10. October 2013 Journal (Day 274-304)

October 01, 2013
Tuesday
Year I-274

^2T-Y. Maaga muling magigising sapagkat may pasok na at upang di mahuli sa pagpasok sa eskwela. Kahit medyo inaantok pa'y nagpatuloy pa rin ako sa pagkilos at pagkain ng agahan. Oktobre na at dalawang buwan na lamang ang nalalabi bago sumapit ang Pasko. Maliwaliwanag na ng ako makaalis ng bahay at kasabay ko muli si Regine (Cebrero) sa pagtungo sa eskwela. Pagdating sa eskwela, sa halip na magtungo ang mga estudyante sa kanya-kanyang silid ay sa School Quadrangle at nagtipuntipon. May mahalaga pa lang iaanunsyo ang mga guro at sinabing ngayon na ang pagsisimula ng buwan para sa Araling Panlipunan. Pagkatapos ang mahalagang anunsyo'y biglang naghiyawan at nagtilian ang mga estudyante. Nagtungo ako sa harapan upang makita kung sino ang kinahihiwayan nila at pagkatingin, mga kalahok pala iyon para sa Miss and Mister UN.

^2T-Z. Naggagandahan at naggagwapuhang mga kalahok ang nandun at ang gagara pa ng kanilang kasuotan. Titig sana ako ng matagal subalit huwag na at baka matunaw pa. Nagtungo na ako sa silid at abala ang aking mga kamag-aral sa paggawa ng takdang-aralin sa English. Wala nun si Sir Arnulfo kaya sinamantala ko ang oras sa paggawa ng assignment kaso wala akong workbook kaya nanghiram pa ako kay Gwen. Itinigil ko lang paggawa ng takdang-aralin ng biglang may narinig kaming hiyawan mula sa labas at dali-dali kaming lumabas. Parada pala iyon ng mga kalahok sa MS. and MR. UN at talagang di magkandamayaw ang mga estudyante sa kakatili. Paano naman ang kikisig ng karamihan sa mga kalahok lalo na si Jasper and I like his outfit. Balikan lamang sa silid ng matapos ang parada.

^2U-A. Habang walang guro, si Jenny Mae ang kakwentuhan ko. Maya-maya pa'y dumating na si Ma'am Miranda at napansing tila ang uunti namin. Sinabi niyang mas pipiliin pa raw ang panonood ng beauty contest kaysa matuto. Ako ang inatasan ni Ma'am na maglista kung sino ang mahuhuli sa kanyang klase. Nang dumami na kami'y nagsimula na ang recitation subalit ako'y pinaladpagkat di ako natawag. Pagkaalis ni Ma'am Miranda ang siyang dating naman kaagad ni Sir Harren. Nagalit sa amin si Sir pagkat marami sa amin ang di gumawa ng assignment. Binigyan niya kami ng oras upang gumawa. Maya-maya’y dumating naman si Sir Martin na may dalang Red Ribbon. Mistulang patay gutom ang ilan kung kamag-aral pagkat panay kalikot sila sa cake at kalang di pa nakakatikim.

^2U-B. Maya-maya’y ibinigay ni Sir Martin ang cake kay Pradez at ang swerte naman niya dahil nanalo ito sa Cake Raffle. Ayos lang sa akin pagkat sa tuwing may okasyon ay nakakatikim naman ako ng cake. Ilang saglit pa'y nagkaroon kami ng group discussion about Magnetism at pagkatapos ay bumalik kami sa kanya-kanyang upuan at ibinahagi kung ano ang aming nalalaman. Maya-maya, ang seryosong diskusyuna'y nauwi sa tawanan ng mag-tongue twister kami at magkandabulol na nga. Maging sa uwian ay mistulan kaming mga ulaga pagkat tawa kami ng tawa. Ang saya tuloy ng araw ko dahil sa kanila at pagdating sa bahay, nananghalian ako at. Matapos mananghalian ay natulog na ako. Dakong Alas-kwatro na ako nagising at pagbabasa ng world atlas ang inatupag. Kinagabihan naman ay nanood ako ng telebisyon at pagkatapos ay natulog na ako.

^{92 | 85} Walong pu't limang araw na lang bago sumapit ang Kapaskuhan.

October 02, 2013
Wednesday
Year I-275

^2U-C. Dahil di nakatulog kagabi gawa ng napakaalinsangan ng panahon ay tinanghali na ako ng gising. Paano naman kasi, isa sa matinding kalaban ng pang-umagang estudyante ang antok. Pagkatingin sa malaking orasan, sumapit na pala ang ikapito ng umaga at nag-almusal, piniritong kamote lang ang aking agahan ngunit ako'y naumay. Nakakabato ang naging umaga ko at parang walang kakulay-kulay kaya naisipan kong magpatugtog. Dahil October na at dalawang buwan na lamang bago magpasko'y awiting pampasko ang pinatugtog ko at grabe parang dama ko na ang diwa ng kapaskuhan. Awiting pasko rin ang nagtulak sa akin upang gawin ang project at medyo nakaka-relax sa isipan. Pagsapit ng ikalabing-isa ng umaga'y sa wakas at natapos ko na rin ang Project sa Math. pagpa-print na lang ang kailangan.

^2U-D. Kinahapunan ng binalak kong magtungo sa computer shop. Daming nagkukumpyuter sa Taniman at walang bakanteng upuan para sa akin kaya naisipan kong kila Giselle umupa. Salamat at kakaunti lang ang nagkukumpyuter kaya di ako gasinong madidistorbo sa paggawa ng front page ng project. Umingay lang ng dumating ang grupo ng kalalakihan. Malapit ng dumilim ng ako ay makalabas at nagpa-print. Dumeretso muna ako sa bahay nila Tita Jean pagkatapos magpa-print. Kahit medyo nakukulitan kay Amihan at Habagat ay hindi ako nairita pagkat napapakwela nila ako. Si Itang naman, di maawat ang mata sa kaka-text at abala rin si Tita Jean sa pakikipag-usap sa kapitbahay. Nagkaroon lang ng pagkakataong magkwentuhan at kamustahan ng umalis na ang kausap ni Tita. Gusto ko pa sanang manatili pa sa kanila subalit kinailangan ko ng umuwi pagkat gabi na. Diretso nood ng telebisyon pagdating sa bahay. Ang alinsangan talaga ng panahon kaya hirap akong makatulog.

^{91 | 84} Walong pu't apat na araw na lang bago sumapit ang Kapaskuhan.

October 03, 2013
Thursday
Year I-276

^2U-E. Maaga nanaman akong magigising pagkat ayaw ko ng lumiban pa ng klase dahil lamang sa tinatanghali ng gising. Alas-tres pa lang ng umaga kaya naupo muna ako. Saka pa lamang naisipang mag-almusal ng sumapit na ang Alas-kwatro. Pagdating sa antayan ng tricycle, saksakan sa haba ang pila kaya sa ibang terminal na lamang ako sumakay. Di pa naman kasing dami ang mga nagsisipasukang estudyante. Sa halip na makipagkwentuhan sa katabi'y tumulong ako sa mga cleaners. Makalipas ang ilang saglit ay pumasok na si Sir. Kaba sa dibdib ang dumatal sa akin pagkat ngayon na ang report. Todo handa ako ng sasabihin subalit sa kaka-solve ni sir sa blackboard ng equation na di matapos-tapos ay laking tuwa dahil di natuloy ang report at may panahon nanaman upang makapaghanda.

^2U-F. Habang nagso-solve sa pisara ay nasa pintuan na si Sir Balbin na kanina pa pala naghihintay. Ilang sandali pa'y umalis na si Sir Arnulfo at pumasok naman si Sir Balbin. Mukhang goodvibes si sir at natawa kami sa mga pahirit niyang jokes. Lalo pa kaming nagtawanan ng si Ma'am Mina na ang nagpatawa at sabihin ba namang si Lieutenant kolonel ay may pinomonya at kinagat ng Dengue. Halos lumubo ang tiyan sa kakatawa. Maya-maya’y Physics na subalit wala si Sir Martin, sinamantala namin ang oras sa paggawa ng photography sa MAPEH. Kanya-kanyang diskarte kung paano mapapalitaw ang hindi kapanipaniwalang litrato ng hindi ini-edit. Grabe ang hirap at di ako magawan ng photography Effect pagkat wala akong facial expression subalit nagkaroon pa rin ako, yun nga lang ay ibang set-up.

^2U-G. Maya-maya’y bumalik na ako sa silid at pagbabasa ngDictionary ang inatupag ko. Oras na ng English subalit wala pa ring teacher, ang unti lang ng nasa silid at parang ang lungkot, sana'y di na lang ako pumasok. Dahil walang maisipang gawin, tinulungan ko si Jarito sa paggawa ng project. Lumipas ang tatlong subject na walang pumasok na guro at bago kami umuwi ay gumawa muna kami ni Perfecto ng music video para sa Project sa Math. Dahil pagmamay-ari ni Denzel ang ginagamit na Kamera'y nagpresinta na lang si Denzel na siya na ang magpapa-burn ng CD, naubos ang pera ko sa kakaambag sa kanya. Kahit walang pamasahe at dala ng init ng panahon ay sumakay pa rin ako.

^2U-H. Dali-daling kuha ng pera sa bahay pambayad kay manongdriver pagkadating. Ang tindi ng init sa labas kaya todo paypay ako at di makatulog. Kinagabihan, awa at galit ang naramdaman ko ng mapanood sa balita na walang awang pinagmamalupitan ng tatlong babae ang tuta. Pinagtutulungan itong tapak-tapakan hanggang sa mamatay, di pa nakuntento at patuloy pa rin itong tinatapakan kahit patay na. Marami ang nagkomento ng negatibo at may nanawagan na sana'y maparusahan sila. Kahit hayop lang iyan na hindi nakakapagsalita'y dapat ay minamahal rin at inaalagaan, di pinagmamalupitan. Diretso hilata sa kama matapos manood ng telebisyon. Alas-onse na subalit di pa rin ako makatulog, dami kasing palipad-lipad na lamok tapos maalinsangan pa.

^{90 | 83} Walong pu't tatlong araw na lang bago sumapit ang Pasko.

October 04, 2013
Friday
Year I-277

^2U-I. Sumapit na ang Ala-una ng madaling-araw subalit di pa rin ako nakakatulog ng mahimbing. Umidlip na lang hanggang sa sumapit ang Alas-kwatro. Pag-aalburoto ng tiyan ang agad kong naramdaman pagkabangon, marahil ay kinakabag. Nabawasan lang ang pananakit ng tiyan nung umutot ako kaya nakapasok pa rin. Ngayon ang pagdiriwang ng World Teacher’s day na dapat sana'y gaganapin pa bukas kaya naman pagdating sa eskwelahan, marami ng mga poster message ang nakakabit sa may dingding at nakasulat na happy teacher’s day. May umaawit rin sa Quadrangle bilang pasasalamat sa mga gurong walang sawa sa pagtuturo kahit pagod na at minsan ay nauubusan ng pasensiya. Masigabo’t pasigaw na pagbati ang sinalubong namin pagpasok niSir Arnulfo na labis niyang ikinatuwa at dahilan iyon kung bakit nakangisi siya sa pagtuturo. Maya-maya’y may nag-ulat na sa pisara. Nang ako na ang nakasalang, lakas ng loob ang aking pinairal kaya naman nakapag-ulat pa rin ng maayos. Picture-taking kasama si Sir Arnulfo pagkatapos ng klase sa AP at nagpaulan pa ng inihandang confetti.

^2U-J. Sa oras naman ng Values ay masigabong pagbati rin ang isinalubong namin kay Ma'am Fabiana ganon rin kay Ma'am Mina. Kahit Teacher’s day ay tuloy pa rin ang lesson at nagkaroon pa ng practical test. Sa oras ng Filipino, pumasok na si Sir Velarde subalit di ito nagturo at hinayaan kami sa gustong gawin. Lumabas ako kasama sina Jobil at Jessa. Nang nasa Quadrangle ay sumali kami sa mga naglalaro ng agawang bola. Kakainis dahil ako lagi ang taya, sa kakaagaw ng bola, napagod ako subalit nag-enjoy pa rin. Nagpatuloy kami sa paglalaro ng bola at ng si Jobil na ang taya, umayaw na ang mga boys, paano napakaarte kasi at takot makipag-agawan, ang hinhin din. Balik kaming tatlo sa silid, saktong sumasayaw ng Wellness Dance ang aking kamag-aral. Kahit pagod ay nakisali pa rin ako sa sayaw subalit panay tawa si Patrick at masyado nila akong pinagtatawanan, naupo na lamang ako at kala kung sino magagaling sumayaw, parang bato naman ang pagsayaw.

^2U-K. Maya-maya, habang nasa labas kami ay biglang namataang paparating si Ma'am Miranda kaya pulasan kami ng takbo papasok ng silid. Sa halip na magturo, nagkwento lamang si Ma'am tungkol sa napanood niya sa program at maging ang naging karanasan niya bilang guro sa lumipas na mga taon. Naging payapa ang buong silid habang nagkukwento si Ma'am. Bago umalis ay nag-iwan si Ma'am Miranda ng takdang-aralin. Nang sumunod na asignatura, wala nanamang dumating na guro. Parang ang unti lang namin at di malaman kung nasaan ang iba, tapos kakabato sa loob ng silid, lumabas muna ako at hinanap sila Jobil. May balak pa sanang manatili sa eskwela hanggang hapon upangmanood ng All teacher's program subalit dala ng gutom, umuwi na lang ako. Ang ingay ng kasabay ko sa tricycle at parang walang delikadesa sa pag-aaway, sasawayin ko sana sila subalit huwag na, baka lumalala pa ang gulo. Pagdating sa bahay ay nananghalian ako at natulog. Kinahapunan ay nagtungo ako sa bahay nila Cathy. Kamustahan kami ni Ate Ging at todo udyok na sumamba sa Linggo. Di ako pumayag pagkat di naman ako katulad nila. Ang masinsinang pag-uusap, nauwi sa santuhang pangangaral. Gusto ko yung tinuturan sa akin ni Ate Ging subalit masyado niyang tinutuligsa ang paniniwala ng mga Katoliko, bagay na hindi ko sinasang-ayunan at mas sinaalang-alang ko pa ang kahihinatnan namin kaysa ipagtanggol ang relihiyon, bahala siya kung ano ang gusto niyang iparating basta Katoliko pa rin ako.

^2U-L. Nagpakaplastik akong nakitungo sa kanya at dahil di masikmura ang lahat ng sinasabi niya, umalis na ako at kina Regine ako kaagad tumungo. Buti pa si Regine, kahit kaanib ng Saksi ni Jehova'y naiintindihan niya ang paraan ng aming pananampalataya at kaugalian, ito si Ate Ging, mali raw iyon pagkat di raw nakabase sa bibliya ang lahat ng ginagawa namin. Wala na siyang magagawa sa mamayang Katoliko kung nakakapit na kami sa ganong paniniwala. Ang mahalaga'y pinapapasok mo si God sa heart mo at naniniwala ka sa kanya. May mga ilang bagay pa kaming napag-usapan ni Regine (Miano)at ng sumapit na ang Alas-otso'y kinailangan ko ng umuwi. Pagdating sa bahay, nadatnan kong nanonood ng video si Papa, di na tuloy nakanood ng Muling Buksan Ang Puso pagkat ngayon ang ending nun. Nagsulat-sulat muna at ng antukin ay natulog ako.

^{89 | 82} Walong pu't dalawang araw na lamang bago magpasko.

October 05, 2013
Saturday
Year I-278

^2U-M. Maganda at malamig na umaga para sa akin na bagong gising lang at ang aga kong magising. Diretso lantak ng almusal pagkabangon at ako na mismo ang nagligpit ng aking pinaghigahan. Matapos kumain ng almusal ay nagtungo ako sa computer shop subalit sarado pa ito. Nagtungo muna ako kila Tita Jean at nadatnan ko si Tita na abala sa paglalaba. Kahit di kasing edad at di hamak na mas bata sa akin ay nakipagkwentuhan pa rin kay Amihan. Si Itang naman, walang ginawa kundi ang alagaan si baby Habagat. Makalipas ang isang oras ay nagpaalam na ako sa kanila at dumeretso ako kaagad sa computer shop. Mga Alas-dyis na ako nakauwi sa bahay at grabe ang alinsangan sa labas.

^2U-N. Ngayong araw rin pala ang selebrasyon ng ABS-CBN para sa ika-60 taon nilang pamamayagpag sa telebisyon at sa Quezon Memorial Circle nila iyon gaganapin, kaya naman mamayang hapon ay pupunta kami ni Mama sa Circle upang makakita ng mga naglalakihang bituin. Kinatanghalian ay nanood kami ng showtime at di na mahulugang karayom ang dami ng mga taong nanonood kahit napakainit ng panahon. Nandoon ang mga Showtime family na sila Vice Ganda at iba pang mga sikat na artista. Pupunta na sana kami ni Mama subalit baka ma-heatstroke lang kami kapag nakipagsiksikan. Mga hapon na kami nagpunta ni Mama sa Circle at pagdating doon ay talagang dagsaan ang mga taong sabik makakita ng artista, tiyempo ko pa ngang nakita ang ilan kong kamag-aral. Nagpatuloy kami ni Mama sa paglalakad hanggang sa makalapit sa stage. Nandoon rin sila Tita Jean na kanina pa nanonood at ilang saglit pa'y nagbukas na ang entrancepapuntang stage. 

^2U-O. Matiyaga kaming pumila hanggang sa makaupo. May isang baklang komedyante nagngangalang Negi ang panay patawa sa mga manonood at maya-maya'y nagpakita na ang mga artista. Mapababae o mapabakla'y hindi magkandamayaw sa pagtili ng makakita ng artista. Nandoon sa stage sila Piolo Pascual, Bea Alonzo, Liza Soberano, Coleen Garcia at siyempre ang napakapoging si Papa Francis AKA Enrique Gil. Saksakan pala sa kakisigan si Enrique Gil kapag sa Personal at napakaputi pa kaya lalo pang lumakas ang tilian sa Circle, gusto ko sanang tumili rin sa sobrang pagkakilig subalit hiya ang pumigil sa akin. Saglit lamang nagpakita ang mga artista at kaagad na umalis. May free movie ng It takes a man and a woman subalit di ako nanood pagkat napanood ko na iyon. Inabot na ng gabi ng matapos ang movie at pinaalis na kami sa aming kinauupuan.

^2U-P. Di kami nakabili ng ticket ni Mama upang manood ngconcerts kaya umuwi na lamang kami pero bago umuwi at dala na rin ng gutom na nararamdaman, bumili muna kami ni Mama ng pagkain at kumain. Busog much na ako pagkauwi. Sa halip na pumasok sa bahay ay nakipagtsikahan pa ako kila Burgot at ikwinento ang tungkol sa kanina. Maya-maya’y kina Regine (Cebrero) naman ako nakipagtsikahan at sa sarap ng usapan, hindi ko namalayang sumapit na pala ang Alas-onse at kinailangan ko ng umuwi. Dala ng matinding antok, kaagad na akong natulog. Hindi ko malilimutan ang araw na ito na sa tana ng buhay ko, itong araw lang ako nakakita ng mga artista sa personal.

^{88 | 81} 81 days na lamang at malapit na ang Pasko.

October 06, 2013
Sunday
Year I-279

^2U-Q. Sumikat na ang haring-araw ng magising ako mula sa mahimbing na tulog at mukhang maganda ang gising ko, marahil ay di pa rin nakakalimutan ang kapogihan ni Enrique Gil at patuloy pa rin sumasagi sa isipan ko. Hindi ko talaga malilimutan ang kahapon at isa na iyon sa pinakamasayang nangyari sa buhay ko sa taong ito. Pagkabangon ay kaagad ako nag-almusal. Pagkatapos ay naglinis ako ng bahay, mukhang ginaganahan akong magkikilos-kilos kaya ng malinis ang bahay ay nagtungo ako sa bahay nina Regine (Miano). Habang ako'y patungo ay saktong namataan ko si Berna na kausap si Babylyn at sila ang nakasabay ko. Pagdating ay nadatnang abalang-abala si Regine sa paglalaba kaya si Ate Bing ang kinausap ko.

^2U-R. Maya-maya’y dumating na ang kaanib ng Saksi ni Jehova upang turuan sila Ate Bing ng salita ng Diyos. Gusto ko sanang maging katulad ng kanilang relehiyon subalit huwag na at baka malito na si Lord kapag paiba-iba ako ng relehiyon, ayos na sa akin ang manatiling Katolikohabang buhay. Upang di makaisturbo sa pagba-bible study nila Ate Bing, lumabas muna ako. Nandoon sila Shiela, Berna at Regine at nagkwentuhan kami. Maya-maya’y nauwi na sa asaran at harutan ang kaninang seryosong pag-uusap. Maitim si Berna kaya madalas ay siya ang napagtitripan subalit katuwaan lamang iyon. Si Kuya Putot naman, kanina pa ako tinutukso sa mga lalaki at kala naman niyang magugustuhan ko sila, may taste ako at di basta basta pumapatol.

^2U-S. Matapos ang asaran, balik muli sa pag-uusap subalit tungkol na sa mga maligno o kulam kulam ang aming pinag-uusapan at labis akong kinilabutan. tirik na tirik na ang araw sa labas kaya kinailangan ko ng umuwi. Kasabay ko siBerna sa pag-uwi at pagdating sa bahay, ako'y nananghalian. Ang ganda-ganda ng araw ko kanina tapos napalitan lang ng takot ng magkwento sila tungkol sa mga nakakatakot na nilalang. Amoy araw at putok na ako kaya di na nagdalawang isip pang maligo. Grabe ang alinsangan dito sa Kalakhang Maynila subalit sa Kabisayaan, halos malubog na sila sa baha sa tindi ng buhos ng ulan. Maya-maya’y nag-siyesta na ako at pagkagising, naisipan kong magtungo sa computer shop. Madilim-dilim na akong umuwi ng bahay at dahil may pasok nanaman kinabukasan, maaga akong natulog.

^{87 | 80} Walong pung araw na lang bago sumapit ang Pasko.

October 07, 2013
Monday
Year I-280

^2U-T. Sumapit nanaman ang araw ng Lunes hudyat ng panibagong buhay para sa buong Linggong punong-puno ng pag-asa at saya na maaring kaharapin at balik muli sa kanya-kanyang trabaho at eskwela matapos magpahinga at mag-bonding magkakapamilya nitong weekend. Ikalawa na ng umaga ng magising ang diwa ko subalit hinintay ko munang pumatak ang Alas-kwatro. Parang ang gaan ng pakiramdam ko sapagkat walang aalalahaning problema o marahil ay di ko pa rin nalilimutan ang saya noong nakakita ako ng iba't ibang bituin sa Circle, doble ang makakamtang saya kung mangyari sa buhay mo iyon na bihira lamang mangyari. Sa sobrang sigla ko'y napaaga ako sa pagpasok. Tahimik at madilim pa sa silid kaya ako na mismo ang nagbukas ng ilaw. Lumipas ang ilang sandali ay napalitan ng samu't saring boses ang kaninang saksakan ng tahimik ng magsidatingan ang mga kamag-aral ako.

^2U-U. Bahagyang tumahimik ng dumating si Ma'am Fabiana na bakas sa mukha ang pagka-goodvibes kahit kupas na ang pagkabata. Ako ang napagkatiwalaang kumuha ng test paper sa may Photocopy center. Sa dami ng test paper na kasing bigat ng sako ay kinailangan kong magpatulong. May mahabang pagsusulit pala kami at nagsimula lamang iyon ng madala ko angtest paper. Lalo pang nadagdagan ang kaluwagan ng loob ng purihin ako ni Ma'am Fabiana at pakiramdam ko, gumagaan ang aking sandali kapag si Ma'am Fabiana ang aming guro, ako rin ang pinamahala niya sa bayarin. Sa palagay ko'y may mga tao ring kayang pagkatiwalaan ako sa kabila ng minsan ay pumapalpak ako.

^2U-V. Sa oras ng TLE, kahit naghihingalo na ang bulsa'y sige pa rin ako sa bayad, magkaroon lang ng practical test at naging abala ang mga kamag-aral ko sa pagkonekta ng wire sa RJ 45. Hindi naging madali sa akin ang naturang pagsusulit at kinailangang pagsunurin ang kulay ng wire depende sa itinakdang pagkakasunod nito. Sa sobrang abala'y di namin namalayang MAPEH na pala at nag-overtime na si Sir Balbin. Hindi na pumasok si Ma'am Mina at ipinabatid ni Mandy sa klase na nagalit na raw ito pagkat nag-overtime raw kami sa TLE. Sinamantala ko ang oras sa pagsagot ng CAT lecture habang walang guro.

^2U-W. Maya-maya’y Filipino na at nagpatuloy pa rin ang pag-uulat hinggil sa El Filibusterismo. Dahil natuluyan ng mabutas ang bulsa, hindi na ko nag-recesspa at hinintay ko na lang ang pagdating ni Ma'am Miranda. Balikan sa kanya-kanyang upuan pagkadating ni Ma'am at nagkwento siya tungkol sa buhay ni Oedipus rex. Lahat ng teynga ng kaklase ko'y natuon sa pagkukwento ni Ma'am at talagang maraming aral ang mapupulot. Balik muli sa pagiging iskwater at palengke ang silid ng umalis si Ma'am Miranda at hindi pumasok si Sir Harren. Kahit nagkakaedad na'y naglaro kami nila Jessa ng Nanay-tatay, Ketchup at Bato batopik, nakakaines lang pagkat ako ang madalas na taya. Ang masayang laro'y nauwi sa harutan at biruan subalit walang nagkapikunan. Tigil ang pagsasaya at party-party ng dumating si Sir Martin at nag-discuss siya about magnetism.

^2U-X. Kahit seryoso sa pagtuturo ay di pa rin maiwasan ni Sir Martin ang tumawa kapag binibiro siya at lalo siyang kumikisig kaso lang may kulo rin. Nagkaroon kami ng quiz matapos ang discussion at lalo pang nanlubag ang kalooban ng makitang masigla ang natamong marka. Pulbo time ng umalis si Sir Martin at uwian nanaman. Naging makulimlim ang panahon kaya magandang pagkakataon upang maglakad. Tagaktak ang pawis pagdating sa bahay at pagkatapos lumamon ng sandamukal ay diretso Computer shop upang mag-search. Limbag-limbag din ng documents matapos magkumpyuter at pagbabasa ang inatupag ko sa maghapon. Nagrepaso na rin ako sa MAPEH pagkat may long test bukas. Nahirapan ako sa pagkuha ng masarap na tulog gawa ng napakaingay sa labas dahil may
naglalamay. Nagtakip na lang ng unan upang di maingayan.

^{86 | 79} Pitong pu't siyam na araw na lang bago sumapit ang Pasko.

October 08, 2013
Tuesday
Year I-281

^2U-Y. Medyo inaantok pa't pupungas-pungas subalit di ako panaig sa antok at nagpatuloy sa pagkilos. Ang lamig at ramdam ko na ang simoy ng Pasko kaya tinamad nanaman maligo. Kasabay ko si Regine (Cebrero) sa pagpasok at dahil nitiyempuhan niya ang Tito na naka-motor, sumakay kami sa motor at nakalibre pa sa pamasahe. First time ko lang sumakay sa motor sa tana ng buhay ko kaya ganon na lamang ang takot ko kapag mabilis tumakbo ang motorat mukhang mahuhulog sa kinauupuan. Sa takot ay humawak ako ng mahigpit kay Regine. Kaagad kaming nakarating sa eskwela sa bilis magpatakbo ni manong. Wala pa si Sir Arnulfo pagdating ko at nanalaytay na sa kapaligiran ng silid ang ingay ng aking kamag-aral, sa halip makipagdaldala'y nagrepaso ako sa MAPEH.

^2U-Z. Ilang sandali ng dumating si Sir Arnulfo at tuloy pa rin ang pag-uulat. Sa oras ng TLE, mukhang nasorpresa ako pagkat may quiz rin kami at sa takot na muling bumagsak ay sobrang na-pressure ako sa pagsagot. Rebyu-rebyu rin habang di pa dumarating si Ma'am Mina. Maya-maya'y dumating na ito at nagsimula na ang long test. Dahil nakapagrepaso'y sisiw na sisiw lang sa akin ang test. Sa oras ng Filipino, long test muli at dahil nakalimutang magrepaso, napakamot ako ng ulo sa sobrang pangangamote. Dami rin ang halatang di nag-aral kaya pahabaan ng leeg at patalasan ng mata sa pagtingin ng sagot sa katabi kapag umaalis si Sir Velarde. Hayahay ang buhay matapos ang napakahirap na pagsusulit at ipinagpatuloy ni Ma'am Miranda ang pagkukwento tungkol kay Oedipus Rex.

^2V-A. Ang seryosong pagkukwento, nauwi tungkol sa nanay at tatay pati sa mga anak. Halos mayanig ang buong Batasan ng magtawanan kami sa mga pahirit na jokes ni Ma'am Miranda at iba rin pala ito kung magpatawa na pwede ng tawaging Ms. Joker. Nanamlay ang sigla ng classroom ng dumating si Sir Harren at nagkaroon kami ng seatwork. Sa oras naman ng Physics, nagkaroon muli kami ng quiz. Sa dami ng aytem na kailangang sagutan sa quiz booklet ay pinauwi na sa amin at kailangang tapusin bago ipasa. Maya-maya’y tumunog na ang kampana, di hudyat na kailangan ng lumikas kundi kailangan ng umuwi sa kanya-kanyang bahay at saktong nakasabay ang papasok na mga panghapon sa paglabas.

^2V-B. Dami kong ngiti at saya pagdating sa bahay at iyon ang nagpabusog sa akin kahit di pa kumakain. Matapos matulog ay sinimulan ko ng sagutan ang quiz booklet sa Physics. Dama ko ang maalinsangang hapon kaya matapos sumagot sa quiz booklet ay naligo ako. Nakakaawa ang sinapit ng tatlong taong gulang na bata matapos hambalusin ang katawan sa pader ng sarili nitong ama, yun pala ay wala sa katinuan ang ama kaya pala nagawa niya ang ganong krimen. Kinagabihan ay di nanaman nakanood ng telebisyon pagkat umuulan. Nang tumila ang ulan ay saka pa lamang ako nakanood ng telebisyon. Hindi ko na nga tinapos pa ang Maria Mercedes pagkat maaga pa akong magigising bukas.

^{85 | 78} Pitong pu't walong araw na lang bago magpasko.

October 09, 2013
Wednesday
Year I-282

^2V-C. Malapit ng sumapit ang ikalima ng umaga ng magising ako, medyo mahuhuli na kaya dinalian ko sa pagkilos. Napakabait talaga ng maykapal dahil ang inakalang mahuhuli sa pagpasok ay nagkakamali at kakaunti pa lamang ang kamag-aral kong nadatnan. Dumating na si Sir Arnulfo subalit parang ang unti pa lang namin at marami yatang absent. Nagkaroon kami ng seatwork subalit iyon ay pangkatan at kahit di oras ng Math ay parang Math na rin sapagkat nagkompyut kami ng equations. Maya-maya’y tila hina-highblood si Sir Arnulfo at naging terror teacher sa amin. Lahat ng kalat sa silid ay winalis-walis niya palabas, di lang iyan at pinagtatanggal niya ang kurtina at pinaghahagis ang mga walis tambo palabas.

^2V-D. Sa puntong iyon ay napupuno na ng galit si Sir at nakakatakot na siya. Marami rin ang nahuli sa pagpasok kaya lalo pa siyang sumiklab sa galit at pinapila sa labas ng silid.

Makakapasok lang kung sino ang makakapagbigay ng magandang reasonkung bakit sila nahuli. Sobrang pasalamat talaga ako dahil di ako nahuli at may kalalagyan rin ako kapag nagkataon. Sa oras naman ng TLE ay nagkaroon kami ng long test. Kahit hindi nakapagrepaso, naging madali lang sa akin angexam subalit may ilang mga aytem ang nag-aalangang sagutan. Nang makita ang resulta ay may halong lungkot at tuwa ang naramdaman ko pagkat kalahati lamang ang nakuha. Ilang sandali pa'y oras na ng MAPEH at inanunsyo ni Ma'am Mina na pwede pang magpasa ng kung anong kulang na activity bukas.

^2V-E. Bukod pa dun, mukhang challenging ang pinapagawa sa amin pagkat iyon ay feeding program at kailangan namin pakainin ang mga malnourished na bata. Siyempre kapos sa pera panggastos sa pambili ng sahog kaya naisipan naming ituro na lang sa mga bata ang kalinisan. Naputol lang ang pag-uusap namin ng dumating si Sir Velarde at tuloy ang long test. Nang recess na'y tinanong ko si Denzel kung gawa na ba niya ang record sheet sa Math at sinabing gagawin pa lang raw, nataranta tuloy ako at dali-daling bumili ng index card pagkat ngayon na ang pasahan nun. Abala si Denzel sa pagtetsek kaya ako na mismo ang nagrekord ng aming marka at pinagsabay ko na iyon sa pagkain. Sabay tago ng index card pagkadating ni Ma'am Miranda at may long test kami, dahil sa kwento ng Oedipus Rex nakatuon ang Coverage ng exam, naging sisiw lang sa akin ang test kahit di nagrepaso subalit hindi kagandahang marka ang nakuha ko, bawi na lang next time. Habang di pa dumarating si Sir Harren, ipinagpatuloy ko ang pagre-rekord at paggawa ng column sa index card.

^2V-F. Mabilis pa sa Alas-kwatro kung itago ng bigla dumating si Sir Harren at nagtsek kami ng long test. Sa oras ng Physics ay iwinasto na namin ang lahat ng quiz aytem at pagkatapos ay sinuma na namin ang lahat ng iskur. Nagtatalo ang kaba at sabik sa aking damdamin at palaisipan kung ilan kaya ako. Nang malaman ang resulta, nanlumo ako pagkat di ako pasado, yun pala nagkamali ng bilang si Mothy kaya nadagdagan pa ang iskur ko subalit di pa rin pasa. Umuwi tuloy akong lugmok na lugmok at matamlay subalit di nawawalan ng pag-asang makakabawi rin. Pagkatapos mananghalian ay diretso ako sa computer shop upang gumawa ng activity sa MAPEH.

^2V-G. Nang magawa lahat ay ipina-print ko na ito. Sobrang nai-stress na ako at madami akong kailangang ipasang activity upang di bumagsak. Maghapon akong palakadlakad at nanghiram ng pa color pen kina Amihan subalit wala raw, buti na lang at nagmagandang loob ang kapitbahay nila. Sa sobrang abala sa paggawa ng activity, inabot na ako ng gabi at sa wakas ay natapos din. Maya-maya, habang ginagamit ko ang cellphone ay aksidente kong nabura ang lahat ng files kaya sobrang nanlumo ako at iniisip kong maibabalik pa ba? Hinang-hina na ako at pagod na pagod na rin kaya kaagad ng natulog.

^{84 | 77} Pitong pu't pitong araw na lang bago magpasko.

October 10, 2013
Thursday
Year I-283

^2V-H. Sa sobrang dami ng ginagawa at iniisip dahil aksidenteng nabura ang files sa memory card, hindi ko pala lubos maisip na Periodical exam ngayon at hindi ako nakapagrepaso kaya naman pagdating sa eskwela'y dibdiban ang aking pagrerepaso at nagkabisado. Sa kaingayan ng aking kamag-aral na walang humpay sa pakikipagdaldalan, nawawala na ako sa focus. Kahit nasa pisara na si Sir Arnulfo ay nagpatuloy pa rin ako sa pagrerepaso subalit inanunsyo niyang bukas pa ang periodical test sa AP. Sa oras naman ng TLE, iyan na nga at nagkaroon kami ng periodical test. Dahil kaparehas lang ng long test ang test sa Periodical exam at sinabi na ang tamang sagot noong nagtseking kami, hindi ko na binasa ang tanong at binara ko na lang ang pagbilog sa letra.

^2V-I. Pagkatsek ng exam, abot langit ang tuwa ko pagkat mataas ang nakuha ko at mukhang makakabawi na ako sa TLE. Sa oras naman ng MAPEH ay nagkaroon kami ng quiz bee competition at sa tuwing may tanong na ibabato si Ma'am Mina regarding to our lesson in second grading, brainstorming kami sa pagsagot at paunahan sa pagtaas ng illustration board. Sobrang nakaka-tense sa oras na sabihin ni Ma'am na go. Ang hindi nga lang maganda sa laro'y tumatama nga ang sagot namin subalit lagi naman nauunahan kaya nagiging mailap ang makakuha ng puntos, paano kasi siAshley ang tagasulat kaya mabagal kami sa pagsagot subalit di naman masisi kung sadya lang talagang mabibilis ang kanilang kamay.

^2V-J. Sa huli, talo kami at panalo ang kagrupo nila Nathaniel, okey lang iyan at marami pang pagkakataon upang manalo. Kahit paano sa mga sagot ay nare-reveal sa bawat tanong ni Maam Mina at parang narerebyu na rin ako at di na mangangamote sa pagsagot ng pagsusulit. Maya-maya’y Physics na at nagtsek lang kami ng seatwork. Sa oras ng English, dahil may meeting na dadaluhan si Ma'am Miranda ay student teacher niya muna ang namahala sa klase at nagpakilala itong Ma'am Jennifer, maitim siya subalit litaw na litaw ang kagandahan niya at may pagkakahawig kay Liezel Garcia. Bukod sa panlabas na anyo'y palakibo din siya sa amin at pwede mo siyang maging kaibigan. Sana nga kung sakaling magreretiro si Ma'am Miranda, siya ang ipalit pagkat masaya siyang maging teacher.

^2V-K. Sa oras naman ng Math ay nagkaroon kami ng Periodical test, dahil kinapos sa oras at wala pang nakakatapos ay ipapagpatuloy na lang bukas. Sa oras muli ng Physics ay ipinagpatuloy namin ang pagtetsek ng seatwork at activity. Maya-maya’y tumunog na ang bell, hudyat na uwian na. Naging napakaalinsangan ng tanghali subalit ibinalita sa telebisyon na may paparating raw na bagyo. Kinahapunan, bahagyang dumilim ang kapaligiran at maya-maya pa'y bumuhos na ang napakalakas na ulan na sinabayan pa ng pagkulog at pagkidlat. Tumagal ang thunderstorm hanggang gabi at ng tumila'y saka pa lamang ako nakanood ng telebisyon. Sinabi ng PAGASA na lumakas raw ang bagyo at nagbabantang manalasa sa Hilagang Luzon, manonood pa sana ng Maria Mercedes subalit pinatay ko na at maaga pa ang pasok bukas.

^{83 | 76} Pitong pu't anim araw na lang bago magpasko.

October 11, 2013
Friday
Year I-284

^2V-L. Pagkadilat ay kaagad kong kinuha ang radyo at binuksan upang alamin ang pinakasariwang balita tungkol sa paparating na bagyo. Nakataas na sa babala bilang isa ang Kalakhang Maynila subalit di pa ramdam ang epekto ng bagyo at kalmado lamang ang kapaligiran. Dahil nasa Signal number one lamang ang Kalakhang Maynila, suspendido lamang ang klase sa pre-school at ano ba ito, may pasok pa rin kami. Hindi kaagad kami nakapagsimulang mag-take ng pagsusulit sa AP sapagkat di pa raw napapa-zerox. Dumating lamang ang mgatest paper at nakapag-exam kung kailan malapit na ang oras ng Values at sinabi sa amin ni Sir na ipapagpatuloy na lamang namin pagkatapos ng last period. Sa oras naman ng Values, nagkaroon rin kami ng Periodical test at kahit di gaanong nakapagrepaso'y may naisagot pa rin ako. Habang di pa dumarating si Ma'am Mina, nagrepaso muna ako sa MAPEH.

^2V-M. Naging madali lamang ang exam para sa akin sa MAPEH at ng tseking na, nanlubag ng husto ang kalooban ko pagkat matayog ang nakuha ko. Tilian na may kasama pang hiyawan ng malaman ng buong klase ng ipamalita ni Mothy na magkasintahan na sila ni Stephanie at nagkataong monthsary pa nila ngayon, ang taray. Sa loob-loob ko, chickboy si Mothy pagkat kung sino-sinong babae ang napapasakanya, di naman nagtatagal. Sa oras naman ng Filipino, nagkaroon rin kami ng Periodical test at kakatamad basahin ang mga konteksto pagkat kahahaba at nangangain pa ng oras.

^2V-N. Maya-maya'y breaktime na, ang paboritong asignatura ng karamihan sa kaklase ko. Sa oras ng English, halos lumuwa na ang utak ko sa kakaintindi ng pangungusap, may masagot lang pagkat saksakan ng hirap, idagdag pa ang ingay ng aking kamag-aral kaya lalo pa akong di nakapag-concentrate. Ilang saglit pa'y biglang nagpakita sa amin si Crislyn at malaki na ang kanyang dinadadala. Sayang rin ang Crislyn at kung di siya lumalandi'y malamang may tiyansa siyang makapagtapos, welcome na lang sa pagiging batang ina't makapag-aral pa rin sana siya. Sa oras ng Math, ipinagpatuloy namin sagutan ang pagsusulit na naudlot kahapon, kanina pa sumasakit ang ulo ko sa kakaintindi at kakabasa at sa wakas ay natapos ko rin, Physics na lang ang kulang.

^2V-O. Dahil nagbasa-basa rin naman ako, Hindi gasinong naging mahirap sa akin ang test. Bago pa man kami umuwi, nagtungo muli si Sir Arnulfo sa silid at ipinagpatuloy namin ang pagsagot sa pagsusulit. Nang matapos ay saka pa lamang kami umuwi. Buti na lamang at may dala akong pananggalang sa ulan. Pagdating sa bahay ay nananghalian ako at pagkatapos ay natulog. Pagkagising ay naamoy ko kaagad ang aroma ng Spaghetti at iyon ang naging meryenda namin. Dahil sa papalapit na bagyo'y naging maulan sa maghapon at lalo pang sumungit ang panahon pagsapit ng gabi. Itinaaas na pala sa ikalawang babala ang Kalakhang Maynila at wala ng humpay ang pag-ulan.

^2V-P. Kahit sa kalupaan ng Aurora mananalasa ang Bagyong Santi ay damang-dama na dito ang epekto nito. Maya-maya pa'y bigla naming naranasan ang malalakas na pagbugso ng hangin. Halos mabuwal na ang mga puno at matuklap na ang bubong sa lakas ng hangin. Malakas ang hangin subalit di naman kalakasan ang ukan. Hindi ako natulog at panay kinig ako sa radyo. Mga bandang Alas-onse ng mag-landfall raw sa kalupaan ang bagyo at dinig na dinig ang pagsipol at kung paano hagupitin ng malalakas na hangin at ulan ang lalawigan ng Aurora. Mga hating-gabi na ako natulog.

^{82 | 75} Pitong pu’t limang araw na lang bago magpasko.

October 12, 2013
Saturday
Year I-285

^2V-Q. Boses ni Mama at Ate ang gumising sa akin. Pagkatingin sa telepono'y Alas-tres pa lang ng madaling araw. Tumigil na ang ulan subalit naririnig ko pa rin ang pabugso-bugsong hangin. Maaga rin nakabukas ang radyo at sinabing nag-landfall na ang bagyo. Marami ng mga lugar ang napaulat na nalubog sa baha at napinsala ng husto mula sa pananalasa ng Bagyong Santi. Maaga pa naman at medyo inaantok pa kaya natulog muna ako. Maliwaliwanag na sa labas ng bumangon ako. Tonetoneladang basyo ng dahon ang nagkalat sa bakuran at kitang-kita rin ang mga punong malapit ng mabuwal. Pasalamat na lamang kami pagkat di napinsala ang aming tinitirhan at buhay pa rin ang kuryente. Maya’t-maya ang mga pag-ulan subalit ito'y pabugso-bugso lamang. Hindi naman makalabas ng bahay dahil masungit pa rin ang panahon kaya naisipan kong paglibangan ang pagwawalis.

^2V-R. Kinatanghalian ng manood kami ng balita at napalaki ng pinsalang idinulot ng bagyo. Kuhang-kuha din sa pinalabas na bidyo kung paano bayuhin ng bagyo ang lalawigan ng Aurora at iba pang mga lalawigan. Maraming mga ari-arian ang nawasak. Pasalamat na lang ang mga Manilenyo at di direktang tumama ang bagyo kaya normal pa rin ang pamumuhay. Matapos manood ng telebisyon ay umidlip ako. Kinahapunan, kahit masungit ang panahon ay natuloy pa rin ang uaap Men's basketball na ginanap sa MOA Arena. Dito ay magtutuos ang dalawang unibersidad na Dela salle at UST upang tanghaling kampyon para sa taong ito. Grabe ang naging laban sa unang kwarter pagkat dikit at natambakan ng UST ang kalaban sa mga sumunod pang kwarter, sa isang iglap ay biglang nakahabol ang Dela salle hanggang sa nanalo. UST ang gusto kong magwagi pero mas magagaling ang taga La-salle.

^2V-S. Kung masu-shoot pa ang bola sa huling pagkakataon, malamang ay USTang palaring manalo. Ilang sandali pa'y Maaa-ala mo na kaya. Masyado akong nakaka-relate sa kwento pagkat tungkol iyon sa taong nagkaroon ng Tuberculosis at napagdaanan ko rin kung ano ang napagdaanan niya. Sa kabila ng kanyang karamdaman ay di pa rin niya sinuko ang pagmamahal sa kasintahan at patuloy niya itong nilabanan, hanggang sa wakas ay gumaling na siya ng tuluyan. Sa puntong iyon ay naalala ko ng panahong nagdurusa ako mula sa Tuberculosis at ganong kahirap ang naging buhay ko. Sa awa naman ng Diyos ay di niya hinayaang habang buhay ko danasin ang sakit na iyon. Goodbye Tuberculosis and welcome new life without other sickness.

^{81 | 74} Pitong pu’t apat araw na lang bago magpasko.

October 13, 2013
Sunday
Year I-286

^2V-T. Sumapit nanaman ang araw ng Linggo at araw kung kailan magkakasamang buo ang pamilya at magkaroon ng pagkakataong makapamasyal sa iba't ibang lugar. Siyempre sa araw na ito'y huwag tayong makalimut sa pagsisimba upang magpasalamat sa ating butihing panginoon na di dahil sa kanya'y namumuhay tayo ng ligtas at payapa, bukod sa pagpapasalamat ay nabibigyan rin natin ng oras ang panginoon upang makausap at makasama. Sayang lang at hindi ako nakakapagsimba, napakarami ko na sigurong kasalanang nagawa subalit alam kong mapagpatawad ang Diyos kapag pinagsisihan ko ang lahat ng pagkakasala. Alas-singko pa lamang ng umaga ng magising ako at mukhang magiging maaliwalas ang panahon sa maghapon, marahil ay lumabas na ang Bagyong Santi subalit ayon sa balita'y may paparating pa raw na bagyo at pinangangambahang tumama muli.

^2V-U. Hindi pa man lubos nakakabangon ang mga hinagupit ng bagyo at may panibagong dagok nanamang naghihintay. Naging magandang pagkakataon ang magandang panahon upang maglaba kaya binalak kong maglaba subalit huli na at naunahan na ako ni Mama, matapos humigop ng mainit na kape'y gawaing bahay pa rin ang pinagkakaabalahan ko. Malapit ng magtanghali ng matapos ako sa pagwawalis, paghuhugas ng plato at pagpupunas ng mga kagamitan. Sa dami ng aking ginawa'y naubos ang natatago kong enerhiya at diretso bagsak sa kama. Malapit ng maluto ang kakainin kaya tumindig agad ako at ng maluto'y sige ako sa pagsubo dala ng matinding gutom. Ako na mismo ang naghugas ng plato matapos ang tanghalian.

^2V-V. Kinahapunan at dahil masyadong nakakabatong manatili sa bahay, upang magkaroon ng mapaglilibanga'y naisipan kong magpa-load. Naka-unli na rin sa wakas at one to sawa na ang pagte-text kaso nasira ang aking kaligayahan ng dumating si Mama at paulanan ako ng maanghang na salita. Hindi muna siya pinansin at hinayaang magbunganga, mapapagod rin iyan alam ko subalit napakadami talaga niyang sinasabi at panay pa ang panunumbat kaya di ko na napigilang sagutin siya. Nagte-text lang ako tapos parang ang laki ng kasalanan ko kung magalit siya, marahil ay dala na iyon na nagkakaedad na siya kaya ganon na lamang kung magalit. Ng tumigil ako at hindi na pansini'y tumigil rin si Mama sa pagbubunganga. Nataon pang walang pasok kinabukasan dahil may Medical mission ang mga Iglesia ni Cristo kaya magdamagan akong nakipag-textmate at sinulit ng husto ang unli service load. Mga Alas-dyis na maisipan kong matulog.

^{80 | 73} Pitong pu’t tatlong na araw na lang bago magpasko.

October 14, 2013
Monday
Year I-287

^2V-W. Wala nanamang pasok ang mga estudyante gaya ko kaya may oras pa upang makapagpahinga o dili kaya'y makagawa ng mga takdang-aralin. Oktubre pa lang subalit nagpaparamdam na ang Hanging Amihan dahilan kung bakit naging malamig ang umaga. Pagkabango’y halos di na maaninag ang kapaligiran sa kapal ng hamog at grabe ang lamig, para kang nasa Baguio. Sobrang giniginaw ako kaya diretso inom ng mainit na kape upang malamnan ang sikmura kahit paano ng init. May alikabok nanamang pakalat kalat kaya nagwalis-walis ako at matapos ay nilagyan ko na ito ng floorwax. Dahil maaga pa’y binalak kong magkumpyuter sa labas ng ganong oras upang di na makipagsiksikan at magtiyaga sa di kanais-nais na amoy kapag dumami na ang mga tsikiting at tinedyer na rumerenta ng computer.

^2V-X. Pagdating sa computershop, ang daming bakante at kakaunti pa lamang ang nagkukumpyuter kaya maayos kong nagagawa ang dapat gawin subalit maya-maya'y bigla ng umingay. Nanatili pa ko ng computer shop hanggang isang oras. Bago pa man umuwi'y dumaan ako kila Aldrian at tinanong kung may kakilala ba siyang computer technician sapagkat ipapa-recover ko ang na-Format na files. Mukhang pinapalad nga naman at may kakilala nga sila. Sinamahan ako ni Aldrian patungo sa bahay ng kakilalang Computer technician at ng masulyapa'y kaagad na akong nagtanong. Hindi pala niya dala ang laptop kaya minabuti namin sa computer nila Aldrian ipa-recover ang files. Nabunutan na sana ako ng tinik pagkat na-recover na ang lahat ng files subalit balik sa pagkakalukot ang pagmumukha ng ito naman ay ma-corrupted.

^2V-Y. Sayang ang effort sa pagrekober kung sa huli'y corrupted naman. Hindi pala alam na may virus ang Memory card ko at dali-dali pa akong umuwi upang kunin ang isa pang Memorycard. Pagkasalpak sa computer, talagang may balat nga sa puwet dahil na-corrupted rin ang mga files. Computer pala nila Aldrian ang mayvirus at kailangan ng maibalik sa lalong madaling panahon ang dating anyo ng files pagkat naka-save dun ang mga projects ko. Wala ring sinabi ang kinuha kong computer technician pagkat pumalpak siya sa mga pinapagawa ko, sayang at may pangmeryenda pa kami. Nagtagal pa ako kila Aldrian hanggang tanghaling tapat at nakipagtsikahan pa. Malapit ng sumapit ang Ikauna ng hapon ng maisipang umuwi at umuwi akong dismayado at nauubusan ng pag-asa.

^2V-Z. Maya-maya’y kina Auntie Caling ako nagtungo upang kausapin si Kuya Boyet na isa ring computer technician subalit nasa Libis raw ito, dahil matagal na akong di nakakabisita sa kanila'y sinulit ko na ang mga oras upang magkamustahan kami at mag-usap. Laki na rin ng pinagbago ng kanilang bahay at ito'y may ikalawang palapag na dati'y wala. Sa sarap ng aming kwentuha'y di ko namalayang ikaapat na pala ng hapon at nagpaalam na ako sa kanila. Sunod ay sa bahay ni Ate Melba ako nagtungo upang ipagawa sa asawa niya na isa ring computer technician ang corrupted files subalit di ko ito nasumpungan. Sa puntong iyo'y di ko na alam ang gagawin at namomoblema na ng husto. Nilibang ko ang sarili sa pagkukumpyuter upang maibsan ang stress. Madilim-dilim na ng nakauwi sa bahay. Hindi na ako nagtagal pa sa panonood ng telebisyon at kaagad ng natulog pagkat pagod na. Masaya muli ang buhay bilang estudyante dahil wala muling pasok bukas dahil Edil Adha ng mga Muslim.

^{79 | 72} Pitong pu't dalawang araw na lang bago magpasko.

October 15, 2013
Tuesday
Year I-288

^2W-A. Ilang araw ng nakakalibre ang mga estudyante gaya ko ng bakasyon kaya naman enjoy na enjoy ang life ng walang pagsusunog kilay at mga alalahaning may kaugnayan sa eskwela subalit ang lahat ng paglilibang nitong long weekend ay dapat din limitahin at isagawa sa tamang oras. Gawin muna kung ano ang mga mahahalaga bago ang sariling kagustuhan ng sa ganon ay umangat ang life. Kaya ako, tatapusin ko muna ang lahat ng takdang-aralin bago maglakwatsa. Maingay na sa labas at maliwaliwanag na ng ako'y magising at diretso tungo sa kusina upang mag-agahan. Pagkatapos mag-agaha'y sinimulan ko ng tapusin ang takdang-aralin. Maya-maya’y nag-alburoto nanaman si Mama at panay ang panenermon sa akin. Pagiging layas ko pala kahapon ang kinapupuyos ng damdamin niya at napakarami nanaman niyang sinasabi.

^2W-B. Porket lumayas lang ako'y hindi na ako nakakatulong sa bahay at iyon ang ipinamukha niya sa akin, bagay na ikinadurog ng damdamin ko kaya kahit mali'y nagawa ko siyang sagutin. Hindi pa nakuntento at nagtawag pa ng resbak si Mama, ikwinento ba naman kay Ate ang lahat ng ginagawa ko. Puro lagay siya ng malisya habang nagkukwento at paniwala naman itong si ate kaya pinagkaisahan nila ako. Upang di lumaki ang gulo at ako lang naman ang lalabas na masama kapag nagsalita pa, ako'y nagtakip na lamang ng teynga. Napapansin ko lang nitong mga nakalipas na araw ay parang iba ang pakikitungo sa akin ni Mama at mas matimbang ang pakikihalubilo kay ate, bagay na di ko lubos maunawaan at kahit walang ginagawang masama'y napapagalitan pa rin.

^2W-C. Kaya habang masayang nag-uusap si Mama at Ate samantalang nakaupo ako sa isang sulok na masamang-masama ang loob, di ko mapigilang magtampo ng husto. Idinaan ko na lang sa pakikinig ng tugtog sa radyo subalit lalo pang nadagdagan ang pagkayamot ko ng pahinaan ni ate. Sa puntong iyo'y di ko na napigilan ang emosyon ko at lahat ng aking saloobin ay inilabas ko ng buong tapang at harapang ibinulalas. Doon ako nakaramdam ng kagaanan ng loob ng maibulalas ko sa kanila ang lahat ng gusto kong sabihin subalit parang may namuong sugat sa pagitan ko at nila. Grabe at di ko namalayang si Shrek na ako kung magwala. Nang mapagod kaming tatlo sa kakatalak, Tila walang nangyari at sobrang guminhawa ang kalooban ko.

^2W-D. Maya-maya’y dahil nabubugnot ay naisipan kong buksan ang telebisyon. Hindi kagandahang balita agad ang aking nalaman pagkat lumindol sa Visayas at kahit tapos na ang lindol ay nanatili pa rin ang mga residente sa labas, sa pangambang yumanig muli ang kanilang kinalalagyan. Kaawa-awa at kalunos-lunos ang kanilang sinapit pagkat marami sa mga establishimento at kabayahan ang napinsala ng husto, may ilan pa ngang mgatourist attraction tulad ng mga simbahan ang hindi rin nakalitas sa lindol. Kung nagkataong dito mangyari ang ganong kalakas na lindol, malamang ay libo-libo ang masasawi at hindi namin alam kung saan kami pupulutin. Nadagdagan pa ang bilang ng mga nasawi mula sa lindol kinahapunan at lalo pang lumawak ang nalilikhang pinsala dahil sa mga aftershocks. Alam kong tayong mgaPilipino'y hindi kaagad sumusuko sa tuwing kaharap ang mga kalamidad at hindi pa rin mawawalan ng pag-asang makakabangon muli kaya ang dapat sa mga nasalanta ng lindol ay magdasal at magpakatatag. Sa kadahilanang may pasok na bukas, mga Alas-nuebe pa lamang ay pinatay ko na ang telebisyon at kaagad na natulog.

^{78 | 71} Malapit ng magpasko at sana bago sumapit ang Pasko'y bumalik na sa dati ang kanilang pamumuhay upang maging masaya ang pagdiriwang nila. 

October 16, 2013
Wednesday
Year I-289

^2W-E. Matapos ang apat na araw na maikli subalit sulit na bakasyon ay balik nanaman sa dating gawain sa pang-araw araw at iyon ay ang maagang magigising upang pumasok sa eskwela. Tutuloy na sana ako patungong eskwela ng may isang di inaasahang pumigil sa akin. Wrong timing naman pagkat hindi ko makayanan ang sakit ng tiyan kaya dali-dali akong napasugod sa bahay at inilabas ang natatagong sama ng laman. Hayahay ang moda ng mailabas ang dapat ilabas subalit dinig pa rin sa sikmura ko ang pagkulo at nagbabadyang lumabas muli ang panibagong masamang laman. Sumapit na ang Alas-sais at sa takot na masita ni Sir Arnulfo kapag dumating akong nahuli sa klase'y tiyak ay katakot takot na sermon ang ipupukol sa akin kaya minabuting lumiban na lang sa klase.

^2W-F. Dala ng nakakaramdam pa ng konting antok ay umidlip muna ako at ikapito na ako nagising. Sumakit nanaman tiyan ko kaya napabanyo muli ako, ano kayang nangyari sa tiyan ko at mukhang may Diarrhea na. Upang tumigil ang pagdudumi ng walang humpay ay sinabihan ako ni Mama na kumuha ng Oregano pagkat mainam iyon pagtanggal sa pag-ikot ng tiyan. Kahit nagkasamaan ng loob kahapo'y sinunod ko pa rin ang mga tagubilin niya at kaagad ng gumora sa taniman ng Oregano. Diretso dikdik at inom pagkakuha, medyo di kagandahan ang lasa at mapait subalit kailangang tiisin ang pait upang gumaling. Maayos na sana ang araw ko ng sabihan ba naman ako ng ate na kaya raw ako nagkakaganito pagkat masama raw ang ugali ko, bagay na di ko nagustuhan at sa halip na lumamig na ang ulo'y tila nag-iinit muli ako. Pinigilan ko na lang ang emosyon at pagkatapos maghugas ng plato'y nanood ako ng video.

^2W-G. Kinatanghalian ng bahagyang dumilim at ilang saglit pa'y bumuhos na ang ulan, mukhang magaling ang ininom kong Oregano at napigilan na ang aking pagdumi. Dahil nakakabato'y naisipan kong mag-aral at mag-solve ng mga Mathematical expression. Gustuhin man na dilat ang mata sa maghapo'y di ko nagawa sa tindi ng aking antok kaya nakatulog pa rin. Pagkagising at lamon ng inihandang meryenda'y nagtungo ako sa bahay nina Regine (Miano). Tulog nun si Regine at abala sa pagbabantay ng anak si Shiela kaya kay Ate Bing ako tumuloy at nakipagkwentuhan kaso itong si Aira ay napakakulit na bata at masyadong maharot kapag nakikita ako kaya di ako nagtagal at kaagad na tumungo kay Regine, eksaktong gising na ito kaya nagkaroon ng time upang makipagtsikahan.

^2W-H. Sa dinarami ng bagay na napag-usapa'y di ko namalayang madilim na sa labas. Umalis ako kung kailan kakain na sila ng hapunan. Pagkadating sa bahay, pumatak na ang ikawalo ng gabi at kaagad na naghapunan, buti na lamang at may tira pa kaya nakalamon pa. Diretso bukas ng telebisyon pagkatapos lumamon at ang ganda ng palabas sa Juan Dela Cruz pagkat umaatikabo na at masyadong nakakasabik ang bawat eksena, sa Got to believe, kakaawa si Chitchay pagkat pinahiya siya sa party ng kontra bida niyang kamag-aral sa buhay subalit kilig kiligan na may halong kaiswitan ng isalba siya ni Joaquin. Diretso hilata sa kama pagkatapos manood ng telebisyon.

October 17, 2013
Thursday
Year I-290

^2W-I. Gusto ko pa sanang matulog ng matagal pagkat ako'y nabibitin pa subalit kahit pumipikit ang mata'y pilit ko itong dinidilat upang makakilos ng maayos, isa talaga sa matinding kalaban ang antok kapag pang-umaga ka. Sa kadahilanang malamig ang umaga'y nagpunas lamang ako, bumawi na lang sa inisprey na pabango. Quarter to six na ako umalis subalit kakaunti pa lang ang nadatnan kong kaklase sa silid. Maya-maya’y dumating na si Jessa at nagkwentuhan kami. Naputol lang ang aming pag-uusap ng dumating si Jobil na saksakan sa kadaldalan at habang dumadami'y umiingay ang silid. Tumahimik lang ng dumating si Sir Arnulfo at wala kaming ibang inatupag kundi magtsek ng ginawang seatwork. Malapit na ang kuhaan ng card kaya naman todo asikaso na kami sa grade. Sa oras ng TLE, ipinagpatuloy namin ang tamang pagkokonekta ng cable wire sa RJ 45 upang gumana ito.

^2W-J. Nakailang beses na akong putol ng wire subalit di pa rin gumagana. Iyan pa naman ang project na magpapaangat sa grade ko sa TLE kaya ibinuhos ang lahat ng best ko. Tigil ang paggupit at pagkabit ng cable wires sa RJ 45 pagdating ni Ma'am Mina. Nagkompyut lamang kami ng natamong grade sa lahat ng aming activity at isa-isang tinawag ni Ma'am ang mga pangalan na may kulang sa activity. Maya-maya’y umalis na si Ma'am Mina at Physics na. Pumasok si Sir Martin subalit nagkompyut lamang siya ng aming grado gamit ang laptop. Kahit na may teacher ay naging maingay ang klase, si Jessanama'y kanina pa kuha ng kuha ng ballpen ko ng walang paalam. Dahil walang modo ang kanyang paghiram ay sinigawan ko siya pero ang nangyari ay nauwi hanggang sa pag-aaway namin. Para di lumaki ang gulo, ako na mismo ang lumayo at naupo katabi nila Jayvie Ann. Para maalis ang pagkaimbyerna'y nakipagkwentuhan ako kila Jayvie Ann at ang lilibog ng napapag-usapan namin. Ako naman itong tawa ng tawa hanggang sa makalimutan ko ang inis.

^2W-K. Ilang saglit pang lumipas ay recess time na, dahil nagtitipid ay hindi na ako kumain pa. Sa oras ng English, wala si Ma'am Miranda kaya naging pagkakataon sa aking mga kamag-aral ang mag-ensayo para sa gaganaping stage play. Dahil walang magawa'y nagkwentuhan lamang kami ni Jenny mae. Lipatan sa kanya-kanyang upuan ng Mathematics time na subalit di pumasok si Sir Harren kaya nag-extend ang kanilang practice. Maski sa oras ng Physics ay nakiusap sina Rommel kay Sir Martin na ibigay na ang oras para sa practice. Sa bait ni Sir Martin ay pumayag naman ito kaya tatlong sunod na subjectsilang nakapagpraktis. Ang kaninang practice lang sa play ay nauwi sa kulitan at tawanan kaya mukha na kaming nakawala sa mental, baliw baliw kasi kapag naakting sina Mothy, parang tanga lang. Ilang saglit pa'y uwian na.

^2W-L. Dahil di kumain ng recess at sa tindi ng gutom ay dali-dali akong napalamon. Sa dami ng kinain, sobrang nabanat ang laki ng tiyan ko kaya ilang oras pa ang makalipas ay nagbawas nanaman ako. Buti na lamang at hindi iyon tuloy-tuloy katulad ng kahapon. Kinagabihan ay nanood ako ng telebisyon. Sa tindi at lakas ng lindol na tumama sa kanilang lugar, mukhang aabutin pa ng taon bago sila makabangon. Ang mga simbahang pang-akit sa mga turista dahil sa katanyagan nito, nakakapanghinayang pagmasdan pagkat napulbos ito. Ang Chocolate Hills na isa rin sa tourist attraction ay di rin nakaligtas. Grabe at napakatindi talaga ng lindol sa kanila. Matapos manood ng telebisyon ay kaagad na akong natulog.

^{76 | 69} Anim na pu't siyam na araw na lamang bago magpasko.

October 18, 2013
Friday
Year I-291

^2W-M. Kakatamad pang bumangon pagkat giniginaw ako sa sobrang lamig subalit tiniis ko ang ginaw. Hindi lang para kang nasa Baguio kundi nasa ibang bansa ka na pagkat napakalamig ng umaga. Kitang-kita ang makapal na hamog sa labas at pati bubunga'y mamasa-masa gawa ng hamog. Humigop ako ng mainit na kape subalit ang ginaw na aking nararanasa'y di pa rin nawawala. Ayaw ko man maligo subalit itinuloy ko pa rin. Madilim-dilim pa sa labas ng makaalis ako. Pagdating sa silid, kami pa lamang ni Patrick ang nandoon. Maya-maya'y dumami na kami at umingay. Naupo ako katabi ni Patrick pagkat di pa rin magkaayos ni Jessa. Balikan kami sa kanya-kanyang upuan ng dumating si Sir Arnulfo at nagpatuloy kami sa pagwawasto. Nang wala ng maiwasto'y nagkaroon kami ng group activity. Habang di pa dumarating si Ma'am Fabiana ay tinapos kong sagutan ang Ugaling Pilipino. Habang may oras pa'y kopyahan ang aking kamag-aral at ng nasa pisara na si Ma'am, sinimulan na namin iwasto ang Ugaling Pilipino.

^2W-N. Yung iba na katulad ko'y kahit di bumili ng Ugaling Pilipino'y sumagot pa rin sa papel at dahil unfair iyon sa mga bumili, siningil kami ni Ma'am Fabiana ng bente at ako ang pinamahala sa pangongolekta ng pera. Ang lahat ng malilikom na pera'y ipangbibili ng materials na gagamitin sa paggawa ng bulletin board. Dahil naasahan ako, ako na mismo ang inutusan ni Ma'am na bumili ng materials at kahit magkagalit kahapon, katulong ko pa rin si Jessa sa pamimili. Sinuyod na namin ang kabuuan ng eskwela subalit di namin mabili ang styrofore kaya ang natirang pera'y ibinigay namin kay Marco pambili ng styrofore pagkat malapit lamang siya sa Ever Gotesco mall.

^2W-O. Maya-maya’y oras na ng MAPEH at tila iba ang mode ni Ma'am Mina, nakabusangot at matigas kung magsalita. May nakikita pala siyang nandurugas sa iskor ng ikumpara ang record sheet niya sa record sheet ng mga leader at ito'y di tugma. Iniisa isa niya ito at walang ligtas kung sinuman ang mandurugas sa grade. Buti na lamang at di ako natawag pagkat alam kong hindi ako mandaraya. Sa oras naman ng Filipino, hindi naiiba ang araw pagkat puro pasagot sa Batikan si Sir Velarde at di man lang nagtuturo. Sa oras naman ng English ay nagkaroon kami ng remedial test pagkat ni isa sa amin ay walang nakapasa sa Periodical test at karamihan pa'y mabababa ang nakuha.

^2W-P. Sa kagustuhang makabawi'y pwersado kong inintindi ang bawat pangungusap at di basta ang panghuhula. Lumuwag ang paghinga ko matapos ang napakahirap na test. Mistulang Balintawak Market ang classroom sa ingay ng kaklase ko. Nakipagkwentuhan nga rin ako subalit paepal si Poliquit at masyado niya akong pinagtitripan. Hindi ko na lang siya pinapansin subalit lumalapit ito at minumura ako sa pamamagitan ng pagtaas ng panggitnang daliri. Ayaw kong magwala subalit sumosobra na siya at di na nakakatuwa kaya nasigawan ko ito. Hindi pa ito tumigil at pinagloloko ako kaya dumating sa puntong pinagbuhatan ko na siya ng kamay. Tumigil naman ito ng makitang nanggigil na ako.

^2W-Q. Maya-maya’y dumating na si Sir Harren at nagtsek kami ng assignment. Sa oras ng Physics ay nag-Snake and ladder review test kami at nahati kami sa sampung grupo. Si Mandy, Britannica at Denzel ang naging kagrupo. Naging challenge sa amin ang mag-isip ng malalim sa tuwing may itatanong si Sir. Makakagalaw lamang ang pamato kapag tumama ka at paunahan kami sa finish line. Dahil kinapos sa oras, walang ni isa sa amin ang nakarating sa finish line at uwian na. Diretso kain at tulog pagkauwi sa bahay. Pagkagising ay pagbabasa ng Dictionary ang inatupag ko. Sa umaga malamig subalit mala-summer ang init sa hapon kaya naligo ako. Kinagabihan, as usual sa mga hobbies ko ang manood ng telebisyon at papatayin pagkatapos ng paboritong programa. Hindi pa inaantok kaya nagsulat muna ako. Mga Alas-onse na ako natulog.

^{75 | 68} Anim na pu’t walong araw na lang bago magpasko.

October 19, 2013
Saturday
Year I-292

^2W-R. Kumikislap na ang sinag ng araw sa bintana ng magising ako. Alas-sais pa lamang pagkabangon at nakahain na rin ang almusal sa mesa kaya kaagad ko iyon sinunggaban. Kakabato ang umaga ko at walang kabuhay buhay kaya naisipan kong magpatugtog. Ang mga magagandang awitin ang nagbigay sigla sa akin at ganado akong gampanan ang tungkulin at iyon ay magwalis, maghugas at magpunas ng sa gayo'y matuwa naman sila sa akin. Gawaing bahay na kasi ang libangan ko tuwing umaga o dili kaya walang magawa kaya ayos lang sa akin kahit matrabaho. Kasabay ng pagtatapos ko sa gawaing bahay ay pinatay ko na rin ang tugtog. Kapalit naman ang ingay na nagmumula sa labas, may nangangampanya palang isang kandidatong tumatakbong kagawad at panay hikayat sa mga residenteng iboto ito. Di pa natapos at may sumunod muling nangangampanya kaya lalo pang umingay sa lugar namin. Kinatanghalia’y makasunog balat na ang init at akala'y summer season.

^2W-S. Sa dami ng ginawa ko, nakaramdam ako ng gutom subalit hindi pa luto ang ulam. Wala akong ginawa kundi ang maghintay at ng maluto'y halabira ako sa pagsubo. Maya-maya’y bahagyang kumulimlim, marahil ay uulan na at sana nga subalit di naman natuloy. Medyo kurap kurap na ang mata kaya natulog muna ako. Mga Alas-tres na ako nagising at sa tindi ng init, halos maligo na ako sa sariling pawis. Nagpalit pa ako ng damit at sabay binudburan ng pulbo sa likuran. Iba talaga ang pakiramdam kapag nababato ka kaya hiniram ko ang cellphone ni Mama at naglaro ng Candy crush, ka frustated lang dahil lagi akong failed, Temple run na lang ang nilaro at sobrang nag-enjoy ako lalo na nung mahuhuli na ako ng halimaw, parang takot mahuli. Halos maadik na nga ako sa kakalaro ng temple run.

^2W-T. Sa sobrang abala sa paglalaro'y di ko napansin na hapunan na pala at tinatawag na ang pangalan ko. Last try ko na sa Temple run kaya tinapos ko muna at ng matalo'y saka pa lamang ako nakisalo sa hapagkainan. Kahit kumakain na ako, yung utak ko'y parang naiwan sa Temple Run at naiisip ko pa rin iyon. Sunod at dahil deadbatt na ang cellphone Android ni Mama, hindi na ako nakahiram. Kailan kaya ako magkakaroon ng ganong cellphone? Nakakainggit naman pero sinisigurado kong darating araw, nasa palad ko na ang ganung cellphone o mas bongga pa diyan. Manonood sana ng maala ala mo kaya subalit manonood si papa ng bidyo, pinagbigyan ko na lang. nagtungo ako sa kusina at nagsulat ng kwento. Sa sobrang abala sa pagsusulat ay di ko napansing Alas-dose na pala. Ako na lamang pala ang gising kaya kinailangan ko ng matulog.

^{74 | 67} Anim na pu't pitong araw na lamang at bukas ay Pasko na.

October 20, 2013
Sunday
Year I-293

^2W-U. Magandang tinig koro ang sumalubong sa aking pagdilat, nanonood pala sila Mama at Papa ng misa at kahit di nakakapunta sa mismong simbahan, manood ka lang ng misa'y parang nagsimba ka na rin at matatanggal ang kasalanan mo. Kaagad rin akong bumangon at naupo sa sala kasama sila Mama upang manood ng misa. Matapos ang misa'y Salamat Dok na at sa kasarapang manuod ay mga Alas-otso na namin pinatay ang telebisyon. Daming nakatambak na hugasin sa lababo, ayaw ko naman na may masabi sila kaya kusang loob akong naghugas ng plato. Sunod ay nagwalis ako at nagpunas. Maya-maya’y naisipan kong magkumpyuter. pagdating sa computer shop, puro mga maliliit na bata ang naglalaro at ang iingay at ang babaho pa nila, wala akong choice kundi pagtiyagaan iyon. Nawala ako sa konsentrasyon ng magsidatingan ang mga kalalakihang mas masahol pa sa mga bata. Grabe at parang walang katahimikan ang mundo kaya di na ako nagtagal at umuwi na.

^2W-V. Maaliwalas ang panahon at kay gandang masdan ang mabughaw na kalangitan subalit kakapaso ang sinag ng araw. Eksaktong Alas-dyis na ng umaga at nagkainan na sila Mama kaya ako na lang mag-isang nananghalian. Matapos malamnan ang sikmura, nuod muli ng telebisyon at ng magsawa'y papatayin, tapos magsisiyesta, iyan ang gawain ko tuwing weekend. Halos mawasak na ang Eardrum ko sa tindi ng ingay sa labas. May nangangampanya muli. Umalis nga ang nangangampanya subalit pumalit naman ang ingay ng mga tsikiting nagka-Cara y Crus, dahil di matiis ang ingay ay nagtungo ako sa Recrap kung saan payapa at presko pa ang hangin. Sa bahay nila Regine (Miano) ako tumuloy, nadatnan kong masaya silang nag-uusap at nakisali ako. Maya-maya’y pumasok ako sa bahay at nakitang naghihiwa ng sangkap siShiela, tinulungan ko siya at ako na mismo ang naghiwa ng hotdog.

^2W-W. Habang abala sa paghihiwa'y dumating sila Tantan bitbit ang mga inuwing handaan. May ice cream, cake, Pansit at Spaghetti, iyon ang pinagpiyestahan nila, gusto ko sanang makikain subalit hiya ang umiiral sa aking dibdib at umaasang aalukin nila. Saka lamang ako nakikain ng alukin ako at sa dami ng kinain ay nabusog ako. Mukhang right timing ang pagpunta ko sa kanila pagkat nakabuenas ako sa meryenda. Sunod ay kasama ko si Shiela patungo sa kanilang house at dahil isang buwan na rin di nagkikita, kamustahan kami at nagkwento. Maya-maya’y dumating na sila Ate Bing subalit batid kong mga pagod ito kaya di ko na sila kinausap pa. Madilim-dilim na ng umuwi ako at dahil kumain na ko sa kanila, kaunti lang ang kinain kong pagkain at nanood ng telebisyon. Maaga akong natulog pagkat may pasok nanaman kinabukasan.

^{73 | 66} Anim na pu't anim na lamang bago sumapit ang Pasko.

October 21, 2013
Monday
Year I-294

^2W-X. Sa kasarapan ng tulog ay mismong si Mama na ang gumising sa akin. Mukhang humahadlang muli ang lamig sa pagkilos ko at sarap mamaluktot. Dahil ayaw kong pumasok na kakaunti pa lang ang madadatnan kong kaklase'y sinadya kong pumasok ng Alas-sais. Pagdating sa eskwela, wala pa si Ma'am Fabiana subalit kaagad na itong dumating. Nagkaroon ng individual report at pagkatapos ay nag-discuss siya. Kahit may edad na, malakas pa rin ang kanyang boses at kaya pang magturo sa maghapon. Sa oras ng TLE ay ipinagpatuloy namin ang pagkakabit ng cable wire sa RJ 45. Maya-maya’y dumating na si Ma'am Mina at may mahalaga siyang inanunsyo. Pagkatapos ng kanyang talumpati at dahil wala pa kaming grade sa PE, pinagsayaw niya kami ng Wellness dance by groupings. Kahit parehas kaliwa ang paa'y sige pa rin ako sa pagsayaw ng hindi nahihiya.

^2W-Y. Hindi baleng magmukhang tanga sa paningin nila basta may grade at tama si Rommel, hindi ko dapat pinapababa ang tingin sa sarili at kailangang be positive. Sa oras naman ng Filipino, si Sir Bugate ang aming guro at masyado itong istrikto. Bukod pa dun ay ang lalalim ng kanyang Tagalog at magaling rin itong magpatawa kaya ang klase walang sigla'y napalitan ng saya. Mas gusto ko pa ngang maging guro si Sir Bugate kaysa kay Sir Velarde, atlis nagtuturo talaga siya samantalang puro pasagot lang sa Batikan si Sir Velarde. Sa oras naman ng English at dahil bukas na ang performance para sa stage play, naging abala ang halos lahat sa paghahanda. Maya-maya’y dumating si Ma'am Miranda at pinag-usapan ang tungkol sa konsepto at settingng play, pagkatapos magsalita, inatasan ako ni Ma'am na isulat sa papel ang lahat ng naiambag na tulong ng aking kamag-aral, may trabaho na ako at kahit di kasali sa stage play ay magkaka-grade pa rin ako dahil dun. 

^2W-Z. Ilang sandali'y dumating na si Sir Harren subalit may inanunsyo lamang ito at nag-iwan ng takdang-aralin. Nagpatuloy ang practice at paghahanda sa play pagkaalis ni sir.

Tumigil lang ang lahat sa pag-aayos ng setting at kurtina ng dumating si Sir Martin. Nagsimula na ang third grading kaya may bago nanaman kaming lesson na maaring matutuhan. Pagkatapos mag-discuss ni sir ay komopya kami sa pisara. Parang Elementary lang kami sa ginagawa ni Sir Martin, paano ay hindi makakauwi kapag di ka pa tapos magsulat, talagang inisa-isa niyang itsek ang kwaderno namin at kahit tapos na basta laktaw-laktaw ay hindi makakauwi. Sa inip, dinalian ko na lang sa pagsusulat upang makauwi na pero binawi ni sir ang ultimato sa amin at pinayagan rin umuwi kahit di tapos, pambihira at pinahirapan pa kami sa pagsusulat.

^2X-A. Pagdating sa terminal ng tricycle, madalang na lang ang dumadating na mga pasahero, paano nagsiuwian na ang karamihan sa mga estudyante at matagal pa bago umalis. Alas-dos na pala ng makarating ako sa bahay. Mga Alas-kwatro, muli nanamang umingay sa baryo namin dahil may nangangampanya. Di lang iisa ang kumukuha ng simpatya ng taong bayan na iboto siya kundi iba't iba. Dahil may takdang-aralin pa ko, tinapos ko muna at inabot na ko ng gabi. Pagkatapos gawin ang takdang-aralin ay nanood ako ng telebisyon. Himala at napakatahimik naman yata sa baryo namin, bagay na ikinakatuwa ko at mapapanatag ang aking pagtulog.

^{72 | 65} Anim na pu't limang araw na lang bago sumapit ang Pasko.

October 22, 2013
Tuesday
Year I-295

^2X-B. Inaantok pa ako masyado at gusto ko pang mahiga ng matagal subalit ayaw ko ng lumiban pa sa klase kaya kaagad na akong bumangon at naghanda ng almusal. Hindi gasinong kalamigan ang umaga dahilan kung bakit sabik akong maligo. Mahaba na rin ang pila sa terminal ng tricycle sa Taniman at sa takot na mapagalitan kapag nahuli'y naisipan kong sa Ison site na lang sumakay ng sa gayo'y mapadali ang pag-alis. Pagdating sa silid, nadatnan kong abala ang iilan kong kamag-aral sa pagguhit ng background na gagamitin sa play. Maya-maya’y tulong tulong naming inilabas ang mga upuan. Dahil mamaya na angplay, naging abala ang halos lahat sa amin sa paghahanda. May iba pa ngang nilagyan ng dyaryo ang bawat bintana upang di makaapekto ang liwanag salight production samantalang ang mga tauhan sa naturang play ay puspusan na ang pag-eensayo. May taga gawa rin ng mga props, taga-organize ng kurtina, tagasuot ng gown, may nagme-make up rin at ako ang tagatala ng naitulong nila sa paghahanda, ganon kahanda ang seksyon namin sa araw na iyon, tulong tulong at tiyak na magiging bongga ang play mamaya, parang Phantom of the opera ang dating.

^2X-C. Tumigil lamang kami sa pagkilos ng dumating si Sir Balbin at inanunsyo kung sino ang walang project, isa ang pangalan ko sa nabanggit na walang Project at lahat ng natawag ay kailangang ipasa ang cable wire bago mag-uwian. Dali-dali kong kinuha ang cable wire at crimping tool sabay pinutol angwire. Mabuti na lamang at nandiyan si Villaresis na kahit minsa'y pinagtitripan ako, nagpresinta siyang tulungan ako at dahil sa kanya kaya gumana ang cable wire ko by straight over subalit kailangan ko naman paganahin ang cable wire by cross over, may gagawin pa si Villaresis kaya mag-isa ko na lamang inasembol ang wire sa RJ 45 para sa cross over reaction. Tumigil lang ako sa pag-asembol ng dumating si Ma'am Mina. Sa oras ng Filipino'y nagpunta kami nina Jobil sa computer room upang tapusin ikabit ang wire. Halos maubos na ang allowance ko sa kakabili ng RJ 45 at ilang ulit ko ng tinesting sa Lan tester subalit ayaw pa rin gumana. Maya-maya’y ang seryosohang pagkakabit at paggupit ng wire ay nauwi sa lokohan at tawanan, nawala na tuloy ako sa focus at sadyang napakaharot ni Jessa, kung makatawa pa parang di na makakatawa kailanman. Buti pa sina Jobil at Noemi tapos na sa pagkakabit ng wire at iyon ay success kaya may project na sila. Ilang ulit na ko sa pagputol at pagkonekta subalit failed pa rin at parang gusto ko ng sumuko.

^2X-D. Pagbalik sa silid, nagsimula na pala ang play at ibinigay ko kay Ma'am Miranda ang papel kung saan nakatala ang lahat ng naitulong ng aking kamag-aral. Napakaganda ng konsepto sa play at talagang pinaghandaan talaga ang bawat sasabihin kaya naging kapukaw pukaw sa damdamin ang nangingibaw sa halip na kilig. Pagkatapos ang play ay halos magdiwang ang lahat ng sabihin ni Ma'am Miranda ang napakagandang komento at sarap pakinggan sa teynga. Pagkaalis ni Ma'am, back to normal na ang classroom at tulong tulong kami sa pagtatanggal ng dyaryo at pagpapasok ng upuan. Wala pa nun si Sir Harren kaya party party ang mga kamag-aral ko at may sumayaw pa ng Wellness at tawanan ang buong klase ng sumayaw ng Whoop kiri si Mandy at Bacsal, parang nasisiraan lang ng bait subalit kahit may asaran dahil katuwaan lang naman ay naging napakasaya namin pagkat tagumpay kami sa play production.

^2X-E. Natigil lamang ang pagsasaya at kaguluhan sa silid ng pumasok si Sir Harren. Sa oras niya'y nagkaroon kami ng activity. Sa oras ng Physics, nag-discuss lamang si Sir Martin about scalar and vectors at habang nagtuturo'y pasimple kaming komopya ng lecture sa takot na di nanaman pauwiin kapag di tapos subalit taliwas ang aming isip at pinauwi pa rin kahit di tapos. Pagkauwi at dala ng matinding gutom ay napadami ang lamon ko. Nanonood nun sila ng telebisyon kaya nanood muna ako bago matulog. Naging maalinsangan ang hapon kaya di kasarapan ang tulog ko. Sa tindi ng alinsangan, bago magdilim ay naligo ako. Sobrang alinsangan talaga ng panahon at parang di magpapasko subalit maya-maya'y bumuhos na ang ulan. Di naman ito kalakasan subalit nakatulong na rin ito upang maibsan ang init.

October 23, 2013
Wednesday
Year I-296

^2X-F. Umiihip muli ang Hanging Amihan na nagpalamig ng umaga namin kaya nagkumot ako ng makapal. Alas-kwatro y medya na ako nagising at binilisan ko na sa pag-aalmusal, pagdating sa terminal ng tricycle, ang haba na ng pila pero ayos lang iyan, Maaga pa naman. Pagkarating, kakaunti pa lamang ang kamag-aral ko na nasa silid. Ilang saglit pa'y pumasok na si Sir Arnulfo at nagkaroon kami ng groupings. Pakiramdam ko kapag sila Mary Joy, Charlotte at Bacsal ang kagrupo ko, tila di ko magawang maging komportable at madalas ay sila-sila lang ang nag-uusap, nahihirapan akong makisalamuha sa kanila subalit ipinagsiksikan ko na lang ang sarili alang-alang sa grade. Di bale at limang buwan ko na lamang pagtitiyagaan ang mga ugali nila. Bumalik lang kami sa kanya-kanyang upuan ng dumating si Sir Balbin at dahil di ko pa natapos iasembol ang cable wire, nagtungo ako sa Computer laboratory kasama sila Jenny Mae.

^2X-G. Sa wakas at gumana na rin ang cross-over project ko kaya nakabalik na ako sa silid. Di magandang balita ang sumalubong sa akin pagdating ng silid pagkat bagsak raw ako sa MAPEH, another problema nanaman ito lalo na't sa Sabado na ang kuhaan ng card. Bakit pa ako lumagapak sa MAPEH samantalang nagpapasa na nga ako ng mga activity and projects, kuripot talaga magbigay ng grado si Ma'am Mina. Sa oras naman ng Filipino, pumasok nanaman si Sir Velarde upang magpasagot sa Batikan. Dahil di ko dala ang Batikan, nakipagkwentuhan na lamang kila Noemi at Jarito. Sa oras ng English, wala si Ma'am Miranda subalit may humalili sa kanya at iyon ay si Ma'am Reyes. Nagbigay lamang ito ng activity sa amin, pagkatapos ay umalis na ito. Sa halip na maging abala sa paggawa ng activity, pakikipagkwentuhan lang ang inatupag ng aking mga kamag-aral.

^2X-H. Tumahimik lang ng bumalik si Ma'am Reyes at nagtseking kami. Sa oras naman ng Math ay nagkaroon rin kami ngactivity kahit di pumasok si Sir Harren. Sa oras naman ng Physics, nagkaroon kami ng quiz at kahit di nakapagrepaso basta nakikinig sa guro, naging sisiw lang sa akin ang mga tanong kaso nga lang, sa likuran ako pinaupo ni Sir Martin pagkat may nangongopya raw. Hindi natuloy ang tseking pagkat kapos na sa oras. Kasabay ko muli si Gwen sa pag-uwi at kwentuhan kami. Diretso lamon pagdating sa bahay at nuod ng Showtime. Kakakilig ang mga tomboy sa sobrang kopogihan at aakalaing tunay na lalaki kahit pambabae ang pangangatawan. Hindi na ako natulog dala ng init. Kinagabihan, di ako nakanuod ng telebisyon sapagkat kumikidlat, maya-maya pa’y bumuhos nanaman ang ulan, dahilan kung bakit naging napakalamig muli ng panahon na nagpasarap sa tulog ko.

^{70 | 63} Anim na pu’t tatlong araw na lamang bago sumapit ang Pasko.

October 24, 2013
Thursday
Year I-297

^2X-I. Di pa rin nagbabago ang temperatura sa umaga at ganon pa rin kalamig kumpara sa mga nakaraang araw. Maaga pa naman kaya naisipan kong pumunta sa bahay nina Regine (Cebrero) at hinintay ko siya. Maliwaliwanag na ng tumulak kami paeskwela. Pagdating sa eskwela, nagtataka ako kung bakit hinihingi ni Perfecto ang pina-print ko. Doon ko lang naalala na may pinapagawa siya sa akin at tanga ko lang pagkat nakalimutan ko iyon. Wala pa naman si Sir Arnulfo kaya nagtungo ako sa computer shop at nagpa-print. Pagbalik sa silid, mukhang kalat-kalat ang mga kamag-aral ko at may ilan ang naglalaro ng bola. Di pala dumating si Sir Arnulfo kaya naging maingay nanaman ang klase, kaagad ko ng ibinigay kay Perfecto ang pina-print ko na gagamitin sa group performance, halos walang matira sa allowance ko dahil ginastos ko na iyon sa pampa-print. Lumipas ang ilang sandali, TLE na at sa computer room kami nagklase.

^2X-J. Sa oras ng MAPEH at dahil labis kong ipinagtataka kung bakit bagsak ako sa MAPEH, kinausap ko si Ma'am Mina at sinabi niyang wala raw akong long test sa Health. Tuloy ay pinahiram ako ni Ma'am Mina ng original copy ng long test at ipina-zerox ko. Wala rin palang long test si Mary Joy sa Music kaya sabay kaming nagpa-zerox, pagkadating sa silid ay sinimulan na namin mag-take ng long test. Maya-maya’y umalis na si Ma'am Mina subalit di ko pa tapos sagutan ang long test at dumating naman si Sir Martin. Sa kadahilanang malapit na ang National achievement test, nagrepaso kami. Ng magkaroon ng pagsusulit, dismayado ako pagkat kakaunti lamang ang nakukuha ko. Dahil wala na kong allowance, hindi na ako nag-recess pa at tiniis na lamang ang gutom. Sumasakit na ang tiyan ko kaya nangutang na ako sa aking kamag-aral.

^2X-K. Buti na lamang at pinautang ako ni Noemi at Perfecto kahit katiting kaya nakapag-recess pa ako. Dahil nagmagandang loob sila sa akin, taos puso akong nagpasalamat. Maya-maya’y kinausap ako ni Mary Joy at pinapakuha na ang original copy ng test paper. Naku at mukhang sasamain ako kay Ma'am Mina pagkat nawawala ang copy ng long test sa Health at Music, hinalughog ko na ang aking bag subalit hindi ko makita, ang shunga-shunga ko naman at yari talaga ako kay Mina niyan. Balak ko sanang pumunta sa MAPEH Department upang aminin kay Ma'am na naiwala ko ang test paper subalit pinangunahan ako ng takot. Umuwi akong problemado at nangangamba akong baka tuluyang ibagsak ni Ma'am Mina. Bakit ko pa kasi naiwala iyon, tanga-tanga ko talaga.

^2X-L. Pagdating sa bahay, kaagad kong binuksan ang telebisyon at nanood ng Showtime. Performance na pala ngayon ni Vice Ganda kaya inantabayanan ko ng husto subalit pangkaraniwan na ang performance niya kaysa sa mga naunang nag-perform. Sayang at napakalaki pa naman ng expectation ko kay Vice Ganda, kinabog pa siya nila Karylle. Kinahapuna’y nagtungo ako sa Computer shop. Ginabi na ako sa pag-uwi at nadatnan kong nasa bahay si Auntie Andrea na nakikipagdaldalan kila Mama. Kahit naiingaya'y pinabayaan ko na lang sila sa pag-uusap. Tumahimik lang ang paligud ng umalis si AuntieAndre a at naririnig ko na ang aking napapanood. Mga Alas-onse na ako natulog.

^{69 | 62} Anim na pu't dalawang araw na lang bago sumapit ang Pasko, ang bilis ng araw at malapit na ang sembreak.

October 25, 2013
Friday
Year I-298

^2X-M. Dama ko pa rin ang kaba sa dibdib pagkat di ko alam kung ano ang magiging reaksyon ni Ma'am Mina kapag inamin kong naiwala ko ang long test. Hindi pa ako handang kaharapin si Ma'am at makita kaya naisipan kong isakripisyo ang araw na ito sa pagpasok. Parang Bulkang Pinatubo pa naman siya kung magalit at iyon ang kinakatakot ko. Dahil di ako pumasok, malapit ng sumapit ang Alas-otso ng ako'y nagising at kaagad na kumain ng almusal. Pagkatapos ay nagwalis ako at naghugas ng plato. Maya-maya’y nagtungo ako sa labas at nilabhan ang bag. Naging maaraw ang panahon kaya mukha madali sa akin ang magpatuyo subalit dala ng Hanging Amihan, naging mahangin ang panahon. Ang bilis ng oras at di namalayang oras na ng tanghalian.

^2X-N. Pagkatapos mananghalian, nanood kami ng Showtime. Ang ganda ng performance nina Jhong at Anne curtis, talagang pinag-isipan at nakaka-appreciate. Halimaw si Anne Curtis pagkat nakaya niyang buhatin si Jhong, bato-bato pa naman ang katawan ni Jhong. Maalinsangan nanaman ang panahon kaya di nanaman ako nakapag-siyesta at nanood na lang ng Galema, makamandag talaga ang kagandahan ni Andy Eigenmann, kinagabiha'y Annaliza naman ang pinanood ko tapos TV patrol.

^2X-O. Matatapos na rin ang Juan Dela Cruz kaya sinubaybayan ko talaga ng husto. Galing ni Tagabantay at natalo pa niya si Anak ng dilim at Peruha, ang lakas talaga ng dating ni Coco Martin. Sa Got to Believe naman, kilig much ang moda ng ligawan si Chichay ni Dominique, ang kisig rin ng lalaking iyon at mas bagay si Kathryn Bernardo kay Jon Lucas kaysa kay Daniel Padilla, di naman ako napopogihan sa kanya. Maya-maya’y Maria Mercedes na, ang ganda talaga ni Jessy Mendiola at ang lakas ng kanyang karisma, lalo na kapag sumasayaw. Matapos ang maghapong babad ang mata sa kakanood ng telebisyon, pinagpahinga ko na ito sa takot na matuluyang mabulag.

^{68 | 61} Anim na pu’t isang araw na lamang bago sumapit ang Pasko.

October 26, 2013
Saturday
Year I-299

^2X-P. Dahil di na ako inaantok pa, kahit Alas-sais pa lamang ay gumising na ako. Damang-dama ko ang napakaginaw na temperatura kaya naman halos mamaluktot ako sa sobrang pangangatog. Hindi nagpakita ang haring araw at naging makulimlim ang panahon. Upang maibsan ang lamig sa katawan, idinaan ko sa pag-inom ng kape kasama ang paglantak ng malambot na tinipay, sa sarap ng aking agahan, labis akong naumay. Sa Lunes na rin gaganapin ang Halalang pambarangay kaya naman puspusan na ang pangangampanya ng mga tumatakbong kandidato sa pagka-kagawad. Maya-maya, habang nagwawalis ng alikabok sa loob ng bahay, bigla na lamang sumungit ang pakiramdam ko at binahing ng sunod sunod subalit tinapos ko pa rin ang gawaing bahay.

^2X-Q. Wala na akong maisipan pang pagkakaabalahan kaya gumawa na lang ako ng kwento at ang tema'y tungkol sa pag-iibigan, kakakilig naman ang naiisipan kong eksena sa kwento kaya mas lalo pa akong ginanahan sa paggawa. Masaya na nga ako sa aking ginagawa ng biglang tawagin ng ate at pansamantala kong itinigil ang pagsusulat ng kwento. Magpapatulong pala ang ate sa pagkukulay ng buhok at dahil di maabot ang nasa likuran, hindi man ako marunong kung paano magkulay ng buhok ay sinubukan ko pa rin. Dakot ng cream mula sa lagayan at sabay ipapahid sa maitim na buhok, ganon lang kadali ang pagkukulay sa buhok at nagmistulan naman akong parlorista sa aking ginagawa kaso di ko minsan gusto ang ugali ng ate ko pagkat tinatarayan niya ako.

^2X-R. Pasalamat nga siya at pumayag pa akong tagakulay ng buhok niya, naku at kapag naubos ang pasensiya ko, masasabunutan ko na siya ngunit di ako nagpanaig sa aking emosyon. Bahagyang umulan habang kinukulayan ko ang buhok ng ate at makalipas ang isang oras, natapos rin ang pagkukulay sa buhok, kaso parang di nagbago ang kulay at maitim pa rin tingnan. Hala at sinipon na ako ng todo kaya saglit akong nagpahinga. Nanonood nun sila Papa ng Conjuring sa video at upang matanggal ang pagkabagot, nakinuod ako at sobrang kinilabutan ako sa takot. Ilang sandali pa'y oras na ng tanghalian at Sinabawang karne ang ulam, tamang tama para sa akin na lubhang sinisipon ngayon. Dagdag pa sa dahilan ng pagkakaroon ko ng sipon ang pabago-bagong panahon, maulan kanina tapos biglang aaraw pagsapit ng tanghali. Pagkatapos mananghalian ay natulog kami.

^2X-S. Ala-una na ako nagising at dahil may iba akong naamoy sa aking katawan, karakaraka na akong naligo. Ang fresh sa katawan kapag bagong ligo ka. Maya-maya’y sobra kaming naaalinsanganan kaya nagpabili kami kay Mama ng sorbetes. Pagkabili’y nagsalo-salo kami at iyon ang aming meryenda. Busogmuch pagkatapos magmeryenda at upang matanggal ang pagkabato, naisipan ko naman magpa-load at mag-text. Maghapon kong pinagpipindot ang keypadsa Cellphone at hintay ng reply ni textmate. Kinagabihan ay nanood naman ako ng telebisyon. Naging maingay sa lugar namin kaya sa kusina ko ipinagpatuloy ang paggawa ng kwento. Sa hinaba-haba't dami ng kwento sa aking isipan, inabot na ako ng hating-gabi na dilat ang mata subalit di ko pa rin natatapos ang kwento. Malalim na ang gabi at ako na lamang ang gising kaya natulog na ako.

^{67 | 60} Anim na pu't araw na lang bago magpasko, pero Undas muna bago Pasko.

October 27, 2013
Sunday
Year I-300

^2X-T. Nagising ako dahil umaatake nanaman ang uhog ko at nahirapan ako sa paghinga pagkat barado pa ang ilong. Mukhang bumabalik nanaman ang dati kong sakit o baka naman dala lang ng pabago-bagong panahon. Pagkatingin sa bintana, umaga na pala at kinailangan ko ng bumangon pagkat marami pa akong aasikasuhin. Matapos mag-almusal ay naghugas ako ng plato at nagwalis kahit sinisipon. Parang wala ng katahimikan pagkat samu't saring ingay ang maririnig. Nakinig na lamang ako ng music sa radyo kahit oldies, atlis masarap pakinggan sa teynga. Matapos magtrabaho'y ipinagpatuloy ko ang paggawa ng kwento. Maaraw sa labas subalit halos liparin ka naman sa lakas ng hangin kaya naging maalikabok ang kapaligiran. May sipon ako nun at baka pa lumalala kapag nalanghap ko ang alikabok kaya isinarado ko ang bintana.

^2X-U. Maya-maya’y tanghalian na kaya itinigil ko muna ang pagsusulat ng kwento at kumain. Medyo nakakaramdam ako ng antok kaya natulog ako at dakong Alas-dos na dumilat ang mata. Ipinagpatuloy ko ang paggawa ng kwento at inabot na ako ng kadiliman ng matapos ko iyon, binasa ko ang nilikhang kwento at perpect, talagang nakakakilig nga, pwede ng i-publish sa Wattpad. Maya-maya’y nanood na ako ng telebisyon at pagkatapos ay gumawa ulit ako ng panibagong kwento. Katulad ng isang gabi ay inabot nanaman ako ng hating-gabi na dilat ang mata at natulog na. Masaya nanaman ang mga estudyante na kagaya ko pagkat walang pasok bukas, simula na ng bakasyong grande at bukas na rin ang hatol ng taumbayan sa mga tumatakbong kandidato.

^{66 | 59} Limang pu't siyam na araw na lang bago sumapit ang Pasko.

October 28, 2013
Monday
(Barangay Election)
Year I-301

^2X-V. Maaga nanaman akong nagising at bumangon. Ngayong araw rin ang Halalang Pambarangay kaya puspusan na ang paghahanda ng mga guro sa inaasahang dagsa ng mga botante pagsapit ng Alas-siete. Alas-siete na ng umaga ng magbukas ang botohan. Matapos manood ng telebisyon ay saka pa lamang ako nag-almusal, medyo sumusungit nanaman ang aking pakiramdam kaya uminom ako ng Kalamansi. Sa kabila na masungit ang pakiramdam, nagawa ko pa rin magwalis at magpunas. May balak pa sanang maglaba subalit nakalaba na si Mama kaya paggawa ng kwento muli ang aking pinagkaabalahan hanggang sa sumapit ang tanghali, mainit sa labas subalit di naman dama pagkat mahangin. Naubos na ang papel ko sa kakasulat ng kwento kaya matapos mananghalian at matunawan ang tiyan, bumili ako ng papel.

^2X-W. Balak ko sanang hindi matulog upang magkaroon ng oras sa paggawa ng kwento subalit di ko napigilan ang aking antok at nakatulog pa rin. Ipinagpatuloy ko ang paggawa ng kwento pagkagising. Parang pwede na akong maging writerpagkat nahihiligan ko ng gumawa ng kwento at kailangang may mapusuan na akong kurso bago magtapos ang taon. Maya-maya’y pinag-usapan namin ni Mama ang tungkol sa kursong kukunin ko, lubhang tutol si Mama kapag Education ang kukunin ko at di iyon para sa akin dahil hikain akong tao. Kinagibiha’y nanood ako ng telebisyon, naging mapayapa naman ang pagdaraos ng halalang pambarangay subalit may ilang kaso pa rin ng Electionfailure. Kakabato kapag nasa loob lang ng bahay at parang gusto mo ng kausap. Nang makita ko si Anna na patungong Ison site, sumabay ako sa kanya at nagtsikahan kami. Habang naglalakad kami'y saktong nakasalubong sina Regine (Cebrero) at ang ingay nila pagkat ipinagsigawan kung sino ang crush ko.

^2X-X. Malas nga lang ng dating at nakatambay ang crush ko, malay ko lang kung marinig niya iyon. Dumeretso ako kina Jaypee at ang gulo ng kanilang bahay. Di pa pala nakakaligpit si Tita Arlene pagkat pagod ito. Tutulong sana ako sa pagliligpit subalit pinigilan ako ni Tita, nakakahiya raw kasi. Nagkaroon kami ng pag-uusap at maya-maya'y nauwi tungkol sa kurso ang kukunin ko at tinanong ko kay Tita kung pwede ba sa akin ang maging guro. Hindi naman tutol si Tita at lahat pa nga raw ng kurso ay pwede sa akin pagkat matalino raw ako, kaya nga lang kapag pagiging guro ang kukunin ko'y may kaakibat na responsibilidad ang maari kong makasagupa, mas mapipilyo pa naman ang mga estudyante ngayon kaysa dati at bahala na. Dahil napasarapang aming pag-uusap, di ko namalayang Alas-otso na pala at kinailangan ko ng magpaalam. Honesto na pala pagdating ko sa bahay. Matapos manood ng telebisyon ay ipinagpatuloy ko ang paggawa ng kwento. Mga bandang Alas-dose na ng maisipang matulog subalit di pa tapos ang aking kwento.

^{65 | 58} Limang pu't walong na araw na lang bago sumapit ang Pasko.

October 29, 2013
Tuesday
Year I-302

^2X-Y. Nagising ako pagkat umaatake nanaman ang aking uhog at napapansin ko lang nitong mga huling araw ay dumadalas na ang pagkakaroon ko ng sipon. Pagkatingin sa orasan, ikatlo pa lamang ng umaga at dahil barado ang aking ilong, hindi na ako nakatulog pa at nagtungo sa kusina. Ipinagpatuloy ko ang paggawa ng kwentong pag-ibig. Inabot na ako ng liwanag sa paggawa subalit di pa rin tapos at itinigil ko muna upang mag-almusal. Mainit na lugaw ang aking naging agahan at dahil medyo sinisipon ay nilagyan ko iyon ng maraming Kalamansi. Ipinagpatuloy ko ang paggawa ng kwento pagkatapos mag-almusal at mga Alas-nuebe ko na ito natapos. Nagpahinga sandali at maya-maya'y nagtungo ako sa computer shop. Tagal-tagal ko ng di nag-online sa Facebook kaya sinusulit ko na ang bawat sentimong nagagasta. Nanonood na sila Mama ng The Ryzza mae show pagkauwi ko at nakapananghalian na sila.

^2X-Z. Mag-isa na akong nananghalian at pagkatapos ay nanood na rin ako ng telebisyon. Nagsitulugan na ang lahat ng aking kasamahan maliban sa akin na dilat pa rin ang mata kahit maagang nagising. Gumawa muli ako ng panibagong kwento. Maya-maya’y nakaramdam na ako ng antok at natulog. Mga Alas-kwatro na ako nagising at naisipang manood ng Galema. Kinagabihan, di pa man sumasapit ang araw ng Undas subalit dagsa na ang mga pasahero sa iba't ibang terminal upang magbakasyon sa kanya-kanyang probinsya. Buti pa sila at makakapag-bonding ng buo ang pamilya sa probinsya, samantala kami'y dito lang magpapalipas ng Undas. May paparating pang bagyo at nagbabantang manalasa sa mismong araw ng mga patay. Pagkatapos manuod ng telebisyon ay ipinagpatuloy ko ang paggawa ng kwento. Dakong Alas-onse na ako natulog.

October 30, 2013
Wednesday
Year I-303

^2Y-A. Medyo sinisipon pa rin ako kaya maaga muli ang aking paggising at naupo sa sala upang mailabas ng maayos ang uhog. Nang di na sipunin at sa kadahilanang inaantok pa'y natulog muna ako. Patak-patak Alas-otso na ako nagising. Kahit may naiwan pang natitirang uhog ay di iyon naging hadlang at nagwalis pa rin, di baleng makalanghap ng alikabok basta't maging malinis sa loob ng bahay. Pagkatapos maglinis, ipinagpatuloy ko ang pagsulat ng kwento. Itinigil ko lang ito nung tanghalian na at sa tindi ng gutom, halos makasampung buong plato na ako. Sunod ay nanonood ako ng telebisyon upang malibang ang sarili ngayong long weekend at ng antukin ay natulog ako. Mga Alas-dos na ako nagising at inutusan ni Papa na bumili ng gamot para sa kanyang rayuma. Bumili ako ng gamot sa Ison Site subalit wala kaya napalayo pa ako at sa Taas na nakabili. Ng makabili at dahil amoy araw na ako, kahit batid kong maari nanamang atakihin ng uhog ay naligo pa rin ako alang-alang sa aking kalinisan at kabanguhan.

^2Y-B. Dumeretso ako sa computer shop pagkatapos maligo at nag-Facebook. Matapos magkumpyuter ay dumaan ako kina Tita Jean subalit si Itang lang ang nadatnan ko. Maya-maya’y dumating na sina Tita Jean kasama si Habagat subalit wala si Amihan. Kasama ko si Itang sa pagpunta kung nasaan si Amihan at sinundo namin ito. Tuloy ang kwentuhan at katuwaan ng makumpleto na kami at inabot na ko ng gabi sa kanila. Pagdating sa bahay, nainis ako sapagkat wala akong nadatnang ulam. Bumili ako ng delata at pinainit. Pagkatapos ay iyon ang naging hapunan ko. May balak sana kaming magpunta ni Regine (Cebrero) sa Horror House doon sa Consti subalit sinabi niyang wala raw. Umuwi na lang ako at nanood ng telebisyon. Saktong nagtatalumpati ang ating pangulo tungkol sa nangyayaring nakawan sa pondo ng bayan at tumagal ang kanyang talumpati ng kinse minutos. Matapos manood ng telebisyon ay ipinagpatuloy ko ang paggawa ng kwento. Sumapit na ang Alas-onse kaya kinailangan ko ng matulog at di na nagpakapuyat sa magdamag, baka kasi magkasakit.

^{63 | 56} Limang pu't anim na araw na lang bago sumapit ang kapaskuhan at dalawang araw naman bago sumapit ang Undas.

October 31, 2013
Thursday
Year I-304

^2Y-C. Bisperas ng Undas at huling araw para sa buwan ng October, tinanghali muli ako ng gising. Paano kung tagalikha ng kwento na lang ang kunin kong kurso sa kolehiyo, total diyan ako magaling at hilig ko na talaga iyon simula ng elementarya pa ako subalit marami pang nalalabing oras upang mamili ako at maari pa iyon magbago. Mainit-init at umuusok na kape lang ang aking almusal, pagkatapos mag-almusal ay nagwalis ako sa loob ng bahay, medyo masigla ang araw ko ngayon kaya sinisipag ako sa gawaing bahay, ng masiguradong malinis na ang loob ng bahay ay ipinagpatuloy ko ang pagsusulat ng kwento subalit sa dami ng detalye na maari kong maisulat sa kwento, mukhang aabutin pa ako ng ilang oras sa paggawa kung ipapagpatuloy.  Sumapit na ang oras ng tanghalian kaya itinigil ko muna ang paggawa ng kwento at kumain, hindi naging maaraw ang panahon at nagbabadya pa ngang umulan.

^2Y-D. Habang kumakain ng tanghalia'y inutusan ako na bumili ng softdrinks upang sa ganon ay mas lalo pang sumarap ang aming kainan, pagkabili at sa halip na ngiti sa mukha ang makikita'y labis labis na pagkadismaya ang nakita ko sa kanila at pinaulanan pa ako ng sandamakmak na sermon. Nawalan na tuloy ang pagiging magana ko sa pagkain. Kahit bukas pa ang pagdiriwang ng Undas ay marami ng mga tao ang dagsaan sa iba't ibang sementeryo, kabi-kabila na rin ang katatakutan lalo na mamayang gabi na kung saan ay gaganapin ang Halloween party. Bukod sa dagsaan ang mga tao'y may isang bagyong nagbabantang manalasa sa Norte. Nagtagal ang panononood namin ng telebisyon Hanggang Alas-dos at pagkatapos ay nagsipasukan na kami sa kanya-kanyang kwarto upang matulog. Sa kasarapan ng tulog ay hindi ko namalayang sumapit na ang Alas-kwatro ng hapon at binuksan ko muli ang telebisyon upang manood ng Galema.

^2Y-E. Kinagabihan at kahit batid kong laganap na ang mga espirito sa kapaligiran at kahit madilim ang papunta kina Regine (Miano) ay walang takot akong tumuloy. Sina Annie at iba pa nilang kaanak ang nadatnan kong masayang nag-uusap sa gitna ng kadiliman. Itong si Annie ay panay pangbubulyaw sa akin lalo na si Kaka na labis kong ikinabwisit ang bibig niya, paano puro kabastusan ang lumulabas at lokong batang iyon, hindi ako gasinong nagtagal at lumabas ako ng Recrap. May pinag-usapan pa kami ni Regine (Cebrero) tungkol sa pagpunta namin sa Horror House kaya di muna ako umuwi. Mangilan-ngilan lang kaming pupunta sa Horror House at di hamak na mas kaunti kaysa nung nakaraang taon kaya di masaya.

^2Y-F. Ilang saglit pa'y umayaw na ang dalawa naming kasamahan subalit nagpatuloy pa rin kami sa pagpunta hanggang sa sabihin sa amin ni MS. Bantaya na walang magaganap na horror house. Di matanggap ni Cristy ang mga sinabi ni MS. Bantaya at kahit purok leader ng Taniman ay lakas loob na sinagot-sagot ni Cristy si MS Bantaya, pinangaralan na namin siya subalit di ito nakinig at panay pa ang pagsagot sa matanda, sa puntong iyon ay wala na siyang modo at di man lang niya nirespeto ang purok leader. Nagpumilit pa si Cristy at nagpatuloy sa pagpunta subalit natigilan lang nung sina Burgot na ang nagsabi, umuwi na lamang kami at pagkadismaya ang umiral sa kanya-kanyang mga dibdib. Nanood ng telebisyon pagkauwi at pagkatapos ay ipinagpatuloy ko ang paggawa ng kwento. Inabot na ko ng Undas sa kakagawa ng kwento at sa wakas ay natapos ko rin.