat muli ako sa pag-compose ng kanta. Sana'y pumatok sa mga listenerang nilikha kong kanta kapag ini-launch ko na ito sa radyo.

February 09, 2014
Sunday
Year II-040

^3o-n. Sarap pa sanang matulog ng napakatagal sa tindi ng antok na nararanasan subalit naibsan at nasira iyon dahil muli sa malakas na tugtog na dumadagundong pa. Pagkabangon ay nagpasayaw-sayaw ako bilang ehersiso at pagkatapos ay ginampanan ang responsibilidad bilang tagalinis ng bahay. Kapag may tugtug talagang umaaliw sayo at parang nagiging Relax ang pag-iisip mo at ginaganahan kang gawin ang gusto, parang pangontra sa katamaran ang napakalakas na tugtog, hindi lamang sa malas. Tamang kinig lang ng mga RNB songs habang sumasayaw at nagwawalis. Napapansin kong tila lumalambot na ang malabakal kong katawan kapag sumasayaw at tulad nga ng sinabi ko, kapag ang bagay ay mapurol, tumatalas basta hasain lang. Ito naman si Mama'y walang ginawa kundi ang magreklamo sapagkat malakas raw ang tugtog. Kahit kailan talaga paminsan-minsa'y KJ si Mama, ang Ate naman ay nag-e-enjoy sa tugtog ko at nilalakasan pa nga niya kapag naibigan ang tugtog.

^3o-o. Mga ikasampo ko na pinatay ang tugtog at tila yata napakatahimik ng kapaligiran, marahil ay kami lang ang nagpapatugtog. Pinagkaabalahan ko muli ang paglikha ng kanta. Habang papalapit ang tanghalig tapat ang unti-unting pag-init ng panahon subalit salamat naman pagkat naging mahangin. Bukod sa init ng panahon ang unti-unti ring pagkawala ng katahimikan kaya hirap na akong mag-isip kung anong liriko ang kakasya sa tonong aking nilapat na. Maya-maya't sa bilis ng takbo ng oras ay di namalayang sumapit na pala ang tanghaling tapat at kailangan ng kumain. Alas-dose pa lamang subalit dinalaw na ako ng antok kaya diretso tulog pagkatapos kumain subalit sadyang hadlang ang init sa sarap ng tulog ko at di naman makatulog ng maayos kaya saglit lamang ako makatulog.

^3o-p. Mahaba na rin ng bahagya ang buhok ko at sa takot na magupitan ng Otso bukas ay nagpasya na akong magpaputol. Pagdating saBarber shop ay may isang taong biglang binara ako kaya binara ko rin, ang pangbabara'y nauwi sa tawanan hanggang sa magtsikahan kami. Palibhasa'y bakla kaya halos ikamatay ko ang pagtawa sa baon niyang Joke. Salot nga ang bakla para sa mata ng iilan pero hindi mapagsidlan naman ang saya mo kapag kausap sila at sa totoo lang ay mas magaling magpatawa ang mga bakla kaysa Straight, straight nga pero mas maitim pa sa pwet ng kawali ang ugali. Nagpakilalang itong Renzy at matagal na raw niya ako kikilala, ganon talaga kapag katankaran ka, maraming nakakapansin at nakakakilala sayo na hindi sila namumukhaan o nakikila pa.

^3o-q. Matapos magpagupit ay nagtungo ay sa Computer shop. Isang buwan na rin hindi nakakapagbukas ng Account sa Facebook kaya hindi mabilang sa dami ang aking Friend request. Sa sarap mag-Facebook at panonood rin ng Youtube ay di namalayang Nakadalawang oras na at kailangan ng mag-log-out. Dumaan pa ako sa bahay nila Tita Jean. Si Itang naman ay panay kulit na ilibre ko raw siya sa pagrenta ng Computer upang mag-Facebook, naging mabait naman siya sa akin kaya pinagbigyan ko na pati si Amihan na gusto rin magkumpyuter. Pinayagan naman ang dalawa ni Tita Jean basta isasama si Habagat. Kahit alam sa sariling uto-uto at kaagad bumibigay ay maganda sa pakiramdam ang magbigay ka at ganon ang naranasan ko kahit naubos na ang pera sa kakalibre sa kanila.

^3o-r. Hindi bale at magkakapera pa naman ako na triple pa ang balik sa bilang ng hawak ko ngayon. Habang nagkukumpyuter ang dalawa'y ako naman ang nagbantay kay Habagat. Siyempre bata pa kaya panay ang saway ko sa kanya. Nagtagal pa ako kila Tita Jean hanggang sa sumapit ang gabi at kahit nahihiya'y sa kanila na rin ako kumain, mas nakakahiya naman kung inaalok ka nga, tanggi pa ng tanggi. Dadalaw pa sana ako sa bahay nila Auntie Caling subalit sarado ang bahay nila kaya umuwi na lang ako. Manonood ng telebisyon pagdating sa bahay at napakarami kong tawa sa Wow Mali pa rin. Sa kakatawa'y halos ikapunit na ng lalamunan ko at grabe, sobrang saya ng naging gabi ko kaya masarap ang pagtulog ko. Laughter is the best medicine.

February 10, 2014
Monday
Year II-041

^3o-s. Nabibitin lamang ako sa nagdaang weekend sapagkat parang hindi ko man lang naramdaman at nasulit at may pasok nanaman kaya ikaapat pa lang, kailangan ko ng bumangon kahit dama ko pa ang pagkaantok, kaunting panahon na lang at mairaraos ko rin ang ganitong sitwasyon. Sa takot na mahuli, madilim-dilim pa lang ng umalis ng bahay at nag-abang ng tricycle subalit ang pagkakatao'y di kagandahan pagkat ang tagal dumating ng mga tricycle. Naabutan na ako ng Liwanag subalit wala pa rin at late na ako, ang haba na rin ng pila. Huwag sanang maubos ang pasensiya at kung hindi'y di na lang papasok. Ilang saglit pa'y dumating na ang tricycle matapos ang halos isang oras na pag-abang. Pagdating sa eskwelahan ay pinapila ang lahat ng late sa Quadrangle at isa ako dun. Pinayagan lang makapasok sa kanya-kanyang silid kung naisulat mo na ang pangalan mo.

^3o-t. Pagpasok sa silid, nagtuturo na si Ma'am Fabiana at hiya ang nataros sa dibdib ko pagkat ako'y nahuli, ang kukupad kasing dumating ng mga tricycle. Maya-maya'y nagkaroon kami ng maikling pagsusulit kaso hindi katayugan ang natamo kong marka, bawi muli next time. Sa oras naman ng TLE ay may group discussion muli kaso sa ingay ng mga kamag-aral ko, hindi ko marinig kung anong tinuturan nila, parang mga bubuyog na bulungan ng bulungan. Sa oras naman ng MAPEH ay nagkaroon kami ng Chapter test at habang nagsasagot ng exam ay may isang gurong nagtungo sa aming silid at ipinabatid na may libreng pabakuna sa Ikalawang palapag ng gusali. Nagpaturok na ako ng Bakuna nung bata pa kaya walang balak magpabakuna. Bago umalis si Ma'am Mina ay inanunsyo niya sa amin na may Practical test kami ng Swing at Cha-cha bukas with costume pa. 

^3o-u. Maya-maya'y oras na ng Filipino at pinayagan ni Sir Velarde ang lahat ng magpapabakuna kaya lumabas ang halos lahat. Ang mga naiwan naman ay pinagsagot lamang ng Pre-test. Sa oras naman ng English ay nagkaroon kami ng Activity. Maya-maya'y Math time na subalit hindi pa pumapasok si Sir Harren at sa halip na makipagpalitan ng salita sa katabi'y nagrepaso ako. Makaraan ang ilang saglit ay dumating na si Sir Harren at di ako nakapaghanda sapagkat may mahabang pagsusulit kami, labis tuloy akong nahirapan at di ko pa kabisado ang bawat Trigonometric Function ng Radian, dahil desperado na ako ay kumapit ako sa patalim. Pasimple kong binuksan ang notes at kinopya ang sagot.

^3o-v. Sabay tago kapag lumalapit si Sir Harren. May ilan pang hindi pa nagpapabakuna at kahit nagpabukana na'y biglang nagbago ang isip ko at nagpabakuna kasama ang ilan kong kamag-aral. Pananakit ng braso ang natamo ko matapos angVaccination laban sa tigdas at tetanos at labis ko iyong ininda. Ilang saglit pa'y Physics na, nagkaroon rin kami ng long test at mukhang sagana kami sa mga Exam, ganon talaga kapag malapit na ang NAT. Hindi pa kami umuwi at dumiretso pa sa Park upang magpraktis ng Cha-cha at Swing para sa aming performance bukas sa MAPEH, kahit nanakit na ang aking Braso dahil sa turok ng bakuna ay sige pa rin sa paggalaw at gaya ng dati'y mas madali ang nasa unahang step kaysa gitna, paano'y simple lang kasi at kahit di marurunong sumayaw ay kayang gayahin iyon.

^3o-w. Si Pammit ang naging ka-partner ko at ang tigas din ng katawan kaya hirap makasunod sa steps, ginawa ko na ang lahat pero wa-effect at laging sablay. Mga ikatlo na ng hapon kahit di pa tapos ang Practice ng magpasyang umuwi na kami at si Pammit ang kasabay ko. Ang sakit talaga ng braso ko kaya minabuting sumakay na lang kaysa maglakad at labis ko iyong ininda hanggang sa pag-uwi kaya madalas wala sa mood kapag kinakausap. Bahagyang naibsan naman ang pananakit ng braso na gawa ng itinurok na bakuna pagsapit ng gabi kaya naging masarap pa rin ang pagtulog ko. Makikita nanaman ako ng aking kamag-aral na sasayaw kaya goodluck to me.

February 11, 2014
Tuesday
Year II-042

^3o-x. Sa takot na baka mahuli muli sa klase katulad ng kahapon, hindi na ako patumpik-tumpik pang bumangon. Pagkatingin sa orasan ay kakapasok pa lamang ng Alas-kwatro. Hindi na gasinong kasakit ang Braso ko kaya maayos ko na itong naigagalaw. Bago pumasok ay inihanda ko na ang Costume na isusuot sa sayaw at dibdiban kong sinaulo ang mga steps ng Sayaw upang di magkalat mamaya, sa Quadrangle pa naman gaganapin ang sayaw kaya matinding kaba ang dala-dala ko sa dibdib. Napasobra pa marahil ang pagpasok ko ng maaaga sapagkat iilang kamag-aral ko pa lamang ang nandoon subalit dinig ko na ang ingay. Si Ibarra naman ay sadyang napakatabil ng bibig at kung makipag-usap ay ilang milya ang layo sa kaklase. Sa sobrang ingay nila'y di ako makapag-concentrate sa aking binabasa.

^3o-y. Ilang saglit pa'y lumabas na kami para sa Flag Ceremony. Pagkabalik at ilang saglit ang makalipas ay dumating na si Sir Arnulfo. Inilaan niya sa amin ang buong oras nito upang sagutan ang Pre-test. Maya-maya'y tseking at sana'y kasing taas ng takong ng aking mga kamag-aral ang makuha ko. Sa oras na walang guro ang siyang pagkakataon namin upang mag-ensayo at lalo pa akong kinakabahan, kung sa bagay ay last time na namin upang sumayaw kaya kailangang husayan na. Habang di pa MAPEH time ay panay na ang aming paghahanda. Nagmistulang JS prom na ang silid dahil sa magagarang kasuotan ng aking mga kaklase, mukhang mamahalin at iliganteng pagmasdan ang Gown ng mga babae with high heels at Long sleeve with checkered and nectie sa lalaki na lalong nagpapalutang kung gaaano sila ka-gentleman. Ako lang marahil ang na-iiba sa kasuotan ng mga lalaki sapagkat naka-formal attire ako na hindi long sleeve, ayos lang basta may Grade.

^3o-z. Ilang saglit pa'y nagsimula na ang performance na ginanap sa Quadrangle. Kanya-kanyang nabuong steps ang nakita ko sa mga naunang grupo at talagang pinag-isipan ng husto. Nang kami na ang nakasalang, pilit kong nilalabanan ang kaba na halos magrosaryo na nga. Sa totoo lang ay ginawa ko na ang lahat ng makakaya, ka-partner ko lang marahil ang nagkukulang pero sa pangkalahatan ay nakasayaw naman kami ng walang mintis na mahahalata kahit mayroon. Bago pumasok ay sinabi sa amin ni Ma'am Mina na maglilinis lamang kami bukas ng campus. Sa oras naman ng Filipino ay mukhang tinamaan na ng katamaran si Sir Velarde, paano puro pasagot sa pre-test, ni hindi man lang kami tinuturuan o nirerepaso man lang.

^3p-a. Sa oras naman ng English, halos antukin na ako sapagkat ang Boring magturo ni Sir Buenaventura at mas maiging si Ma'am Pascual na lamang ang magturo o si Ma'am Templanza, nakikinig talaga ako sa kanila at may mga baon pang katatawanan. Wala muling guro sa oras ng Math kaya kahit di ko ito ugaling gawin ay nakipagkwentuhan ako kay Perfecto at pinag-usapan namin ang tungkol sa unibersidad na papasukan, maski siya'y wala pang napipili at mahirap talagang pumili kapag ganitong panahon na. Naudlot lamang ang aming pag-uusap ng biglang dumating si Sir Harren.  Itinuro sa amin ni Sir Harren ang bagong lesson at iyon ay Cosecant at secant.

^3p-b. Pagkatapos ay nagkaroon kami ngseatwork. Ilang saglit pa'y Physics time na, nagtsek lamang kami ng test paper na isinagawa kahapon. Hindi ako makapaniwala sa naging resulta sapagkat ako ang Highest sa naturang pagsusulit kaya ang tuwa sa dibdib ay siksik, liglig at umaapaw na. Naging maulan ang uwian at malas lang sapagkat hindi nakapagdala ng payong kaya naman patakbo ako sa pag-uwi. Kaagad naman tumila ang ulan. Sa tindi ng gutom na nadarama'y halos maubos ko na ang ulam pero nagtira pa rin naman. Maya-maya'y natulog na ako at sa kasarapan ay ikalima muli ng hapon ako nagising.

February 12, 2014
Wednesday
Year II-043

^3p-c. Muli nanamang nagparamdam ang malamig na panahon at marahil ay bumalik nanaman ang Hanging Amihan kaya halos tamarin na ako sa pagbangon subalit pinilit ko pa rin at baka mahuli na sa pagpasok sa eskwela. Mukhang napaaga ang pagdating ko sa eskwela sapagkat iilang kamag-aral ko pa lamang ang nandoon. Ngayong araw pala In-charge ang seksyon namin para sa flag ceremony kaya naman kaagad ay nagtungo na kami sa may Quadrangle at umawit ng iba't ibang anthem. Tawanan kami ng mabaligtad ng mga kamag-aral ko ang tamang liriko ng Lungsod Quezon at parang nag-mash up lang. Wala pa ang butihing guro namin pagbalik sa silid kaya may pagkakataon pa upang makagawa ng takdang-aralin sa Physics maging sa English. Halos duguin na ang ilong sa paggawa ng essay.

^3p-d. Ilang saglit pa'y pumasok na ang aming Guro sa Economics at itinuro niya ang tamang pagbubuwis ng pamahalaan. Ang ganda sana ng lesson pero bwisit ako sa mga katabi ko na walang preno ang bibig sa pagtalak kahit may guro na. Pinagsabihan kong makinig pero nagpatuloy pa rin sa pagkukwentuhang na wala namang kakwenta-kwenta. Sa oras naman ng TLE ay mga kamag-aral ko pa rin ang nagsilbing guro sa harapan. Sa ingay talaga ng mga kamag-aral ko, hindi na lang ako nakinig at gumawa ng Assignment sa English. Sa oras naman ng MAPEH, nagsalita sa amin si Ma'am Mina hinggil sa mga nagrereklamo sa Contribution, 25 pesos na nga lang ang hinihingi para sa gaganaping JS prom pero mabigat pa raw sa bulsa. Kaya ang resulta'y ibabalik na ang lahat ng aming iniiambag at walang kabuhay buhay ang JS prom dahil walang palamuti at stage, lalong-lalo ng walang Catering, ang lungkot naman.

^3p-e. Matapos magtalumpati ni Ma'am Mina'y nagtungo kaming lahat sa labas ng silid at nilinis ang buong school campus, mistulan kaming mga mutyatya sa ginagawa ni Ma'am pero enjoy kapag may ginagawa at masaya kami pagkat nalilinis namin ang paaralang siyang aming pangalawang tahanan. Sa oras naman ng English, si Ma'am Templanza muli ang naging guro namin at nag-discuss tungkol sa Poetry, matapos ay nagkaroon kami ng seatwork. Wala muling guro ng sumunod na asignatura kaya naman daig pa ng aking kamag-aral ang mga hayop na nakawala sa kulungan kung magharutan. Sa takot na baka mangyari sa akin muli ang nangyari nung nakaraang taon, naupo lamang ako at nagbasa ng NAT Reviewer booklet. Kanya-kanya silang balikan sa upuan ng biglang dumating si Sir Harren at sinermunan niya kami, ang iingay kasi kaya napagalitan pero panandalian lang at nakapagturo pa siya.

^3p-f. Sa oras naman ng Physics, may bago nanamang lesson sa aming itinuro si Sir Martin na interesting at iyon ay electronics, pagkatapos ay uwian na at parang napakailap ng oras. Sa kadahilang hindi pa inaantok ay naisipang kong magkumpyuter. Nang dalawin ng antok ay natulog ako. Pagkagising ay nagtungo ako sa Computer shop upang mag-research ng assignment. Ginabi na ako ng uwi sapagkat nasarapan sa pagkukumpyuter. Bago matulog at upang malibang ay naglaro ako ng larong nakakapaglagablab sa damdamin pero nagbibigay ligaya naman at iyon ay Flappy bird, hanggang lima lang ang pinakamataas ko kahit ilang ulit mag-try out at talagang na-hastle ako. Maaga pa ako magigising kaya di na ako nagpakaadik pa sa paglalaro.

February 13, 2014
Thursday
Year II-044

^3p-g. Bandang ikalawa ng madaling araw magising ang katawang lupang nahihimbing sa pagtulog subalit maaga pa naman kaya umidlip muna. Sadyang kay bilis ng oras sapagkat pagkatingin muli sa telepono'y Alas-kwatro y medya na at kinailangan ko ng bumangon. Mahaba nanaman ang pila sa tricycle kaya may pangamba muling mahuhuli pero di pa man nasisikatan ng bukangliwayway ay nakaalis na ako. Bukas pa ang Valentine's Day subalit marami ng street vendors ang nagtitinda ng Roses at Bouquet sa harapan ng eskwelahan, kaya ang resulta'y siksikan na. Sa oras naman ng AP ay ipinagpatuloy ni Sir Arnulfo ang pagtuturo ukol sa paraan ng pagpataw ng buwis at ang natitirang oras ay inilaan upang isagawa ang activity. Natutuhan ko na hindi mo pala basta-basta malalaman kung magkano ang buwis na iyong babayaran sa loob ng isang taon sapagkat maraming proseso at halos maloka na ko sa pagkompyut, sana'y ma-perpect ko kahit di sigurado sa sagot.

^3p-h. Sa oras naman ng TLE, sa wakas at si Sir Balbin na ang nagturo sa amin at sa oras ng MAPEH ay nag-ensayo lamang kami ng tamang pag-awit ngGraduation song. Kaunting panahon na lang at malapit ng magtapos sa pag-aaral, goodluck to me in College. Ang seryoso at matunog na kantahan ay nauwi sa tawanan ng pakantahin ni Ma'am Mina sila Cynt, dami nilang galaw at dapat lang iyon sa kanila pagkat di sila nagseseryoso. Maya-maya'y Physics time na at ipinagpatuloy ni Sir Martin ang pagtalakay hinggil sa Electronics, ang hirap talagang maging Electrical Engineer pagkat hirap isaulo ang lesson. Nakadagdag pa sa pagkalito ng utak ang ingay ng katabi ko at panay ang tsikahan, lahat kami'y tutok ang mata't teynga kay Sir Martin maliban kina Jobil at Jessa na panay kwentuhan kaya madalas ay bumabagsak, sinabihan ko sila pero di talaga makuha sa masinsinang pakiusap kaya sumigaw na ako. Parang walang konsiderasyon sa katabi at halabira talaga sa pagkwento.

^3p-i. Maging sa English time ay hindi ako natutuwa sa ilan kong kamag-aral sapagkat ang iingay nila kahit may guro sa harapan. Tama si Ma'am Templanza na magsipag-asawa na lang ang ayaw makinig, basta ako'y ipapagpatuloy ko ang pag-aaral at wala pa sa isip ang mag-asawa. Bahagya akong nakaramdam ng antok kaya ng umalis si Ma'am Templanza ay umidlip ako. Hindi naman ako makatulog sapagkat nuknukan at saksakan talaga sa ingay ang aking mga kamag-aral, wala akong magagawa sapagkat sakit na nila iyon. Ginising na lang ako ng katabi kung kailan nakapasok na si Sir Harren at nagkaroon kami ng quiz. Maging sa oras ng Physics ay nagkaroon rin ng quiz at kahit di ako nakapagrepaso basta nakikinig sa guro'y alam mo pa rin ang isasagot, nanlubag ang kalooban ko sapagkat mataas ang natamong marka.

^3p-j. Nabwisit lang ako sa aking kamag-aral pagkat walang hiyang binaboy ang mukha ko kahit sabihing katuwaan lamang lalo na 'tong si Ashley na halos labasan na ng ribs sa tindi ng tawa, nakisakay na lamang ako sa kanilang pangti-trip. Bago umuwi ay nagtungo kami ni Perfecto sa TLE department dahil ipinabatid niya sa akin na lahat ng bagsak nitong First grading ay blangko ang grado sa card subalit pagkadating ay di namin nadatnan si Sir Balbin kaya umuwi na lang kami. Kinahapunan ay nagtungo ako sa computer shop upang mag-online sa mga Social media sabay bati ng Happy Valentine's. Ang oras talaga'y sadyang kay bilis kaya di ko namalayang kumagat na ang dilim. Diretso kain ng niluto pagkauwi kaya naman si Mama'y nabungangaan ako. Minsan na lang maging maligaya'y nagagalit pa at ganon ang pamamaraan ko upang lumigaya. Goodluck na lamang sa mga single para sa darating na ValentinesDay bukas.

February 14, 2014
Friday
(Valentine's Day) 
Year II-045

^3p-k. Sumapit muli ang Valentine's day kaya araw rin ito ng pagmamahalan hindi lamang sa magsing-irog kundi sa lahat ng ating kapwa, kahit na ako'y single at wala pang balak magkaroon ng katuwang sa buhay ay masaya pa rin sapagkat ako yung tipong nilalang na may kakayahang magmahal na kahit na sino basta alam niya sa sarili na handa rin akong mahalin. Ikaapat pa lamang ng ako'y magising at dama muli ng katawang lupa ang malamig na panahon kaya naman heto't madalas ang pamamaluktot. Madilim-dilim pa lamang ng ako'y umalis at kitang-kita ko ang dami ng mga street vendors na nagtitinda ng mga Rosas at tsokolateng hugis puso. Bibili sana ako pero hindi ko magawa-gawa pagkat kulang ang allowance ko. Kahit saan ka lumingon ay puro mga estudyanteng may hawak ng Rosas ang makikita, mapalalaki man o babae. Pagpasok sa silid ay sila Patrick at Rommel pa lamang ang nadatnan ko na nagdidikit ng palamuting puso sa may pisara.

^3p-l. Ilang saglit makaraan ay dumating na si Ma'am Shiela at nagkaroon kami ng Regional Achievement Test, paglalapat ng itim sa mga letrang may kalakip na bilog na iyong napiling sagot gamit ang lapis at iyon ang naging sistema ng naturang pagsusulit. Naging mahirap sa akin ang sumagot sa bawat aytem pagkat di sanay, naging tuloy mabagal ako sa pagsagot. Nang malapit ng matapos ang oras ay nanghula-hula na ako. Maging sa oras ng Physics hanggang oras ng AP ay nagkaroon rin kami ng Regional achievement test. Hindi ko lamang natapos sagutan ang test sa AP sapagkat masyadong kapos ang ibinigay na oras sa amin ni Ma'am Myles. Ilang saglit pa'y recess na at sila Jobil at Jessa ang nakasabay ko patungong canteen, may mangilan-ngilan na ring mga estudyanteng lalaki ang nagpo-propose sa kanilang iniibig kaya kilig much to the bone kami.

^3p-m. Nang sumagot ang babae'y halos di na magkarinigin sa ingay ng mga nagtitilian. Nakiusyoso pa kami kahit nakapasok na ang dalawa sa silid. Maya-maya pa'y dumaan na si Sir Velarde at saka pa lamang kami pumasok sa silid. Nagkaroon rin kami ng RAT sa subject niya at talaga namang nahirapan ako sa pag-intindi ng bawat teksto kaya halos lumuwa ang mata ko sa kakabasa ng mahahabang teksto at dumugo ang utak sa kakaintindi, sana nama'y maging maganda ang makuha ko. Kung hindi lang araw ng mga puso'y malamang nasapok na ni Sir Velarde ang mga kamag-aral kong walang ginawa kundi maging pasaway at ang iingay talaga nila. Lalo pa tuloy ako nawala sa pokus.

^3p-n. Ilang saglit pa'y English time na at si Ma'am Guevarra pa rin ang in-charge sa nangyayaring RAT. Kahit anong pursigi ko sa pag-intindi'y mahina talaga ako pagdating sa Reading comprehension. Matapos ang test ay nagrepaso kami at isa-isang pinagbasa. Paano ako magiging mahusay na guro kung sa pagbabasa pa lamang ay boses palaka na, marahil ay paos lang. Nasiyahan naman ako kay Ma'am Guevarra sapagkat sa tuwing may pinapakuha siyang gamit sa kanyang department, ako ang nauutusan. Ibig sabihin ay may tiwala siya sa akin at mas iigihan ko pa para lalo pang mapagkatiwalaan, ni answer key nga'y sa akin din pinapakuha, sa pigiging matapat ko naman ay siyempre di ko tiningnan ang sagot. Dahil uwian na, dumeretso na ako na ako sa paglabas. 

^3p-o. Sa wakas at natapos din ang RAT. Pagdating sa may Ison site ay laking nganga ng bibig sa nasilayan pagkat ang laki ng sawang nahuli nila na walang habas na pinaghahampas hanggang sa mamatay. Sa hitsura pa lang kahit kalayuan ay nakakahilakbot pagmasdan. Saktong nandoon si Monica na matiyagang binubunot ang kaliit-liitang buhok ng mama pagkauwi. Kinagabihan naman at dahil walang pasok kinabukasan ay nagpuyat ako sa paglikha ng kantang aking naiisip. Dahil Valentine's day ngayon, ang tema ng kantang naisip ay tungkol sa pag-ibig. Dalawang oras rin akong naggugol matapos lang ang awitin. Dakong Hating-gabi na ako natulog.

February 15, 2014
Saturday
Year II-046

^3p-p. Sa sobrang lamig ng panahon na halos umabot na sa kaibuturan ng buto'y napaaga ang gising ko subalit umidlip pa rin gawa ng antok na nananatili. Mga ikapito na ng umaga ako bumangon at nag-almusal. Matapos kumain ng agahan ay naisipan kong gumawa muli ng panibagong kwento. Hindi ko lang naituloy sapagkat inalok ako ng Ate na manood ng Frozen. Kahit na animatedlamang ang mga Character ay halatang totoo kaya maeenganyo kang panoorin ito at sarap pakinggan sa boses ang kanilang pag-awit na akalaing nanonood ka ng Teatro, Lalo na nung kumanta si Elsa ng “Let it go”. Malamig din sa pakiramdam ang panoorin ang Frozen sapagkat nakapaloob sa panahon ng tagniyebe ang kwento at ito'y napapanahon lalo't ngayon ay taglamig. Napukaw ng husto ang damdamin ko sa naging eksena ng iligtas ni Anna si Elsa laban sa lalaking nagtraydor sa kaharian nila, pero sa kasamaang palad ay tuluyang naging yelo si Anna dahil sa sumpang nilikha ng kanyang kapatid.

^3p-q. Dahil sa labis na pagmamahal ni Elsa kay Anna ay naalis ang sumpa at naging makabuluhan ang ending ng story. Sa ganda ng Frozen, kahit ilang beses ulitin ay di ka magsasawa at sarap pang ulit-ulitin. Matapos manood ng Frozen ay ipinagpatuloy ko na ang paglikha ng kwento at mga tanghali ko ito pansamantalang itinigil pagkat manananghalian pa. Sana'y maging kasing ganda ng Frozen ang aking kathang Kwento na kaadikan panoorin o basahin ng lahat at gusto ko'y maging emsyonal ang mga mambabasa sa aking kwento na nangangahulugang naging effective ito. Matapos kumain ay nanood ako ng Telebisyon.

^3p-r. Kahit paminta'y di mahahalata sapagkat saksakan sa kapogihan ang halos lahat ng kalahok ng I am pogay at titili kahit mga kabaro nila. Maski nga ako'y naakit sa hitsura nila at daig pang pomorma kaysa sa straight pero mga binabae pala. Matapos manood, ginawa ko na ang madalas gawin tuwing hapon at iyon ay matulog. Mga bandang Alas-kwatro na ko nagising at ipinagpatuloy ang paggawa ng kwento. Medyo naantala lamang sapagkat di ko mapigilan ang sarili sa panonood ng Telebisyon at iyon ang hilig ko. Matapos manood ng paboritong programa'y paggawa pa rin ng kwento ang inatupag at hating-gabi na ako natulog.

February 16, 2014
Sunday
Year II-047

^3p-s. Naging napakagaan at masaya sa pakiramdam ang naging umaga ko sa muling paggising sapagkat lumipas ang maraming araw at dumating nga ang araw na ito na nanatiling buhay at di pinababayaan ng maykapal kahit alam kong marami na akong kasalanang nagawa, sadyang napakabait ng maykapal sa atin kahit gaano ka pa kasama at handa ka niyang patawarin kapag nagsisisi ka sa lahat ng masamang nagawa mo. Dahil sa maganda ang umaga ko'y umaasang magiging maganda ang buong araw at maging sumunod na araw. Pagkabangon pa lamang ay kaagad akong kumain ng agahan, siyempre ilang oras ba namang hindi nasusuplayan ng pagkain ang sikmura kaya kailangan malamnam at sinabayan din ng maraming tubig matapos magkape para iwas toxic sa katawan.

^3p-t. Maya-maya'y nagwalis na ako at nagpunas at kay sarap ng buhay kapag may gingawa ka kaysa sa nakaupo lamang at buhay alamang pag lumukso naman patay. Ng masiguradong malinis ang bahay, ipinagpatuloy ko na ang paggawa ng kwento at sa dami ng imahinasyong kailangang isulat ay halos mapudpod na ang ballpen sa kakasulat ng maraming salita. Bakit kaya hindi na lang Writer ang kunin ko at tutal ay hilig naman gumawa ng kwento at kanta pero hindi na pwede pagkat nakapagdesisyon na ako. Saka pa lamang ako tumigil sa pagsusulat ng kwento kung kailan ubos na ang tinta. Ilang saglit pa'y oras na upang kumain na tamang-tama sa tiyang kumakalam na.

^3p-u. Matapos kumain ay naisipan kong libangin ang sarili sa paglalaro ng Flappy bird. Tuwa ang nadama ko sa sarili pagkat 30 na ang kaya kong abutin at umaasang mahihigitan pa iyon. Muli nanaman akong dinalaw ng antok na kahit ayaw pang matulog ay kailangan na kaya waka akong nagawa kundi tumulog. Pagkagising ay saka muli ako gumawa ng kwento at ang dami kong naiisip na sitwasyong pwedeng idugtong sa kwento kaya sige lang sa pagsulat hanggang sa abutin ng gabi. Maya-maya'y paglalaro muli ng Flappy bird ang sunod kong inatupag at saya ang namutawi sa dibdib na kaninang kinakabahan pagkat 45 na ang kaya kong abutin at talagang naadik na sa larong iyon. Sa uulitin muli kapag may time at ilang saglit pa'y natulog na ako.

February 17, 2014
Monday
Year II-048

^3p-v. Parang dumaan ang araw na walang pasok ng isang iglapan lamang at may pasok nanamang muli. Medyo inaantok pa at hinihikab ng lagay na ibig pang matulog ng matagal pero pinilit ko pa rin bumangon at nag-almusal. Malapit ng sumapit ang Alas-sais ng makaalis ng bahay at pagdating sa hintayan ng tricycle ay napakahabang pila ang sumalubong sa akin kaya naman malaki ang posibilidad na mahuli muli sa pagpasok kung di kaagad dadating ang mga tricycle. Naging masuwerte naman sa akin ang araw na ito at kaagad na nakasakay. Pagdating sa eskwelahan ay ang daming estudyanteng nagsiksikan sa labas ng gate. Matapos ang Flag ceremony ay saka pa lamang kami pinapasok at di naman sinita sa pagpasok. Sa oras ng Values, nagtsek lamang kami ng Ugaling Pilipino.

^3p-w. Kahit naging masuwerte ang araw na ito'y pumalit naman ang kamalasan sapagkat di ko nadala ang Ugaling Pilipino, todo hingi tuloy ng tawad ang ginawa kay Ma'am Fabiana. Matapos magtsek ay nag-discuss si Ma'am at may mga sandaling kami'y nagre-recite. Kahit nga medyo nahihiya'y nagawa ko pa rin ituro sa kanila ang Seven deadly sins, nakakawalang respeto lamang sa sarili sapagkat di sila nakiking at panay daldalan. Hindi sana maging katulad nila ang magiging estudyante ko kung sakaling Education ang kunin ko. Sa kadahilanang ayaw naman nilang matuto tungkol diyan ay hindi ko na ipinagpatuloy pa ang pagsasalita at naupo. Maya-maya'y oras na ng TLE at nagturo lamang si Sir Balbin tungkol sa Topology of internet. Parang sarap magkaroon ng sariling computer shop kapag alam mo ang Topology at pwede mong ma-transmitt ang iyong Data kahit sa anong Personal computer.

^3p-x. Ilang saglit pang makalipas ay MAPEH na at sa oras na ito'y itinuro sa amin ni Ma'am Mina ang tungkol sa Baroque Period, ang kaninang pagtuturo hinggil diyan ay nauwi muli Personal experience at todo kinig kami kahit labas sa lesson sapagkat masaya ang kwento ni Ma'am. Kahit sinabi ni Ma'am na mahirap maging guro minsan ay hindi pa rin nagbabago ang kagustuhan kong maging tulad ni Ma'am. Sa oras ng Filipino ay nagtsek lamang kami ng RAT na itineyk nung Biyernes at pagkatapos ay nag-aytem analisis kami. Hindi ako nasiyahan sa aking nakuha pagkat mababa. Ganon rin sa oras ng English at sobra na akong na-frustrate sa nangyayari, sineryoso ko naman ang Exam at bakit hindi pa rin ako makakuha ng mataas?

^3p-y. Maging sa oras ng Math ay nagtsek kami at ang naging resulta ay hindi maganda pagkat lahat kami'y mababa ang nakuha, paano naman makakakuha ng mataas kung sakit sa ulo ang hirap ng test sa Math at kahit Math ang Favorite subject ko'y sa totoo lang ay nahihirapan na ako sa subject na ito. Sa oras naman ng Physics ay nagtsek rin kami ng test paper at talagang hindi ako pinapalad na makakuha ng mataas na marka kahit nagseseryoso na. Buti pa si Leonardo at palaging Highest at ang gaganda ng markang nakukuha, anu kayang natatagong sikreto ng lalaking iyon? Kung makapag-isip ay walastik at talagang Jimmy Neutron ang dating ng utak. Gulat ako sa sinabi ni Perfecto pagkat blangko pala ang grado namin sa TLE at maging ang lahat ng bumagsak nitong First grading kaya dali-dali namin pinuntahan si Sir Balbin.

^3p-z. Sinabi ni sir na lalagyan naman niya iyon bago kami grumadweyt. Sa wakas at may kasabay na rin ako sa pag-uwi at iyon ay si Perfecto at napakabait niyang bata pagkat naiintindihan niya kung sino ako at naaawa pa nga, doon ako nakaramdam na may halaga pa pala sa kapwa ko. Pagdating sa bahay at dahil medyo bagsak na ang mata'y natulog na muna ako pansamantala. Mga ikaanim na ako nagising at nanood ng Telebisyon. Masaya ako sa sinabi ng MMDA na gagawin na lamang 4 days per week ang pasok sa eskwela pero sa mga lugar lang iyon na maapektuhan ng Pagtatayo ng Skyway 3 at upang makaiwas na rin sa mabigat na trapiko. Nawa'y guminhawa ang bansang Pilipinas kapag natapos ang project na ito.

February 18, 2014
Tuesday 
Year II-049

^3q-a. Sadyang napakabilis ng takbo ng oras at sumapit muli ang madaling araw kaya kahit inaantok pa ang matang galing sa tulugang napakalawig ay kailangan ng idilat upang kaharapin ang panibagong buhay sa araw-araw at iyon ay pumasok sa eskwela. Pagdating sa eskwela'y saktong nadatnan kong nagsisiksikan ang mga estudyante sa labas at di pa kami pinapapasok. Buti na lang at nandoon sina Mary Joy kaya may kakilala ako at may kasabay sa pagpasok. Sa oras ng Ekonomiks ay itinuro sa amin ni Sir Arnulfo ang paraan ng pagpapataw ng pagbubuwis, maya-maya'y isa-isa niyang inanunsyo ang nakuha naming marka nung nagkaroon ng activity at marami ang nakakuha ng itlog, buti na lamang at sampo ang nakuha ko kaya lahat ng nakakuha ng ganong marka'y tuturuan ang mga kamag-aral sa kung paano magkompyut ng buwis. Feel na feel ko na talagang maging guro at habang tinutulungan ko ang aking mga kamag-aral ay nahahasa na ang aking kasanayan at mas gusto ko pang magturo sa mga taong bukas ang teynga.

^3q-b. Tumigil lamang kami sa pagtuturo ng oras na ng TLE at nagkaroon kami ng maikling pagsusulit. Kahit di ako nakapagrepaso'y masaya pa rin ang loob ko pagkat mataas ang nakuha ko, parang bumabawi lang sa mga naging marka kong laging lagagpak. Sa oras ng MAPEH ay hindi pa pumapasok si Ma'am Mina kaya maingay muli ang silid lalo na yung nasa likuran ko. Maya-maya'y dumating na si Ma'am Mina at sa di inasahan ay nagliyab ang mata sa amin pagkat pinapabayaan raw ang aming silid na madumi. Nakapagturo pa rin naman si Ma'am kahit nasermunan kami. Sa oras ng Filipino'y nagsagot lamang kami ng Pre-test, malas at di ko dala ang Test paper ng Pre-test kaya naging pahirapan sa akin ang maki-share sa katabi.

 ^3q-c. Sa oras naman ng English ay nagkaroon kami ng Group review. Tuwang-tuwa ako sa dalawang anak ni Ma'am Templanza pagkat ang haharot. Nung bibili ng Candy ang isa niyang anak ay ako ang naatasang sumama sa kanya at halos mapagod ako sa kakasaway pagkat takbo ng takbo, doon ko naisip na masarap na magkaroon ng batang kapatid pagkat naaliw ka sa kanila. Sa oras ng Math ay inanunsyo sa amin ni Sir Harren ang tungkol, sa magiging project namin sa Fourth grading at talagang napakahirap gawin, sa susunod na linggo pa ang pasahan kaya over pressure na ako ngayon pa lang.

^3q-d. Maya-maya'y Physics time na, itinuro sa amin ni Sir Martin ang Logic gate of Circuit at kahit anong kinig ko'y wala pa ring pumapasok sa utak kaya ang naging resulta, itlog ang nakuha ko nung nagkaroon kami ng maikling pagsusulit at nakakahiya kay Sir Martin, babawi ako next time at ipapakita mo kay Sir Martin na Deserving akong makakuha ng mataas na marka. Umuwi akong lugmok at di maipinta ang pagmumukha. Upang maibsan ang pagkabigong nararanasan ay nilibang mo ang sarili sa paglalaro ng Flappy bird. Kinagabihan at dahil may Long test muli sa MAPEH at Physics ay nagrepaso ako. Mga ikasampo na ng gabi ako tumulog. Hindi naman ako makatulog ng maayos pagkat nagsabay ang mainit at malamok na sitwasyon, ang iingay ng ugong nila na sakit sa teynga, ang Mama naman ay walang ginawa kundi patayin ang mga pesteng nanghahasik ng kati at sakit.

February 19, 2014
Wednesday
Year II-050

^3q-e. Madaling araw na subalit hindi pa rin ako makatulog ng maayos gawa na napakalamok sa kwarto at panay kamot pa sa balat, nakaidlip ako subalit pansamantala lang. Pagkagising ay eksaktong Alas-singko na pala kaya nagmamadali na ako sa pagkilos at baka mahuli. Buti na lamang at wala pa si Sir Arnulfo pagdating ko sa Eskwela. Ilang saglit pa'y dumating na nga siya at nagturo hinggil sa pagbabadyet ng pamahalaan. Natutuhan ko kay Sir na ang pera'y umiikot lang sapagkat una matatangap mo ito mula sa sweldo, pagkatapos ang ilang bahagi'y ibabayad sa buwis at ang buwis ang magiging pondo ng pamahalaan upang makapagbigay ng pampublikong serbisyo sa atin at pamahalaan rin ang nagpapasweldo sa lahat ng kanilang kawani kaya napakahalaga ng pera pagkat siya ang nagpapagana sa sirkulasyon ng bansa. Parang dugo lang ang salapi na paikot-ikot.

^3q-f. Matapos magturo'y nagkaroon kami ng seatwork. Dahil kinapos na sa oras ay naging takdang-aralin na lamang iyon. Sa oras naman ng TLE ay nagkaroon kami ng Long test, nakinig naman ako sa tinuro niya kaya kahit di nakapagrepaso'y naging sisiw pa rin sa akin ang mga katanungan. Habang hindi pa dumarating si Ma'am Mina'y todo pagrerepaso na ang ginawa ko at pagkakabisado ng bawat kataga. Pagkapasok pa lang ni Ma'am Mina ay sinabi niyang bukas na raw ang Long test pagkat manonood kami ng Musical performance ng SPA. Nagtungo kaming lahat sa kabilang gusali at matiyagang pumila. Ilang saglit pa'y pinapasok na kami at nagsimula ng tumugtog ng instrumento ang lahat ng kasapi. Parang totoong radyo ang kaharap ko habang nakikinig ng magandang awitin sapagkat walang mintis ang pagtugtog ng iba't ibang instrumento at bagay na bagay sa inaawit ng isa.

^3q-g. May ilan pa akong kamag-aral na napasabak sa biritan lalo na si Denzel na halos ikayanig na namin ng bumirit ng “Roar”, di niya malaman kung kakanta ba ng taas o babaan na lang kaya nawawala na tamang intonasyon. Maya-maya'y bumalik na kami sa silid at kasabay namin si Sir Velarde sa pagpasok. Nagrepaso lamang kami sa oras ng Filipino at si Sir Velarde na habang nagtuturo'y may pahirit na patawa kaya labis ang aming paghagakhak, sumakit tuloy ang tiyan ko sa kakatawa at ganyang guro ang gusto ko, yung magaling magpatawa. Sa oras naman ng English ay nagrepaso rin kami at maya-maya'y nagkaroon kami ng Activity. Masaya nanaman ako pagkat mataas muli ang nakuha ko. Sa oras ng Math, si Ma'am Shiela ang naging guro namin at nagtungo kami sa kanya-kanyang kagrupo.

^3q-h.  Nagkaroon kami ng Group study. Todo pagrerepaso na ang aming ginawa at sana'y mataas ang makuhang marka sa aming batch sa darating na NAT. Habang di pa dumarating si Sir Martin at sa takot na magitlog muli'y nagrepaso ako. Ilang saglit makalipas ay dumating na nga si Sir Martin at kami nga'y nag-long test. Kahit ilang ulit kong inintindi ang Logic gate ay wala pa rin at di kataasan ang nakuha ko, atlis di itlog. Kinahapunan ay dumating na si Mama galling shopping at sinabing nagpunta raw siya sa New Era University upang alamin ang ipapasang requirements, mukhang may tiyansa pa talaga ako makatungtong sa kolehiyo kahit bali-baliko ang aking Marka, yun nga la'y kailangang 85 pataas ang General average na makuha ko ng Third year o Fourth year para makapag-take ng exam sa New Era, gusto ko pa naman mag-aral sa unibersidad na iyon, bukod kasi sa malapit ay magandang pasukan ang eskwelahan na iyon at mukhang Friendly pa ang magiging kaklase ko. Wish ko lang na umabot sa 85 ang General average ko kapag nakompyut at yun na lang ang tanging pag-asa ko. Dala ng matinding antok, di ko na tinapos pang panoorin ang paboritong programa at kaagad ng natulog.

February 20, 2014
Thursday
Year II-051

^3q-i. Sa sarap ng aking tulog at pagkagising ay kita ko sa malaking orasan na Alas-singko na pala at kailangan ko ng magmadali. Ang haba pa ng pila sa hintayan ng tricycle at talagang mahuhuli na ako sa pagpasok. Ilang saglit pa'y dumating na ang tricycle at saktong nakasabay ko si Bernadette kaya may kakwentuhan muli. Pagdating namin sa eskwela'y daming estudyanteng nagsisiksikan sa labas ng eskwelahan at pagkabukas ng gate ay hindi maiwasang maggitgitan, ang resulta'y gusot-gusot na uniporme ang inabot ko. Buti na lamang at wala pa yung mga kamag-aral ko na mahilig mamintas kaya ako'y napanatag sa pagpasok, gawa-gawa din ng assignment sa Physics at Review naman sa MAPEH habang di pa dumarating si Sir Arnulfo.

^3q-j. Minuto lang ang pagitan nang dumating na nga si Sir Arnulfo at itinuro ang tamang paggatos ng pamahalaan sa kaban ng bayan. Sa pag-alis ni Sir at bago pa man ito makalayo'y kinausap ko na siya pagkat kukuhain ko na ang aking Report card noong Third Year ako. Sinabi niyang sa uwian ko na lang kukunin. Sa oras ng TLE ay hindi magandang balita ang ipinahayag sa amin ni Sir Balbin pagkat karamihan sa amin ay lumagapak ang Marka sa naging pagsusulit kahapon at nirepaso kami matapos niyang magsalita. Habang daldal ng daldal si Sir Balbin ay lihim akong nagrepaso sa MAPEH. Wala pa nun si Ma'am Mina kaya lumawig pa ang pagkakataong makapagrepaso. Ilang saglit pa'y dumating na nga si Ma'am Mina at nagsimula na ang pagsagot sa Long test at sa paraan ng pagsagot ay iitiman ang bawat bilog ng Letra upang masanay raw kami sa pag-itim kapag NAT na.

^3q-k. Naging madali lang sa akin ang test kaya kaagad akong natapos at ng Tseking na'y saya sa dibdib ang nadarama ko pagkat mataas na marka ang nakamit ko, nawa'y magpatuloy na ito hanggang sa ako'y magtapos sa Kolehiyo. Ng oras ng recess ay nagtungo ako sa Guidance office upang kunin ang NCAE result pagkat kasama rin iyon sa requirements ng New Era. Abala pa ang guro sa pangangaral sa estudyanteng nagpalitan ng lakas kaya naghintay pa ako ng matagal. Ng matapos siya sa panenermon ay ibinigay na niya sa akin ang NCAE result pero photocopy lamang. Pagbalik sa silid ay nasa pisara na si Ma'am Templanza at Sir Buenaventura. Nagkaroon kami ng Seatwork sa English at kahit di ako magaling sa wikang Ingles, naging madali sa akin kung paano gamitin sa pangungusap ang mga Conjunction words kaya ang resulta'y isa lang ang mali ko out of 15.

^3q-l. Sa oras ng Math, nagkaroon kami ng Group review, malas ko lang at tanga pagkat di ko nadala ang NAT reviewer kaya nanghiram pa ako sa ibang seksyon. Buti na lang at dala ni Justine ang kanyang NAT reviewer kaya nakapagrepaso pa ako ng maayos. Ako at si Rommel ang tumulong sa mga kamiyembro naming mahina sa Math at grabe pagkat hirap turuan ni Villaresis, mahabang pasensiya ang pinairal ko at di ko nagawang sigawan pagkat batid kong lalo pang di siya magseseryoso kapag dala-dala ang kabigatan ng loob. Natigil lang ang aming Group review ng dumating si Sir Martin at nagrepaso kami. Di muna kami umuwi at sinamahan ako ni Perfecto sa pagtungo sa AP deparment upang kuhain ang report card.

^3q-m. Ang kabang nanalatay sa dibdib ay di ko na maiwasan ng mahawakan ko ang Card at sana'y umabot sa 85 ang average grade ko pero di naman pala pagkat kinapos ng isang puntos, sayang at goodluck na lamang sa paghahanap ng bagong eskwelahang papasukan. Maya-maya'y nagtungo kami sa Ikaapat na palapag ng kabilang gusali pagkat may tutorial kami sa Math. Mga ikatlo na ng hapon kami umuwi at dahil walang available na tricycle, ayaw ko man maglakad pagkat mainit ang panahon pero ginawa ko pa rin makarating lang sa bahay. Hindi ko ibig ibalita kay Mama na hindi umabot sa 85 ang grado ko ng Third year pero nasabi ko pa rin upang makapaghanap pa siya ng ibang school, katakot takot na sermon ang inabot ko sa kanya at sising-sisi ako. Kung maibabalik ko lang ang nasayang na panahon, babaguhin ko ang lahat para di ako mahantong sa gantong kapalaran. Ang mahalaga'y nagsisi ako sa naging nakaraan, matuto sa kasalukayan at kaharapin ng buong loob ang kinabukasan na may pagbabago.

February 21, 2014
Friday
Year II-052

^3q-n. Hindi nanaman ako maagang nagising pero hindi naman ako na-late sa pagpasok at may bakante pang oras upang magrepaso pagkat ngayong araw ang aming Post Test ng NAT. Ilang saglit pa'y dumating na ang aming review teacher na si Ma'am Shiela at ang inakalang sa answer sheet na may apat na bilog na kailangang itiman sa pagsagot, nagkakamali pagkat sa papel sasagot at di ako nakapagdala ng Papel, kinailangan ko pang lumabas upang bumili kaso pagkabalik sa silid ay kailangan may pahirit kang knock knock o Pick up lines para makapasok, may ilan rin akong kamag-aral ang nahuli at kailangang mag-isip ng pahirit upang papasukin. Buti na lang at kaagad akong nakapag-isip at napabirit ako na wala sa oras kaya halos mayanig ang buong silid sa labis na pagtawa ng aking kamag-aral.

^3q-o. Grabe at ang saya ng klase at umaga namin kapag si Ma'am Shiela ang magbantay sa amin, daming ka-eklabuhan. Matapos ang tawanan ay nagsagot na ako sa Post test. Ang hirap talaga ng Math at sakit sa ulo. Maging sa oras ng Physics ay nagkaroon rin kami ng Post test at naging madali naman sa akin ang test. Sa oras naman ng AP, matapos ang pagsagot sa post test ay nagsagawa kami ng item analysis. Kainis at nakakawalang gana sa loob pagkat ang baba ng nakuha ko, inintindi ko na nga ang bawat tanong bago sumagot, pambihirang utak na iyan at palaging palpak. Maya-maya'y recess time na pero di ako kumain at nagrepaso lamang. Hindi naman ako makapagrepaso ng maayos pagkat ang iingay ng aking kamag-aral, sila Cynt naman ay panay pang-aasar ang ginawa sa akin, di ko na lang sila pinansin at lumayo sa kanila.

^3q-p. Lumipas ang maraming minuto'y pumasok na sa silid si Sir Velarde, kahit saang angulong titingnan maging ang asignaturang Filipino'y mahirap na rin o sadyang mahina lang ang ulo ko sa pag-unawa. Pagkatapos sagutan ang post test, si Bacsal naman ay di ko sukat akalaing sasabihing naging Crush raw ako pero batid ko sa sarili na nagbibiro lamang siya, sinakyan ko na lang ang pangloloko niya at kung totoo man, may nagkakagusto pa pala sa isang katulad ko na bulaklakin ang puso. Kahit paano'y natuwa naman ako kay Bacsal maging kay Rommel, asa naman siRommel na may gusto ako sa kanya, di kami talo. Sina Cynt naman ay talagang papansin sa amin kaya lalo pang kumulo ang dugo ko sa kanila at may time na nangtatapik.

^3q-q. Natigil lang ang aming pag-uusap tungkol sa lovelife ng pumasok si Ma'am Guevarra. Hindi naging sakit sa ulo ko ang mga Grammar at mas madali pa nga ang naging pagsusulit sa English kaysa sa Filipino. Sa dali ng pagsusulit, kaagad ko rin naman natapos. Saglit na umalis si Ma'am Guevarra at habang nagsusulat ako sa may pisara'y bigla na lamang ako hinubuan ni Cynt, napahiya ako sa marami kong kamag-aral ng gawin iyon ni Cynt, di ko naman pwedeng palagpasin ang di makataong pagtrato sa akin ni Cynt kaya di ako nagdalawang isip na magsumbong kay Ma'am Guevarra. Pasalamat ang mokong hindurukot na iyon dahil di ko ipinarating sa Guidance. Parang nabiyayahan ako ng hustisya ng pagalitan siya ni Ma'am at di lang basta pinagalitan kundi dinuro pa.

^3q-r. Laking pasalamat ko may Ma'am pagkat ipinagtanggol niya ako laban sa mga taong mahilig manghamak ng kapwa. Kahit paano'y nabawasan ang hiyang nadarama sa dibdib pero andiyan pa rin. Sa hiya'y di na ako nakadalo pa sa tutorial. Ilang araw ng di pumapasok si Jenny mae at Jessa kaya naisipan kong dalawin sila. Kasama ko si Jobil sa pagtungo sa kanila at pagdating, tsikahan ang ginawa namin. Ilang saglit pa'y nagtungo na kami sa bahay ni Jenny mae, kaya pala di ito makapasok gawa raw na nabati ito.

^3q-s. Kahit na di maganda ang nangyari sa akin kanina, naging masaya ako dahil sa kanila lalo na nung nakipaghabulan kami sa salbaheng bata, masyadong maligalig at sisipain ka niya kapag nahuli. Pagsapit ng patak-patak Alas-dos ay kinailangan na namin umalis. Sa harot at pagiging Hyper ni Jobil ay nawala ang pakikisama ko sa kanya sa pag-uwi kaya pinalabas ko sa kanya na pupunta ng Bagong Silangan at kailangan naming maghiwalay. Paniwala naman siya. Nang masiguradong nakakalayo na ay saka pa lamang ako kumilos pauwi. Labis akong na-haggard pagdating ng bahay kaya matapos kumain ay kaagad akong natulog. Hindi ko na sinabi kay Mama ang tungkol sa nangyari sa eskwelahan pagkat iinit nanaman ang ulo nito. Weekend nanaman kinabukasan kaya nagpuyat ako sa pakikinig ng tugtog gamit ang telepono. Nang dalawin ng antok ay saka pa lamang ako natulog.

February 22, 2014
Saturday
Year II-053

^3q-t. Kahit na lumipas na ang maraming oras simula ng mapahiya ako sa harapan ng aking mga kamag-aral at pinagtanggol na ni Ma'am Guevarra, hindi ko pa rin maiwasang lamunin ng hiya at naiisip ko sa aking utak na malamang ay pinag-uusapan na nila ako, pinag-uusapan nila ang maitim kong singit at pinag-uusapan na nila ang makapal na buhok sa aking likuran, nakakahiya at di dapat nila makita iyon lalo na't itinakda ang parteng iyon na maselan at di dapat ipakita, loko-loko talaga si Cynt at di ko alam kung bakit ganito siya sa akin. Ipinagsawalang bahala ko na lamang ang nangyari kahapon at inisip na lilipas din iyan. Pagkabangon at upang sumaya-saya naman ang aking kalooban ay nagpatugtog ako.

^3q-u. Bukod sa nangyari kahapon ay lalo pa akong nalulugmok pagkat di ko pa alam kung saang eskwelahan ako mag-aaral, Pebrero na. Sabi sa akin ng Mama na sa QCPU na lamang mag-aaral pagtungtong ng Kolehiyo pagkat sila lang ang tatanggap sa grado ko pero hindi ko nais mag-aral doon dahil parang sa Batasan lang nag-aral at kailangan ay makalayo-layo naman ako, yung parang bagong place o Environment. Sasama sana ako kay Mama sa paghahanap ng Eskwela pero sinabing manatli na lang sa bahay. Matapos magpatugtog ay ipinagpatuloy ko ang paggawa ng Kwento. Mga tanghali ng pansamatala kong itinigil at nananghalian.

^3q-v. Ilang araw na rin hindi naliligo gawa na malamig ang lagay ng panahon kaya giniginaw man ay kailangan ng mabanlian ng tubig ang katawan. Feeling Presko matapos maligo. Maya-maya'y naisipan kong manood ng telebisyon. Ang gugwapo talaga ng mga kalahok sa I am pogay at marahil kung di ako pa-girl kumilos at magpakalalaki'y malamang mapapabilang rin ako sa ganong patimpalak. Di ko nga akalain na may nagkakagusto pala sa akin at kahapon lang niya inamin, hindi ko lang alam kung dahil ba sa hitsura ko oAttitude. Saksakan sila sa kakisigan pero Beki pa rin. Habang nanonood ng telebisyon ang pagdating naman ni Mama at sinabing baka sa TIP ako mag-aaral pagkat wala raw entrance exam doon at pupwede ang grade ko sa unibersidad na iyon, tuwa ang nadama mo sa dibdib pagkat sa wakas ay may malilipatan na akong eskwelahan pero di pa buo ang desisyon kung doon ba ako mag-aaral pagkat marami pang eskwelahan ang pagpipiliin.

^3q-w. Nang antukin ay pansamantala akong natulog. Pagkagising at dahil kabato kapag sa loob ka lang ng bahay, naglaro muli ako ng Flappy bird. Tuwa sa dibdib ang nadama ko pagkat naka-78 ako, sa uulitin muli kapag may time. Kinagabihan ay muli nanaman namin nadama ang simoy paskong panahon at dahil malamig, halos imaluktot ko na ang katawan. Di pa ako inaantok ng gabing iyon kaya naisipan kong ipagpatuloy ang nasimulang kwento. Sa dami ng imahinasyong pumapasok sa aking utak, di ko matapos-tapos ang kwento. Mga Alas-onse na ako natulog.

February 23, 2014
Sunday
Year II-054

^3q-x. Mga bandang ikapito ng umaga ng magising ang katawang lupa ko. Di ko batid sa sarili na bakit kakaiba ang nararamdaman ko ngayon, gawa ba nung nangyari ng Biyernes pero parang iba ang ibig ipahiwatig, ipinagsawalang bahala ko na lang at bumangon. Nag-almusal at pagkatapos ay sinimulan ko ng sagutan ang Ugaling Filipino. Matapos sagutan ang Ugaling Pilipino'y sinimulan ko ng gawin ang proyekto sa Math subalit hindi ko masimulan gawin dahil hindi ko lubos malaman kung paano Kompyutin ang Trigonometric identities at nakakalito. Naisipan kong magpaturo kay Aldrian pero wala ito sabi ng nanay niya. Naisipan ko na lang magpaturo kay Itang kaya nagtungo ako sa kanila. Hindi naman niya ako maturuan sapagkat abala ito sa paglalaba kaya pinaiwan ko na lang sa kanya ang workbook at textbook, maski siya'y hindi rin alam kung paano sagutan ang trigonometric identities ngunit susubukan niya raw. Hindi na ako gaanong nagtagal pa at kaagad umuwi.

^3q-y. Kinatanghalian ng magtungo kami ng Ate sa SM North Edsa sapagkat manonood kami ng Sine na pinamagatang Starting over again, hindi pa man nagsisimula ang naturang palabas at upang hindi mainip sa kakahintay ay naisipang magtingin-tingin ng mga napakapal na aklat sa National Bookstore. Sa dami ng mga librong nakahilera'y mukhang ginaganahan akong magbasa kahit English pa ang nilalaman pero wala akong sapat na pera upang bilhin ang ibig basahing aklat kaya hanggang kapa-kapa lang. Buti na lang at di gasinong dagsa ang mga tao kahit Linggo kaya di kami nahirapan sa pagkilos. Makalipas ang isang oras ay bumalik na kami sa Cinema at matiyagang pumila. Mukhang hataw sa takilya ang palabas na aming papanoorin pero mas gusto ko pang panoorin ang Abnkkbsnpl ako yung kay Bob ong, kaso nakapagbayad na si ate ng Ticket kaya bawal ng mamili.

^3q-z. Ilang saglit pa'y pumasok na kami sa sinehan. Panay kutkot sa pinamiling Popcorn at Nachos habang di pa nagsisimula ang Movie at ilang saglit ay nagsimula na. Kahit pang-romantic ay may halong Comedy ang show nila Toni at Piolo at daming kakulitan. Noong napapanood ko lang ang trailer nito, inisip ko na boring at hindi ako makaka-relate pero ng mapanood ang full movie nito, nagkamaling akala ako at laking nganga ng bibig sa sobrang ganda ng pelikula, nakakakilig at nakakatawa lalo na nung Ending, daming ka-leading man ni Toni. Inabot kami ng halos apat na oras sa panonood at kaagad kaming nagtungo sa SM Annex pagkat bibili ng bagong phone ang ate. Laking pasalamat ko sa kanya dahil nilibre niya ako sa panonood.

^3r-a. Pagkatungo sa bilihan ng Cellphone, kahit di na bago sa paningin ang mga gadget na android na aking nakikita kahit sa bahay lang, di ko pa rin maiwasang mamangha. Habang namimili ang ate ng telepono, sige lang ako sa paglalaro ng mga Gadget at nag-Enjoy ako ng husto. Sa sobrang kaaliwan sa paglalaro'y di ko namalayang nasa labas na ang ate at kailangan ng umalis. Kailan kaya ako magkakaroon ng ganong kagarang Cellphone. Bago kami umuwi'y bumili muna kami ng Items sa Supermarket at sa dami ng pinamili, grabe at parang kasing bigat ng kalahating kaban ng bigas ang bitbit kong supot. Pagdating sa bahay ay labis kaming nakaramdam ng kapaguran pero masaya ako pagkat nilibre ako ng ate, sa uulitin muli. Hindi pa ako makatulog kaya naisipan kong magbasa ng English Pocket book upang maging bihasa naman sa pagsasalita ng Ingles. Sa sobrang lalim ng mga sentence na kasing lalim ng balon, nahirapan ako sa pag-intindi at sumakit ang ulo ko, mahina pa nga ako pagdating sa Reading Comprehension at dapat ko iyon mapaglinang.

February 24, 2014
Monday
Year II-055

^3r-b. May pasok nanaman at wala namang pasok kinabukasan pagkat ipagdiriwang ang Anibersaryong People Power Revolution, kaya naisipan kong idiretso na lang ang pagbabakasyon at huwag na lang pumasok. Isa pa'y magtsitsek lamang kami ng test paper. Ginising ako ni Mama pero sinabi kong hindi ako papasok, kakatamad kasi pagkat ipit ang araw na ito sa mga araw na walang pasok. Ipinagpatuloy ko ang pagtulog at mga Alas-siete na nagising. Tirik na ang araw sa labas pero dama ko pa rin ang lamig ng panahon kaya mainit-init na Tsamporado ang naisipang agahan. Matapos kumain ay nagtungo ako sa bahay nila Tita Jean. Walang tao sa bahay nila ng datnan ko pero bukas ang Radyo maging ang gate kaya kaagad akong nakapasok. Naghintay ako at makalipas ang ilang saglit, dumating na si Itang. Buti na lang kahit paano'y may alam si Itang kung paano i-solve ang Trigonometry equation pero sa hirap ng ibang aytem, maski siya'y sumuko na sa pagpapaliwanag sa akin, hindi ko pa rin Gets at sa hiya ko naman sa kanya na hirap na hirap na rin ay nagpasya akong aralin na lang mag-isa.

^3r-c. Pagdating sa bahay ay buong loob kong inalam at inintindi ang procedure sa pag-solve ng Trigonometric Identities pero sakit na ng ulo ko, sa ikalawa na ang pasahan pero dalawa pa lang nasasagutan. Isa ang Mathematics sa paborito kong asignatura pero ngayon lang ako naka-ingkwentro ng ganong kahirap na Lesson, palibhasa'y hindi itinuro ng Guro naming walang ibang ginawa minsan kundi magpapogi, hindi naman kakisigan. Minsan di pa pumapasok sa klase namin. Makalipas ang ilang oras na pagtutok sa Trigonometry identities, ayaw ko na at suko na. Medyo wala nanamang kulay ang buhay at nakakabato kaya naisipan kong magpatugtog. 

^3r-d. Party party lang ang aking peg habang umiindak sa saliw ng musika at kahit paano'y natanggal ang aking stress likha ng kakaaral sa Trigonometric Identities. Ganap ng tanghaling tapat at sa takot na baka marindi na ang kapit-bahay na siyang dahilan pa ng hidwaan, labag man sa aking kalooban ay pinatay ko na at natulog. Ang ganda ng naging panaginip ko, para akong nasa ibang mundo na payapa at makulay ang pamumuhay, sana ganon sa totoong buhay, walang away at palaging pagmamahal sa kapwa ang pinapairal. Sa kasarapan ng tulog, Alas-singko na ako nagising at di pa ko nakakagawa ng Project sa Math.

^3r-e. Maya-maya'y nagtungo muli ako sa bahay nina Aldrian pero tulog naman ito sabi ng kanyang ina. Kay Charmlie ako magpapaturo pero maski siya'y di alam ang Lesson sa Math at di raw itinuro sa kanila. Mukhang wala na akong maasahan kundi sarili ko at dahil wala namang pasok kinabukasan, iyon ang inatupag kong aralin matapos manood ng Telebisyon. Paano ako magiging mahusay na guro sa Mathematics kung ngayon pa lamang ay walang-wala na ang aking utak para diyan. Sa totoo lang ay nahihirapan pa rin ako at di pa rin makuha. Ng sumapit na ang hating-gabi, saka pa lamang ako natulog.

February 25, 2014
Tuesday
(People Power Revolution) 
Year II-056

^3r-f. Anibersaryong pagdiriwang para gunitain ang pag-aalsa ng mamayang Pilipino sa pagpapatalsik kay Marcos at makalaya ang bansa mula sa Martial law. Kung ako lamang nabubuhay sa panahong iyon malamang ay makikiisa rin ako sa pagpapatalsik sa pinunong hindi naman maayos ang kanyang pamumuno at may bahid pa ng pagiging tiwali, nangangahulugan na sa kabila ng pagiging ordinaryong tao, may laban tayo sa mga makapangyarihang walang ibang hinangad kundi sariling kagustuhan lamang hindi pangangailangan ng kanyang nasasakupan. Sa kadahilanang walang klase ngayon ay hindi ako maagang nagising. Pagkagising pa lamang ay kaagad ko ng narinig sa balita mula sa Telebisyon na ipapanukala na ng Dep-Ed na gawin sa Trenta mil ang Pasweldo ng mga guro, tuwa naman ako sa panukalang iyan at sana'y ituloy nga ang pagpapatupad upang dumami pa ang mga taong maenganyong maging Guro.

^3r-g. Kaagad kong binuklat at inintindi ang Lecture sa Math matapos kumain at kahit paano'y nakukuha ko na kaya nakapagsimula na ako subalit nahihirapan pa rin sa sumunod na aytem. Madumi at marami ng alikabok sa bahay kaagad, naisipan kong maglinis muna. Matapos maglinis ay ipinagpatuloy ko ang pagsagot. Maya-maya'y pagbabasa ng English book ang sunod kong inatupag, sa totoo lang ay ginawa ko na ang maisip na paraan pero wala pa rin at ipinapahiwatig na mahina talaga ang ulo ko pagdating sa Reading Comprehension, naku at magkokolehiyo na ako. Ng tamarin na sa pagbabasa gawa na ako binabalingoyngoy na, panonood ng Telebisyon ang sunod kong inatupag. Medyo nakakaramdam na rin ng gutom kaya nakisabay na ako sa kanilang mananghalian.

^3r-h. Kinahapunan ding iyon ay naisipan kong magkumpyuter sa labas, tagal na ring hindi nabubuksan ang Account sa Facebook. Inabot na ko ng dilim sa pagkukumpyuter at dahil kakangawit na ang umupo ng matagal, nag-log-out na ako. Sa halip na dumeretso sa sariling bahay, sa bahay nila Cathy ko pa naisipang puntahan. Kahit kailan talaga ay sarap kakwentuhan ang Mama ni Cathy pagkat daming alam na biro, sa Cathy naman ay masyadong busy kahit gabi na kaya di ko siya gaanong nakakausap. Nang sumapit na ang ikawalo ng gabi, kinailangan ko ng magpaalam sa kanila. Diretso kain at nuod ng telebisyon pagdating sa bahay.

^3r-i. Kahit matagal na nangyari sa akin ang hindi kanais-naisi at nakakahiya sa dibdib na pangyayari, hindi ko lang alam kung kakayanin pa ng kalooban kong pumasok kung alam sa sariling marami akong makakasalamuhang mukhang hindi katanggap-tanggap at madalas laging may nakikitang negatibo sa akin, marahil kaya iyon nagawa ng kamag-aral ko na pahiyain ng ganun ganun lang sa dahilang nakikita niyang iba ang paraan ng pakikisalamuha ko sa kanila. Bakit kasi ang hilig ng mga Pinoy na hamakin at pagtinginan ng hindi maganda ang kakaiba? Bakit hindi na lang pabayaan na lang o pakisamahan? Hindi naman nila ikakamatay kung kaibiganin ang kakaiba at kakaiba sila dahil sa kanila ipinagkatiwala ng panginoon ang natatanging kakayahang di kayang gawin ninuman. Sorry siya dahil ganito ako at wala siyang karapatang husgahan ako.

February 26, 2014
Wednesday
Year II-057

^3r-j. Bahagyang naging maulan ang umaga at kahit hiyang-hiya sa sarili buhat ng pahiyain ng maloko kong kamag-aral ay di pa rin ako paapekto sa aking nararamdaman at nagawa ko pa rin pumasok. Mangilan-ngilan pa lamang ang kamag-aral na nasa silid at salamat naman pagkat wala pa sina Cynt, kaya walang bubwisit sa umaga ko. Hindi na nila siguro uulitin ang katulad na ginagawa sa akin pagkat napagalitan na sila at alam kong natauhan na sila, sana nga. Habang di pa dumarating si Sir Arnulfo at gawa nga na ngayong araw na rin ang pasahan ng Proyekto sa Math, hindi man ito tama ay nagawa ko ng kopyahin ang sagot ng aking kamag-aral, disperado na kasi. Sabay tago ng ginagawa at baka itapon sa basurahan pagdating ni Sir Arnulfo. Itinuro niya sa amin ang tungkol sa patakarang pananalapi, kakainis lang sa sarili pagkat laging mali ang sagot ko sa tuwing Recitation.

^3r-k. Sa oras naman ng TLE at dahil hindi ako nakapag-test gawa na lumiban ako sa klase nitong Lunes, lahat ng hindi nakapag-eksam ay binigyan ni Sir Balbin ng Chance at sa likod kami nagsagot. Naging madali lang sa akin ang naturang test, natagalan lang dahil kailangan pang itiman ang bilog na may kalakip na pagpipiliang letra. Sa dalas namin iyan gawin sa tuwing may Post-test o Pre-test ay hindi na kami magkakamali sa pagsi-shade ng bilog kapag boboto na. Sa oras naman ng MAPEH, nagpraktis lang kami ng Graduation song at matapos ay sayaw ng Cha-cha at Swing. Sa halip na magsayaw ay sinamantala ko ang oras sa pangongopya ng sagot ng aking kamag-aral, may maipasa lamang.

^3r-l. Sabay tago muli ng pumasok si Sir Velarde. Muli ko nanaman nakita ang pagmumukha nila Cynt at buti na lang at di na nila ako niloloko, subukan muli nila at makikita nila ang kanilang hinahanap. Nagtsek lamang kami ng Test paper sa oras ng Filipino. Kahit nagugutom na'y tiniis ko na lang at mas piniling gawin ang Project sa Math. Ilang sandali pa'y pumasok na si Ma'am Tenplanza, nagturo ito at pagkatapos ay nagkaroon kami ng maikling pagsusulit. Kainis lang na may halong pagkadismaya pagkat dami kong mali, mas madami pa sa tama samantalang nakikinig naman ako kay Ma'am. Kung sino pa yung madadal at di nakikinig, sila pa yung nakakuha ng mataas na marka. Sa oras naman ng Math, nagbunyi ang hindi nakagawa ng project at mga ngayon pa lang gagawa ng ianunsyo ni Sir Harren na pwede pa magpasa hanggang bukas. May pagkakataon pa upang pagandahin ang Front-page ng aking project. Another saya muli sa dibdib ng ianunsyo rin ni Sir na walang tutorial mamaya.

^3r-m. Matapos ang mahalagang Announcement ay nagtungo na kami sa kanya-kanang kagrupo at nag-Group review. Kahit mahirap turuan at sa kagustuhang makakuha ng tamang sagot ay buong pagpapasensiya kong tinuruan Si Villaresis. Maya-maya'y Physics time na at nagkaroon kami ng Pre-test. Wala nanamang papel kaya bibili muli ako, kung di lang madadamot ang aking kamag-aral di sana'y hindi na ako manghihingi. Ang bilis ng oras at di akalaing uwian na. Sasali pa sana ako sa Practice ng Swing at Cha-cha pero sa sakit ng tiyan ko dala ng gutom, nagpasyang umuwi na lamang. Sige lang sa paglantak ng hapunan at di alintana kung mabulunan man. Matapos kumain ay natulog ako pansamantala. Nang magising ang katawang lupa, nagrepaso ako sa Physics subalit hindi natuloy pagkat nawawala ang aking NAT reviewer, kailangan kong mahanap iyon sa lalong madaling panahon dahil kung hindi, magbabayad ako ng malaki. Dahil problemado ako sa pagkawala ng NAT reviewer, hindi ako makatulog ng maayos. Sana'y mahanap ko iyon.

February 27, 2014
Thursday
Year II-058

^3r-n. Kahit kailan talaga ay ugali ko na ang ang pagiging burara, saan ko kaya huling nailagay ang NAT reviewer at di ko makita, malakas ang kutob ko na baka naiwan ko sa School kaya pagdating sa School ay todo halughog ako sa drawerat nagtanung-tanung sa kamag-aral. Maski sila'y hindi nakita ang NAT reviewerko. Kapag di ko nahanap, malaking problema ang abot ko. Pinahiram lang sa amin ng pamahalaan ang librong iyon para may marepaso sa darating na NAT, tapos wawalain ko lang. What a stupid I am! Hinanap ko na kung saan-saan pero di ko pa rin masumpungan. Hindi ako mapakali at labis akong namomoblema. Saka pa lamang ako naupo ng dumating si Sir Arnulfo. Ipinagpatuloy niya ang pagtuturo sa amin ukol sa patakarang pananalapi. Gustuhin pa man naming manatili pa siya sa patuturo at malaman ang iba pang bagay tungkol sa Ekonomiks pero time na. Sa oras naman ng TLE, nagturo lamang si Sir Balbin, dinadaga nanaman ako ng problema kaya hirap ipokos ang atensyon sa kanya. Sa oras ng MAPEH, nagtungo kami sa Quadrangle upang mag-ensayo ng sayaw ng Cha-cha at Swing.

^3r-o. Nung una'y inakala kong mas madali ang Cha-cha kaysa sa Swing pero mas mahirap pala at kaya naging mahirap pagkat may halo iyong Tango, bukod sa pagiging burara'y parehas kaliwa ang paa ko pero kahit ganon, nakisali pa rin ako sa pagpapapraktis. Marami talagang nahirapan sa pagsayaw ng Cha-cha mix with Tango kaya lalo pang lumakas ang loob ko at naging determinado akong balang araw ay matuto ring sumayaw. Bago sumapit ang Physics time ay pinapasok na kami ni Ma'am Mina sa Silid, inanunsyo niya na hanggang bukas na lang ang pasahan ng Project. Ilang saglit pa'y dumating na si Sir Martin, nagrepaso lamang kami gamit ang pinahiram na NAT reviewer at halos lahat sa aking kamag-aral ay may hawak nun, kainis talaga pagkat naiwala pa iyon. Tuloy ay naging pahirapan sa akin ang maki-share sa katabi. Bago tuluyang umalis si Sir Martin ay inanunsyo niyang magkakaroon kami ng Post-test mamaya sa oras muli ng subject niya kaya naman sa halip na ilaan ang paglamon sa oras ng Recess ay nagrepaso lang ako at tiniis ang gutom na nadarama. Sana'y ma-perpect ko mamaya ang test. Maya-maya pa'y dumating na si Ma'am Templanza, maging sa subject niya'y nagrepaso lamang kami at pagkatapos ay nagkaroon ng Pre-test. Sa oras naman ng Math, pinapunta lahat ni Sir Harren ang mga kamag-aral ko na pasok sa Top ten samantalang sa likuran nila kami pinaupo.

^3r-p. Habang may tutorial ang ilan kong kamag-aral ay binigyan naman kami ni Sir ng pagkakaabalahan at iyon ay ang pagsagot sa Test paper, maraming hindi nakakaalam sa naging mga lesson namin kaya naman hala sila sa kopyahan, maski ako na anong takip sa test paper, nagagaya pa rin ng kamag-aral ang sagot ko. Sa hirap ng mga Equation na kailangang i-solve, naipasa ko ang testpaper na di pa nasasagutan lahat. Bago pa man dumating si Sir Martin ay naging puspusan na ako sa pagrerepaso. Wala nanaman akong dalang papel kaya bumili muli ako sa labas. Pagkabili'y ipinagpatuloy ko ang pagrerepaso at tinandaan ang mga sagot.

^3r-q. Kaba sa dibdib na ang nadarama ko ng pumasok si Sir Martin at sinimulan namin ang Post-test, wala pa sa isang minuto kung ako'y pumili ng letra kaya naman kaagad akong natapos, may ilang aytem lang ni di kumpiyansang tama ang sagot. Nang iwinasto na namin ang kanya-kanyang papel ng kamag-aral, kaasar pagkat dami ko pa rin mali. Anu ba 'tong utak ko at masyadong malilimutin. Sa kabuuan ay marami ang nakakuha ng mataas na marka. Saktong nakasabay ko si Jayson (Alfaro) sa Tricycle pagkauwi kaya walang hiyang sinabi ko sa kanya ang salooobin tungkol sa nangyaring exam namin sa Physics.

^3r-r. Pagdating sa bahay ay kaagad akong kumain at matapos ay nagtungo na sacomputer shop, hindi ko mahanap sa iba't ibang website ang pinapahanap ni Ma'am Mina kaya nagtagal pa ako, gawa na dumarami na ang nagkukumputer na nareresulta ng siksikan at mainit, di ko natiis pang manatili pa at umalis na kahit hindi pa tapos ang project. Mga ikaapat na ng hapon ako nakarating sa bahay at sa layo ng nilakad, nakaramdam ako ng antok at natulog. Saglit lamang akong natulog at pagkagising ay panonood agad ng telebisyon ang inatupag ko na akalang walang pinoproblema, sana mahanap ko na ang NAT reviewer ko. Bago matulog kinagabihan ay nakinig muna ako ng mga tugtog. Nang dalawin ng antok ay saka pa lamang napagpasiyahang matulog.

February 28, 2014
Friday
Year II-059

^3r-s. Gaano man kainit ang nagdaang gabi'y ganon pa rin kalamig sa pagsapit ng madaling araw na tila pinipigilan akong bumagon pero nagawa pa rin at di nagpanaig sa ginaw na nadarama. Medyo minamalas lang ako ngayong araw dahil habang matiyagang nakapila sa hintayan ng tricycle ay di ko namalayang nakaapak na ako sa duming kay lagkit, panay kaskas ng sapatos ang ginawa ko pagkababa at ng masiguradong wala ng naiwang dasto ng dumi'y saka pa lamang pumasok sa silid. Hindi pa iyon nagtatapos ng mapansin kong tila may naamoy ako, may naiwan pa palang dasto ng dumi at ang malas pa'y dumikit pa sa pantalon. Kinailangan ko tuloy magtungon sa iniduro at binanlawan ang laylayan ng pantalon. Mabuti na lamang at mangilan-ngilan pa lamang kami kaya walang gasinong nakaamoy. 

^3r-t. Regular class na pala at wala ng Review day, sayang at may baon pa naman akong Pick-up lines kay Ma'am Shiela na tiyak na ikawiwindang niya pero di ko na maipapakita ang sarili sa pagpapakitang gilas sa kanya maging sa kamag-aral ko. Ilang saglit pa'y dumating na si Sir Arnulfo, nagrepaso lamang kami. Sa oras naman ng Values, mayroon pala kaming long test at di ako nakapagrepaso subalit sa kabukalang loob ni Ma'am Fabiana'y binigyan niya kami ng oras upang makapagrepaso. Nakapagrepaso nga ako subalit di katayugan ang nakuha ko pero tanggap ko na kung ganon ang naging marka ko, atlis hindi nangdugas.

^3r-u. Dahil malapit na ang aming JS prom ay puspusan na ang aming pag-eensayo ng Sayaw ng Cha-cha at Swing. Para sa akin ay di pa ko sigurado kung sasali ba sa JS prom, bakit hindi at minsan lang sa isang taon. Sa school Quadrange namin isinagawa ang pag-ernsayo. Ipapasa ko sana kay Ma'am Mina ang pinaghirapang proyekto pero kulang pa sa Front page. Bago umalis ay inanunsyo sa amin ni Ma'am na sa March 13 na raw ang JS prom sa halip na March 6, may pagkakataon pa upang mamili at makaisip ng susuotin. Sa pag-alis ni Ma'am Mina ang pagdating naman ni Sir Velarde, sumagot lamang kami ng Post test sa pamamagitan ng NAT reviewer, sa pagkawala ng NAT reviewer ay nakiki-share nanaman sa katabi sa halip na hindi na dapat.

^3r-v. Dahil may long test mamaya sa Physics, inilaan ko ang oras ng recess sa pagrerepaso, kahit paano'y gusto ko man lang umangat-angat ang makukuhang marka at determinado akong makamit iyon. Itinigil ko lamang ang pagrerepaso ng dumating si Ma'am Templanza. Nagkaroon kami ng test sa oras ng English at kahihirap unawain ang mga tula't kwento. Sa kakaintindi'y di lang sumakit ang ulo kundi inantok pa ako kaya ng oras ng Math ay pansamantala akong naidlip, di naman makaidlip pagkat ang iingay ng kamag-aral kong saksakan pa sa harot kaya nag-soundtrip na lamang ako, palibhasa'y walang guro.

^3r-w. Bago pa man makaapak ang paa ni Sir Martin sa silid ay panay repaso ang ginawa ko. Nang oras na ng long test, naging madali sa akin ang mga katunungan kaya kaagad akong nakakapili, subalit ang inakalang mape-perfect ay nagkakamali dahil namintisan ako ng anim na aytem sa kabuang Anim na pung aytem. Kakaasar at di ko pa na-perfect. May pagkadismaya akong umuwi, idinaan ko na lamang sa pakikinig ng musika ang nararamdaman at kahit paano'y lumalakas ang kalooban ko. Maya-maya pa'y natulog ako at mga ikaapat ng hapon nagising, naging mainit ang lagay ng panahon nitong hapon kaya labis ang pagdanak ng pawis mula sa katawan. Kinagabihan at bago pumikit ang dalawang mata ay nilibang ko ang sarili sa pakikinig ng musika, para nakakatanggal ng stress at nakakapagbigay pa ng Good spirtit sa katawan kaya naging banayad at mataimtim ang pagtulog ko.